BILANGAN 12
12
Uisneno ankas bi Miryam
1Nai Musa naiti bife Kus mese anfani in fenai, ma lasi nane anfani lasi uf neu bi Miryam ma Nai Harun he sin nasi'u ma naakan Nai Musa. 2Sin nak, “Ai al anao nok Nai Musa anmes Uisneno nakua In a'an ka?” Uisneno In nen sa' le sin namolok. 3Nai Musa in atoni mese le in nek amnebet anae le'uf kun, nesin ale atoni le anmoni anbi pah pinan.
4Nok askeken Uisneno nakua a'an neu Nai Musa, Nai Harun ma bi Miryam nak, “Hi tenu ki amnao nai meu Au Um-ume.” Oke te sin anao anbi nane 5ma Uisneno ansanu anbi ni ai in nanan. Uisneno anhake anbi In Um-ume enon ma In no'en Nai Harun ma bi Miryam. Sin nua sin anao mat, 6ma Uisneno nakua a'an nak, “Amnen nai Au a'ak i! Leka anbi ki anmu'i mafefa knino mese, of Au uton Au aok neune anbi ale amnitas, ma Au umolok ok in anbi nanait. 7Mes ka onfa nane nok Au ate Nai Musa. In le nane atoni aki'at anbi Au nonot. 8Ma Au umolok ok in humaf nok humaf, nok aknino ma ka nok fa uab maamu. Nesi na'ko nane te Au humak amsa In nit nalali! Nansa' nabe'i hi amlaban Nai Musa, Au ate nane?”
9 Uisneno nato'an sin nua sin anae le'uf, ma In anao kon kun. 10Leka nope nane nasaitan Um-ume Uisneno, fun bi Miryam in napeni men poko amle'ut; in aon pasun muti on abas. Leka Nai Harun anbaina neu bi Miryam ma in nit neu in napeni nalali menas nane, 11in nak neu Nai Musa nak, “Koi au Usi, ambab kai fa, kais mufetin kai he nale'un kai natuin sanat le hai mo'e anbi hai lasi mono. 12Kais mufetin in anfani on li'ana le nahonis in anmate nani kun, nok in nesan bian le anpunu nani kun.”
13Nai Musa an onen toti neu Uisneno nok hanan anaek nak, “Koi Uisneno, au toti Ko, muleko in nai!” 14Uisneno natae nak, “Kalu onle in human in amaf nalono ai nakinu, ait anbi neno hitu in a'lon in mes ansutai mae? Mipoitan in na'ko um-ume neno hitu in a'lon, ma oke te nabe'i in antam anfani.” 15Oke te napoitan bi Miryam neno hitu in a'lon, ma to nane ka natnani fa na'ko bale nane talantia ansimo nafani bi Miryam neu um-ume nane. 16Nalali te sin nasaitan Nazerot ma sin nahakeb sin um-ume anbi mnela snaen Paran.
Currently Selected:
BILANGAN 12: AOZ
Highlight
Copy
Compare
Share
Want to have your highlights saved across all your devices? Sign up or sign in
