MIKHA 7
7
Monit amle'ut to Israel
1Amle'ut neu kau! Au onle atoni le namnah le in nao ma anseu hau fua anbi tabu in etin anfini. Kan mu'i anteni fa hau fua anbi ale hau-hau sin. Tua min kase in fuan ma hau bubuk in fuan alekot anseu nalali sin. 2Atoni amnonot namneku nalali na'ko pah, ma ka taeku teni fa atoni le na'ki anbi Uisneno. Atoni mese-mese anpao tabu sona hen mamaten es nok es. Es-es nahakeb in habi neu in aon bian. 3Sin alsin anmanoe anbi maufinu in nanan. Ana' aplenat ma alef lasi antoti noni poh fefaf, ma amnasi anbi pah naseke sin lomin, onle nane sin alsin masankolan lasi bua'-bua'. 4Le namneo anes ma amnonot na'ko sin amsa onle kisan le ka maota fa.
In tabu antia nalali he nati' Uisneno ankas In to onle In nanaoba nalali sin nanet natuin In mafefa-mafefa knino sin. Tabu le i taisibu anbol nalali anbi sin atnanan. 5Kais mufnek neu ho in-ini sin, ma amsonlaitom neu ho bia sin. Ampantom anbi ho uab molok sin maski nak le natnin nane ho fenai anmes kun. 6Natuin, anbi tabu onle i mamusun of anpoi anbi hi ume nanan; li'anmone of nasi'u in amaf, li'anfeto of anlaban in ainaf, ma nanef of anmatoe nok in babaf bife.
7Mes hit tafnek neu Uisneno; nok nek afnekat aki'at hit athat ma atpao hit Uisneno. In of anen hit onen totis ma of In nafetin kit.
Uisneno anfe honis
8Kan mu'i fa tu'in neu hit musu sin he nati' sin namlil natuin hit askuku. Natuin maski nak hit atmofu, hit of atfen ateni. Tabu le i hit atam anbi mesokan in nanan, mes Uisneno of antana kit. 9Hit tasanab talali neu Uisneno, es nanet tabu le i so hit atamis In maunun ma In to'as. Mes ka lo fa anteni In of anpes nok kit ma In anfe amnonot neu kit. In of napoitan kit neu meusine; hit of atamis atmes neu In anfe kit ahonis. 10Anbi ahunut hit musu sin nasi'u kit nak, “Hi Uisneno, Uisneno nane es me ka?” Mes tabu le i sin of nit sa' le Uisneno anmo'e neu kit, ma sin of namaebok. Hit of tit ma atsaksi neu hit musu-musu nane anli'u sin ma anteli sin onle homa anbi lanan.
11Hoi Yerusalem! In tabu antia nalali neu he nati' hi mifena mifani ale baki lape anbi hi kot. Hi pah of anhenua anteni anbi neno le i amsa. 12Ho atoni sin na'ko me-me of anfani nem neu ko – na'ko Asyur anbi neno saet, na'ko Mesir neno kabenan a'ne'u, ma na'ko pah anbi Noe Efrat, na'ko aon bian tasi ma na'ko tubu-tubu le na'lo. 13Mes pah pinan of anfani pah meto natuin in atokos sin maufinu.
Onen totis antoti matakun Uisneno neu to Israel
14Koi Uisneno, mutuku Ho to, to le Hom beti mulali sin namaika anmes anbi nasi naek in nanan, anbi afu apokat in atnanan. Maut he nati' sin napeni mnahat anbi mnela hufui Basan ma anbi Gilead onle afi tabu ahun-hunut.
15Anmo'e lasi amkakat neu kai, koi Uisneno, onle Ho mo'e anbi ahun-hunut leka Ho mupoitan kai na'ko Mesir. 16Ale uf-uf sin nit lasi nane ma of sin namaebok natuin sin nekan anbe' nok ale sin be'it matani ka maota fa. Sin of anekam nekun talantia ka namolok fa ai ka natnin fa. 17Of sin naknama anbi afu onle kauna. Nok amtaus ma lilitais sin of anpoi na'ko sin kuan, nalali te nem neu Ko, koi hai Uisneno.
18Kan mu'i fa Uisneno onle Ho, koi Uisneno, le amsako Ho to mabeti to nesif sin sanat. Of Ho ka muto' fa talantia nabal-bal; mes nok nek athoes Ho muklile Ho manekam le ka namsopu nit fa. 19Ho of amnek kai ma amsako nai sanat. Of Ho muhapun hai sanat-sanat sin ma ampolin sin neu tasi in sukin! 20Of Ho muton Ho mahoem, Ho a'ki'at ma Ho nek mamun le ka namsopu fa nane neu Ho to, le Nai Abraham ma Nai Yakub sin sufan onle Hom ta'en mulali neu hai na'i ma hai be'i anbi afi ahun-hunut.
Currently Selected:
MIKHA 7: AOZ
Highlight
Copy
Compare
Share
Want to have your highlights saved across all your devices? Sign up or sign in
