MIKHA 5
5
Uisneno anta'en nak of anfe ana' aplenat mese na'ko Betlehem
1 Uisneno nakua a'an nak, “Hoi Betlehem Efrata, hom fani kot a'baut mese anbi Yehuda! Mes na'ko ho amsa of Au fe ana' aplenat mese neu Israel le in sanut mofut nane na'ko un-unun.”
2Es nanet, Uisneno of nafetin In to he nati' sin musu-musu sin naplenat sin talantia fenai le Au lek ani anfani on ainaf neu ana' aplenat le nane nahonis nani In. Nalali onane te atoni-atoni na'ko sin uf le anbi bale mapolin of nameseb nafani sin nok sin uf. 3Leka ana' aplenat nane nem, In of naplenat In to neki be'it matani ma kuasat na'ko Uisneno anmes kun. In to nane of anmoni nok nek amneot, natuin ale atoni anfun natef pah pinan of na'tebes In anaet, 4-5ma of In anfe nek halan.
Fetin ma kasat
Leka solalus Asyur anlaban hit pah ma nale'un hit kot, of hit atfe hit atopus-atopus abe'it sin he nati' anmaken nok sin. Hit atopus-atopus sin nane of nane of anli'u solalus Asyur neki kenat le naloitan nalali ma of nafetin kit na'ko sin niman.
6Atoni Israel bian le nafetin sin onle tani ma akum le neki oe tene na'ko Uisneno neu uf namfau ma onle ulan le nasaunton ma anpofi hau sena. Sin of ansonlaitok neu Uisneno, ma ka neu fa mansian. 7Atoni Israel le fe namaika anbi pah-pah sin atnanan of onle meo asu anbi mu'i fui abit nasi sin atnanan ai onle pukan bibi kase anbi mnela hufui. Meo asu nane antam anbi pukan bib kase nane sin atnanan anteli ma anpisu; ma kan mu'i fa es neu he nati' nafetin bibi kase nane. 8Israel of anli'u sin musu-musu sin ma naskuku sin ok-oke.
9 Uisneno nakua a'an nak, “Anbi leku ma tabu nane Au of umate ho bib kase sin ma Au ule'un ho aklet-aklet makenat sin. 10Of Au uskuku ho kot sin anbi pah le nane, ma Au ukuab ani ho kot amatanit sin. 11Of Au uneku ho le'u-le'u sin ma Au of uneku ma u'lob ho mnane sin. 12Of Au uskuku ho hau ma fatu mahuma ma ho fatu le'u sin, of hi ka mibes amteni fa neu sa'-sa' le hi mo'e meki hi nukum. 13Fatu le'u uisneno teta Asyur anbi ho pah of Au u'belat ani ma Au of uskuku ani ho kot-kot malape sin. 14Of Au seunbanin neu uf-uf le ka na'ki fa neu Kau anbi Au to'as ma Au maunu in nanan.”
Currently Selected:
MIKHA 5: AOZ
Highlight
Copy
Compare
Share
Want to have your highlights saved across all your devices? Sign up or sign in
