MIKHA 6
6
Lasi uf le Uisneno nalulu neu Israel
1Amnen nai lasi uf le Uisneno nalulu neu Israel. Amfen nai, koi Uisneno, ma mutiab nai Ho lasi uf! Maut he nati' tubu nu'af sin anen sa' le he Ho mumolok mani.
2Hoi tubu-tubu, hoi pah in sukit, amnen nai Uisneno In lasi uf! In anmu'i lasi nok In to ma In of antoti han taes na'ko sin.
3 Uisneno nakua a'an nak, “Hoi Au to, sa' es Au moe ulali neu ki? Au ususab ki anbi lasi sa' ka? Mitae Kau nai! 4Au upoitan ulali ki na'ko pah Mesir, ma Au ufetin ki na'ko lasi aten; Au lenu uali Nai Musa ma Nai Harun ma bi Miryam he nati' antopu ki. 5Au to ki, mimnau sa' le Nai Balak kesel Moab ansali nani neu ki, ma sa' le Nai Bileam Nai Beor in anah natae nani in. Mimnau sa' es anbol anbi lanan anbi um-ume Sitim ma Gilgal sin atnanan. Kalu hi mimnau lasi nane, of hi mihin neu sa' le Au moe ulali he nati' ufetin ki.”
Fua tulu le Uisneno anlomi nani
6Sa' es of hit tatulu tani neu Uisneno, hit Uisneno abit neno tunan, leka hit tam ma tabes neu In? Mes hit he teki bijae tipu alekot ka he nati' hit tatulu anfani fua mnotu neu In? 7Of Uisneno In nekan anmalin ka kalu hit teki neune bibi kase nifun-nifun ai mina bub fua mina le nathoe? Ai mes hit he tatulu neu In hit anmone unu anfani sako sanat neu hit sanat-sanat sin ka? 8Ka onan fa! Uisneno naton nalali neu kit sa' es naleko. Le In antoti na'ko kit esle' so hit atmoe nok amnonot, tanaoba lasi manekat, ma atmoni nok nek amnebet he mese kit tok hit Uisneno.
9Nek ahinet amneot esle' tamtausan Uisneno. In ansakoi neu atokos anbi kot in nanan nak, “Amnen nai, hoi hi le mibua anbi kot in nanan! 10Anbi atoni-atoni amaufinut sin ume hit tapeni bnak le sin napeni neki fulit ma poi. Sin anpake tnais le an aklapa, mo'et mes le Au ka lomi fa. Atoni le anmoe lasi nane of Au kas in. 11Au moe onme ka he nati' Au sako atoni le anpake tnais nok poi nane sin sanat? 12Atoni-atoni amu'it anbi hi kot in nanan nasusu' atoni amamu'it, ma hi mipoibom ok-oke. 13Tabu le of Au tepo ma uskuku ki natuin hi sanat-sanat sin. 14Hi of miah, mes mes hi ka mimsen fa – mes of hi mimnah piut. Hi of maiti hi bale-bale sin, mes of hi ka mitiab fa sin. Sa' es hi mitiab of Au uskuku ani anbi makenat in nanan. 15Of him kifun ane kase, mes of hi kam ketu fa in nesan. Hi of amoe mina na'ko bub fua mina in fuan, mes of hi kam pake fa in mina. Hi of am anbi tua min kase, mes of hi ka minu mani fa. 16Ale lasi-lasi nane anbol natuin hi mituin mo'et-mo'et maufinu na'ko Kesel Nai Omri ma in anah, esle' Kesel Nai Ahab. Hi mituin sin monit. Es nanet, of Au uskuku ki, ma ale uf-uf of naakan ma nasi'u ki.”
Currently Selected:
MIKHA 6: AOZ
Highlight
Copy
Compare
Share
Want to have your highlights saved across all your devices? Sign up or sign in
