BILANGAN 11
11
Bale le in kanan Tabera
1Anbi neno mese to nane ansakoi neu Uisneno antom ale sin lasi mafena sin. Leka Uisneno In a nen ale lasi sakoit nane, Uisneno nato' ma anfe ai nem neu sin. Ai nane anpin anbi sin atnanan ma notu nani ale bale snasat sin aon bian. 2Atoni-atoni nane sin anhunun ma ankoa antoti Nai Musa hen tuntaku sin. Nai Musa in onen toti neu Uisneno, oke te ai nane namnai. 3Fun natuin lasi nane, onane te bale nane nakanab nak Tabera, natuin anbi bale nane ai Uisneno anpin anbi sin atnanan.
Nai Musa anbeti mnasi bo'hitu
4Anbi lanan atoni-atoni Israel nane anmu'i maselo nok atoni anao amnemat le sin nok amsa. Sin le nane ansinmak nae le'uf he nah sisi, ma atoni Israel sin amsa ansakoi. Sin nak, “Ah, bati anmu'i sisi neu kit! 5Hit tamnau ika le hit tah nok lum-luman anbi Mesir, fun timun, okam, utan, pania, peo me' ma peo muti! 6Katit fa be'it ma matani anbi kit natuin kan mu'i fa mnahat al mak-muti le hit tit.”
7Mak-muti nane in masan onle hau fua an-ana, in masan muti hum mol-molo. 8-9Anbi fai mak-muti nane anmofu bua'-bua' nok akun anbi bale um-ume. Nok-noka fa te atoni Israel sin nao am nem he nabuab nani, oke te sin anfole ai napau anfani ut, ma sin anmo'e anfani kokis le akbubu. In minan onle kokis le anse'i nok mina bub fua mina.
10Nai Musa in nen atoni-atoni Israel nane sin namunu, ma sin anhake pukan-pukan anbi sin um-ume enon. Oke te Uisneno In to'as ansae talante Nai Musa nekan nasusbon. 11Oke te in nak neu Uisneno nak, “Nansa' Ho mususab kau onle i? Ai Ho kam lomi kau fa ka? Nansa' Ho muna'at kau sutais neu ale atoni nane ka? 12Au es u apus ai u honis ka? Nansa' Hom lenu kau au fani onle apanotes le au uskau li'an-ana, talante au mes he panat sin piut-piut anbi lanan i in a'lon neu pah le Hom ba'an neu sin am uf sin? 13Amkiso, sin nakbit'on piut antoti sisi. Anbi bale me ka au mes he ami sisi neu atoni amfaun nane ka? 14Au ka ube'i fa he sutai neu sutais mafena nane; sutais nane ma'fen le'uf neu kau! 15Leka Uisneno Ho mo'e kau piut onle i, amnek ma mumnau kau fa; leko nesi mumate kau nok laba he nati' kais au sutai teni nukat le i.”
16Oke te Uisneno nakua a'an neu Nai Musa nak, “Amnibun mubuab na'ko atoni Israel mnasi bo'hitu le ansimo sin on anakaf neu to. Meki sin nem neu Au humak ma Au matak anbi Au Um-ume, oke te amlenu sin anhake anbi ho aom bian. 17Of Au sanu ma Au umolok ok ko anbi bale nane, ma kuasat bian le Au fe ulali neu ko, of Au fe ani neu sin. Nok nane te sin anbab ko anloi sutais na'ko nonot i, ma ka nabe'i fa he hom loi mes-mese kum. 18Muton nai lasi i neu nonot nane mak: Miknino hi aom neu neno noka; hi of miah sisi. Uisneno In nen nalali ki him kae ma amsakoi he miah sisi, ma hi mak hi monim naleko nesi tabu him bi Mesir. Es nane te Uisneno of anfe neu ki sisi, ma nabe'i hi miah. 19Hi of miah ka al fa neno mese ai neno nua, ai neno nim, ai neno bo'mese, ai ka al fa neno bo'nua, 20mes of hi miah anbi funan mese in a'lon talante hi mimen ma amlo natuin sisi nane. Lasi nane anbol natuin him tite milali Uisneno le anbi hi atnanam. Ma natuin amsa him kae milali anbi In human In matan ma amsakoi neu hi misaitan milali pah Mesir.”
21Oke te Nai Musa nak neu Uisneno nak, “To le au na' sin le i sin amfauken atoni 600.000. Ho mukua Ho a'am onme fun Ho mak of Hom fe neu sin sisi nok athoes anbi funan mese in nanan? 22Bijae ma bibi kase amfaune onle nane es me ka le mes malolo he nati' namsenab sin? Ai ale ika anbi tasi nanan nanokbon hem fe neu sin he nati' sin nah?”
23 Uisneno natae nak, “Ai Au kuasat nane antu' ma anheu ka? Of ho mit nok manoe sa' le Au umolok le i of namneo hen bol ai kahaf!”
24Fun Nai Musa anpoi ma natiaba neu to nane sa' le Uisneno naton nalali. Nai Musa nabuab mnasi bo'hitu nane ma anlenu sin anhake anfun natef Um-ume Uisneno. 25Oke te Uisneno ansanu anbi nope nanan ma nakua a'an neu Nai Musa. Uisneno naiti kuasat bian na'ko le In anfe nalali neu Nai Musa ma In anfe neu mnasi bo'hitu nane. Leka Smanan Uisneno ansanu neu sin, sin al-al sin anhunun ma ankakan on mafefa knino, mes ka lo fa.
26Sin nua na'ko mnasi bo'hitu le nane, Nai Eldad ma Nai Medad, sin nabala anbi sin um-ume ma ka nao nabua fa nok bian neu Um-ume Uisneno. Anbi sin um-ume nane Smanan Knino ansanu neu sin, ma sin nua sin amsa nabeno on mafefa knino. 27Oke te atoni munif mese in naen anpoi ma natonan Nai Musa sa' le anbol neu Nai Eldad ma Nai Medad.
28Nai Yosua Nai Nun anmone, le antuntaku Nai Musa na'ko in fe munif, in nak neu Nai Musa nak, “Amlenu sin he sin nasnasan, Ama!”
29Nai Musa natae nak, “Nansa' ho mutenab neu kau? Au upane ma ufnek he nati' Uisneno anfe In Smanan neu In to ok-oke, ma anmo'e sin al sin ok-oke anfani mafefa knino!” 30Oke te Nai Musa anfani neu um-ume bale snasat nok mnasi bo'hitu nane.
Uisneno anfe kol pui nem
31Nok askeken Uisneno anfe anin nem na'ko tasi; anin nane neki kol pui le naplel pal-pola oni meter mese amnanun na'ko nain. Kol pui sin naplel anbi um-ume bale snasat fafon kilo fauk-fauk a'lon anhaumak bale nane. 32Anbi neno nane in a'lon, ma fai nane in a'lon talante noka fa anfani in a'lon, ale atoni sin nahelnok ma sin anheke kol pui. Atoni mese oni anheke nan kol pui kilo nifun mese. Ale kol pui nane sin anhoi funam natef um-ume bale snasat he nati' anmeto. 33Leka fe anmu'i sisi anaek he sin anbukae, Uisneno In nato'an to nane ma anfe menas anaek mese nem neu sin. 34Es nane te bale nane nakanab nak “Nitu nate Apalu ai Akomat”, natuin anbi bale nane ansub ale atoni le anmate natuin palu ai komat.
35Na'ko bale nane sin natnani neu bale Hazerot, oke te sin nahakeb um-ume bale snasat anbi bale nane.
Currently Selected:
BILANGAN 11: AOZ
Highlight
Copy
Compare
Share
Want to have your highlights saved across all your devices? Sign up or sign in
