BILANGAN 15
15
Lekat lulut antom fua tulu
1 Uisneno anfe neu Nai Musa 2lekat lulut i le mes atoni Israel he nanaoba nani anbi pah le of Uisneno anfe neu sin. 3Antom fua tulu mnotu si fua tulu baen lasi manba'an ai fua tulu natuin nek lomit ai fua tulu luli besa neno-neno, nabe'i mitulu neu Uisneno: bijae keso, bibi kase keso, bibi kase ai bibi. Ale fua tulu nane in fon anhalin Uisneno In nekan. 4-5Sekau natulu bibi kase ai bibi antom fua tulu mnotu neu Uisneno, mes neki amsa nok mu'it nane mese-mese, ut kilo mese maselo nok mina bub fua mina liter mese neu fua tulu bukae, ma tua mina mtasa botil mese am batis amsa. 6Kalu le natulu nane bibi kase mese onane amsa mes natulu ut kilo nua maselo nok mina bub fua mina liter mese am batis neu fua tulu bukae, 7ma tua mina mtasa liter mese am batis. Fua tulu nane in fon anhalin Uisneno In nekan. 8Kalu le natulu nane bijae keso mese antom fua tulu mnotu ai fua tulu baen lasi manba'an ai fua tulu halan, 9onane amsa mes natulu ut kilo tenu maselo nok mina bub fua mina liter nua neu fua tulu bukae, 10ma tua mina mtasa liter nua. Fua tulu nane in fon anhalin Uisneno In nekan.
11Le nane es mes natulu nani bua'-bua' nok bijae keso mese-mese, bibi kase keso, bibi kase ai bibi. 12Kalu le natulu nane anesi na'ko mu'it mese, onane amsa fua tulu ut, mina ma tua mina mtasa mes ansato nani natuin nanesa nok fua tulu le natulu. 13Lasi nane mes atoni Israel mese-mese anmo'e nani anbi tabu in natulu fua tulu. Fua tulu nane in fon anhalin Uisneno In nekan. 14Atoni anao amnemat mese le natua nabua nok ki, leko anbi tabu ka lo fa ai he natua nabala, mes natuin ale lekat lulut nane leka in natulu fua tulu bukae le in fon anhalin Uisneno In nekan. 15-16Ale plenat ma lekat lulut nane papmese neu ki ma neu atoni anao amnemat le natua nabua nok ki, natuin hi ma sin le nane papmese anbi Uisneno In human In matan. Ma lasi nane nanaobon talante nabal-bal.
17 Uisneno anfe neu Nai Musa 18lekat lulut i le mes to Israel nanaoba nani anbi pah le of Uisneno anfe nani neu sin. 19Leka hi he miah sa' le pah nane in afan, hi mes ambeti mani bian hen fani fua tulu mabeti neu Uisneno. 20Kalu him tulu utunu' na'ko ane kase ahunut le him lefi, utunu' nane mes mitulu mani on fua tulu mabeti neu Uisneno. In lekat lulut neu he mitulu mani papmese nok lasi tulu ane kase ahunut le him fole. 21Of ante nabal ale utunu' na'ko ane kase ahunut le him lefi nane hi mes amfe mani on tulu mabeti neu Uisneno.
22-24Leka ka nok fa asafanu hi ka minaoba fa lekat lulut mese na'ko lekat lulut le Uisneno anfe nalali neu Nai Musa, naubon na'ko neno Uisneno anfe lekat lulut nane ma neu batan-batan amnemat, ma anmo'e sanat nane natuin to ka nahin fa lekat lulut nane, onane te to ok-oke mes natulu bijae keso mese neu fua tulu mnotu. Bua'-bua' nok nane mes natulu fua tulu bukae ma tua mina mtasa onle natetab nalali. Fua tulu nane in fon anhalin Uisneno In nekan. Es nane te mes natulu nani bibi keso mese neu fua tulu sako sanat. 25Oke te ana' fuat knino mes anmo'e nani luli besa sako sanat neu to. Onane te of ansako sin sanat natuin sanat nane sin anmo'e ka nok fa asafanu, ma natuin sin neki nalali fua tulu sako sanat ma fua tulu mnotu neu Uisneno. 26To Israel ok-oke ma atoni anao amnemat le natua nabua nok sin of ansako sin sanat, natuin sin al-al sin antam nok anbi sanat le ka nok fa asafanu nane.
27Leka atoni mese es nasanab ka nok fa asafanu, in mes natulu bibi ainaf mese le in uan ton mese neu fua tulu sako sanat. 28Ana' fuat knino mes anmo'e luli besa sako sanat anbi Uisneno In human In matan, he nati' ansako atoni nane in sanat. 29Lekat lulut nane amsa neu sekau am sekau le anmo'e sanat ka nok fa asafanu, leko in le nane atoni Israel ai atoni anao amnemat le natua nabala nok ki.
30Mes kalu atoni Israel ai atoni anao amnemat mese anmo'e sanat nok asafanu, in le nane ka namtausan fa Uisneno. Mes namate atoni nane, 31natuin in anlaban Uisneno ma nok asafanu in antanhai plenat Uisneno. Atoni nane in anmate natuin in sanat kun.
Atoni le antanhai lekat lulut Neno Snasat
32Anbi tabu atoni Israel sin anbi mnela snaen, sin napeni atoni mese le in naiti hau hopit anbi Neno Snasat. 33Sin neki atoni nane neu Nai Musa in human in matan, Nai Harun ma to ok-oke, 34oke te natokob in ma anpao in natuin fe ka naknino fa neu mes hen tao ma anmo'e in onme. 35Uisneno nakua a'an neu Nai Musa nak, “Atoni nane mes mimate mani. Mes meki in anpoi na'ko um-ume ma anbi bale nane to ok-oke mes anpoli in neki fatu talantai in anmate.” 36To ok-oke sin anhel in anpoi na'ko um-ume ma anpoli in neki fatu talante in anmate, onle Uisneno anfe In aplenat.
Lekat lulut antom fukat
37 Uisneno anlenu Nai Musa he natonan to Israel nak, 38“Anmo'e nai fukat-fukat anbi hi bale pake sin pankenu ma amfutun tani mate anbi fukat nane mese-mese. 39Fukat-fukat nane anfani lasi amnaut: Leka him kiso mit in, hi mimnau ale Au plenat ma hi mituin sin. Ma natuin lasi nane te hi of kam nikan Kau fa neu he mituin hi lomim ma hi sinmakat. 40Fukat-fukat nane of namnauba ki neu he mituin ale Au plenat, talante namneo-namneo him fani Au in-ini. 41Au Uisneno es kau; Au eki ki ampoi mi'ko Mesir he nati' Au anfani hi Uisneno, Au Uisneno kau.”
Currently Selected:
BILANGAN 15: AOZ
Highlight
Copy
Compare
Share
Want to have your highlights saved across all your devices? Sign up or sign in
