BILANGAN 14
14
Atoni Israel ansakoi
1Anbi fai nane in nanan to Israel sin anhunun ma ankoa ma sin ankae. 2Sin namunu ma naakan Nai Musa ma Nai Harun nak, “Leko nesi hit atmate atbi pah Mesir ai anbi mnela snaen i! Maut he hit atmate nai! 3Uisneno neki kit neu pah i neu sa' ka? Mes hit atmate anbi makenat in nanan ma hit fe ma hit anhenu of anheke nan sin. Naleko nesi hit atfani teu Mesir!” 4Oke te sin na'uab es neu es nak, “Leko hit atbeti nakaf mese ma hit atfani neu Mesir!”
5Oke te Nai Musa ma Nai Harun anli'tu ma nabes anbi to ok-oke sin human ma sin matan. 6Nai Yosua Nai Nun anah anmone ma Nai Kaleb Nai Yefune anah anmone, sin nua sin na'ko ale atnu'us nane, sin anpisu sin bale pake anfani ataka neu sin nasusbon. 7Sin nak neu to nane ok-oke nak, “Pah le hai mitnu' milali nane in lekon matain le'uf kun. 8Kalu Uisneno In lomin nanokbon neu kit, In of neki kit neu pah nane ma anfe kit pah le maafa ma alekot nane neu kit. 9Kaisa amlaban Uisneno, ma kais mimtausan atoni-atoni le natua anbi pah nane, natuin of nok makafa hit tis ma atbe'u sin. Le naneo ma nahafo sin nasaitan nalali sin, ma Uisneno In nok kit. Es nane te, kais mimtau.” 10To ok-oke ansali sin hen poli sin neki fatu talante hen maten. Mes nok askeken atoni-atoni nane sin nit pina nalim na'ko Uisneno anbi In Um-ume fafon.
Nai Musa an onen toti namnau to
11 Uisneno nakua a'an nak, “Talante leka anteni atoni-atoni le i hen laban Kau ka? Talante leka anteni sin kan lomi fa he nateb neu Kau, maski Au mo'e ulali ale lasi ataka amfau le'uf anbi sin atnanken ka? 12Of Au ule'un sin eki menas le natlak nem neu sin. Of Au mes anmo'e ko amfani amaf mese na'ko uf mese nanae nesi na'ko sin ma le nabe'i nesi na'ko sin.”
13Oke te Nai Musa nak neu Uisneno nak, “Koi, Uisneno, of atoni Mesir sin nen lasi nane! Mes natuin kun Ho kuasat Ho meki kai ampoi milali mi'ko pah nane, 14ma sin of nanu'un neu atoni-atoni anbi pah i, le sin nen nalali nak Ho, Uisneno, Ho mok kai. Sin amsa sin nen nalali neu Ho mulile mulali Ho aom neu kai tabu Hom nao ambi hai matam anbi nope anbi manas ma fai. 15Kalu Ho mumate Ho to le i ok-oke, onane te uf-uf le afi sin nen beno antom Ko nane sin of na'uab nak 16Ho mumate Ho to sin anbi mnela snaen natuin Ho ka mube'i fa he meki sin neu pah le Hom ba'an mulali neu sin. 17Es nane, koi Uisneno, au toti neu Ko, mulile Ho kuasat neu kai ma munaoba nai sa' le Hom ba'an mulali. Ho mukua mulali Ho a'an nak, 18‘Au, Uisneno, ka uto' fa nok manoe. Au ulile ulali Au lasi manekat ma Au lasi aki'at nahenu nok athoes. Au sako sanat atoni le nasanab ma le anlaban Kau. Maski onane, sanat na'ko mnasi sin of Au seunbanin neu sin anhenu ma sin upfenu, talante batan tenu nok batan ha.’ 19Es nane te, koi Uisneno, natuin Ho manekam anae le'uf ma Ho mu'ki neu Ho lasi manta'en, au toti neu Ko, amsako atoni-atoni le i sin sanat onle Hom sako sin sanat na'ko afi sin nasaitan pah Mesir.”
20Oke te Uisneno natae nak, “Leko, of Au sako sin sanat onle hom toti. 21Mes Au manta'en natuin Au aok ma natuin Au, Au Amonit ma akuasat Kau anbi pah pinan i, 22nak na'ko atoni-atoni le i katit fa es amsa na'ko sin le anmoni le i hen tam neu pah le Au ba'an ulali neu sin amfenu. Natuin sin ka na'ki fa neu Kau, ma sin ansu' Kau piut-piut. Maski sin nit nalali Au pinak le anpin, ma ale lasi amkakan le Au mo'e anbi Mesir ma anbi mnela snaen. 23Kahaf! Sin of kan tam fa neu pah nane. Na'ko sin le anlaban Kau, katit fa es amsa le of antali pah nane. 24-25Mes ka on fa nane neu Au ate Nai Kaleb. In na'ki nabala neu Kau. Es nane te of Au eki in antam neu pah le in antam nalali neune. Tabu le i atoni Amalek ma atoni Kanaan sin natua bale nane. Mes pah nane of anfani bale neu Au ate Nai Kaleb in-ini nok in sanut mofut sin. Noka fa mes him fani koti ma him nao meu mnela snaen amsali Tasi Akaba ninen.”
Uisneno ankas to Israel natuin sin na'munu
26 Uisneno nakua a'an neu Nai Musa ma Nai Harun nak, 27“Talantia leka anteni atoni-atoni amle'ut nane sin na'munu ma naakan Kau ka? Sin sakoit nane Au nen ulali. 28Hi mes mitae sin mak on i: ‘Uisneno nakua a'an nak, “Au sup natuin Au le anmoni nak of Au mo'e ki onle hi miuab anbi Au humak ma Au matak. Au, Uisneno, ukua ulali Au a'ak. 29Hi mi'munu ma miakan milali Kau. Es nane te of hi mate, ma hi aom ta'um of nasan'on anbi mnela snaen i. 30Al Nai Kaleb ma Nai Yosua, katit fa es amsa anbi ki le ton bo'nua nekin sae of kan tam fa neu pah le Au ba'an ulali neu ki. 31Hi mimolok milali mak hi anah-anah sin of anheke sin. Mes Au of es eki sin neu pah le him tite milali nane, ma pah nane of anfani sin pah ma sin nifu. 32Mes hi of amate anbi mnela snaen i. 33Ton bo'ha in a'lon hi anah-anah sin of sin naoinson anbi mnela snaen. Natuin hi ka mi'ki fa, hi anah-anah sin of sin ansutai mafena, talantia atoni amsoput anbi ki anmate. 34Hi of amsutai hi sanat sin amnekin anbi ton bo'ha in a'lon; ton mese anso'i neu neno mese na'ko neno bo'ha neno le him pake he mitnu' pah nane. Hi of mihin ma amnaben onme kalu Au laban ki! 35Au sup ak of Au mo'e lasi nane neu ki, atoni-atoni amle'ut le him malokin lasi hem laban Kau. Anbi mnela snaen le i hi ok-oke of hi mate. Au, Uisneno, ukua ulali Au a'ak.’ ”
36-37Atoni-atoni le Nai Musa ansonu nalali sin he natnu' pah nane, sin anfani nem ma neki han tonas le ka namneo fa antom pah nane, ma lasi nane antao ma anmo'e atoni Israel na'munu ma naakan Uisneno. Es nane te Uisneno ankas sin talante sin anmate natuin antoman menas. 38Na'koatnu'us sin bo'es am nua al Nai Yosua ma Nai Kaleb sin es anmoni.
Makenat ahunut he nape' pah nane
(Ul. 1:41-46)
39Leka Nai Musa natiaba nalali a'an Uisneno neu to Israel, to nane ankul ma ankae nok nek nu'ut. 40Noka fa fe nok-nok ana, sin naloitan ma nabalab hen sae neu tubu tunan. Sin nak, “Namneo hai misanab milalien. Mes hai miloitan milali hem sae neu bale' le Uisneno anlek nani neu kai.”
41Mes Nai Musa nak, “Nansa' tabu i him lomi hem tanhai plenat Uisneno? Hi of ka mis fa! 42Kaisa him nao! Hi musu sin of sin nis ma anbe'u ki natuin Uisneno ka nok ki fa. 43Anbi tabu him laban atoni Amalek ma atoni Kanaan nane, of hi mate ambi makenat in nanan. Uisneno of ka nok ki fa natuin hi kam lomi fa he mituin In.”
44Mes atoni-atoni Israel nane sin fe nahelnok amsa hen sae neu tubu nane in tunan, maski Nai Musa ma Peti Fef bela nane ka nasaitan fa um-ume nane. 45Atoni Amalek ma atoni Kanaan le natua anbi nane sin anlaban sin ma sin nis ma anbe'u atoni Israel ma anli'u sin nem antia Horma.
Currently Selected:
BILANGAN 14: AOZ
Highlight
Copy
Compare
Share
Want to have your highlights saved across all your devices? Sign up or sign in
