BILANGAN 10
10
To'is-to'is na'ko noni muti
1 Uisneno nakua a'an neu Nai Musa nak, 2“Amtao ma anmo'e to'is nua na'ko noni muti matutu he mo'en ai amboin to he nabua ai hem lenu sin hen fen he nao. 3Kalu nua sin amfu sin hanan amnanu, in otan nak nonot ok-oke mes he nabuabon neu ko anbi Au Um-ume eno matan. 4Mes kalu al amfu mese, in otan nak al atomatas sin es mes nabuabon neu ko. 5Kalu to'is nane amfu sin han tuk-tuka, nane ataka neu uf-uf anbi neno saen mes hen fen he nao. 6Kalu amfu sin han tuk-tuka anbi hae nua, nane ataka neu uf-uf anbi bian a'ne'u mes hen fen he nao, 7mes kalu hanaf le amnanu nane in otan nak nonot mes he nabuabon. 8To'is-to'is nane mes Ana' fuat knino sin es anfu, Nai Harun in anah-anah sin. Nane lekat lulut le mes hi mituin talante nabal-bal.
9Leka hi maken bi hi pah so him panat hi aom na'ko musu le anlaban ki, amfu ale to'is-to'is nane. Onane te Au, hi Uisneno, of Au tuntaku ma ufetin ki na'ko hi musu-musu sin. 10Onane amsa anbi neno-neno hi mimlil ma mimoek, esle' anbi fesat-fesat Funan Fe'u ma fesat-fesat bian, to'is nane mes amfu sin anbi tabu hi mitulu fua tulu halan neu Kau. Ma of Au tuntaku ma a bab ki. Hi Uisneno es Au.”
Atoni Israel anfen ma anao
11Anbi ton nua leka nonot Israel nasaitan nalali Mesir, anbi neno bo'nua fun nua, nope ansae na'ko Um-ume Uisneno fafon. 12Oke te atoni Israel sin maakatuin sin anfen ma anao nasaitan mnela snaen Sinai, ma nope nane nasnas anbi tabu sin nem antia mnela snaen Paran.
13Nane hae ahunut sin anfen ma anao natuin Uisneno In aplenat nao nok Nai Musa. 14Le anfen ma nao nahunu esle' to pukan le nahaofton anbi pen-pene uf Yehuda, sin maakatuin: Nai Nahason, Nai Aminadab anah in es anfani nakaf neu to pukan of Yehuda, 15Nai Netaneel Nai Zuar anah in es anfani nakaf neu to pukan uf Isakhar, 16ma Nai Eliab Nai Helon anah in es anfani nakaf neu to pukan uf Zebulon.
17Oke te anpukai Um-ume Uisneno, ma nonot Nai Gerson ma Nai Merari sin anfen ma anao ma sin es anloi Um-ume nane.
18Nalali te to pukan le nahaofton anbi pen-pene uf Ruben sin anfen ma anao, sin maakatuin: Nai Elizur Nai Syedeur anah in es anfani nakaf neu to pukan uf Ruben. 19Nai Selumiel Nai Zurisyadai anah in es anfani nakaf neu to pukan uf Simeon, 20ma Nai Elyasaf Nai Rehuel anah in es anfani nakaf neu to pukan uf Gad.
21Oke te atoni-atoni Kehat sin anfen ma anao fun sin es anloi bale-bale knino. Leka sin nem antia um-ume bian, Um-ume Uisneno nahakeb anteni.
22Oke te pen-pene to pukan uf Efraim natuin, maakatuin es nok es: Nai Elisama Nai Amihud anah in es anfani nakaf neu uf Efraim. 23Nai Gamaliel Nai Pedazur anah in es anfani nakaf neu to pukan uf Manasye, 24ma Nai Abidan Nai Gideoni anah in es anfani nakaf neu to pukan uf Benyamin.
25Namuni te to pukan le anfen ma anao es pen-pene uf Nai Dan. Sin anfani apanat antom kotin neu to pukan ok-oke. Sin maakatuin on i: Nai Ahiezer Nai Amisyadai anah in es anfani nakaf neu to pukan uf Nai Dan. 26Nai Pagiel Nai Okhran anah in es anfani nakaf neu to pukan uf Nai Asyer, 27ma Nai Ahira Nai Enan anah in es anfani nakaf neu to pukan uf Naftali. 28Le nane atoni Israel sin nao maakatuin, es nok es leka sin anfen ma sin anao he natnani.
29Nai Musa nak neu in baef, Nai Hibab Nai Rehuel anah nak, “Hai of amfen ma amnao meu bale le natuin a'an Uisneno In of anfe nani neu kai. Uisneno anba'an nalali lasi alekot neu atoni Israel. Es nane te mutuin kai nai, of hai amtao ma mo'e alekot neu ko.”
30Nai Hobab natae nak, “Terima kasih, mes au sinmak he fani eu au kuan.”
31“Kais musaitan kai,” Nai Musa namolok onane, “ho nabe'i amfani ahel lanan neu kai, natuin ho muhin anbi bale me nabe'i tahakeb um-ume anbi pah asnaen.
32Kalu ho mok, ale sa' alekot le Uisneno anmo'e neu kai, of hai mo'e amsa neu ko.”
To Israel anfen ma anao
33Oke te to Israel anfen nasaitan Sinai, tubu bale Uisneno, sin nao neno tenu in a'lon. Peti Fef Bela Uisneno sin neki nao nahunun sin he nami bale snasat neu sin. 34Leka sin anfem na anao na'ko bale snasat nope Uisneno anbi sin fafon piut anbi ne-neno.
35Leka sin naiti Peti Fef Bela nane Nai Musa in nak, “Amfen nai, koi Uisneno, musiteb ma musana Ho musu sin he nati' atoni le nato'an Ko sin naen na'ko Ho humam.” 36Ma leka Peti Fef Bela nane antia bale snasat, Nai Musa in nak, “Amfani aum nai, koi Uisneno, neu Ho to nifun ume Israel.”
Currently Selected:
BILANGAN 10: AOZ
Highlight
Copy
Compare
Share
Want to have your highlights saved across all your devices? Sign up or sign in
