MALEAKHI 2
2
1 Uisneno Akuasat Afinit nakua a'an neu ale Ana' fuat knino sin nak, “Le i Au plenat neu ki: 2“Amtola Kau mei hi mo'et. Kalu hi kam lomi fa he mituin Au a'ak le i, of Au kas ki. Ale sa' le him simo anfani athoes of nabaina anfani kasat. Namneo, ale sa' alekot nane, Au kas ulali natuin hi kam panat fa Au plenat sin. 3Of Au kas ho anah-anah sin, ma of Au nose mu'it le hi mitulu in maklafu neu hi humam, ma of Au tite utam ki neu maklafu le anibun nalali. 4Nok nane te hi mihin nak plenat nane Au fe ulali neu ki, he nati' Au han manta'en ok ale Ana' fuat knino, le Nai Lewi in sufan, nanaobon piut.
5Anbi fef bela le nane Au ta'en ulali monit aomina ma alekot, ma Au lenu sin he nati' nabes neu Kau. Anbi tabu le nane namneo sin nabes neu Kau ma namtausan Kau. 6Sin nanoina lasi amneot, ma ka le asanat ma apenut fa. Sin anmafutu nok Kau, ma sin natuin Au lomik nok amnonot. Sin amsa antuntaku atoni namfau he nati' kais anmo'e anteni maufinu. 7Namneo lasi sutais na'ko ale Ana' fuat knino he nati' nanoina Au amneot neu Kau, Uisneno Anesit Afinit. To of natoti neu sin sa' le Au lomi, natuin sin anfani atoni-atoni le Au lenu ani sin.
8Mes tabu le i, hi, Ana' fuat knino-Ana' fuat knino sin anbe'o nalali na'ko lanan amneot. Hi noina-noina sin namofu nalali atoni namfau he nati' anmo'e sanat. Hi mile'un mani fef bela le Au mo'e ulali ok ki. 9Es nane te Au mo'e ki talantia to Israel of nanebet ki natuin hi ka mituin fa Au lomik, ma natuin him beti atoni anbi tabu hi minoina Au to.”
To ka na'ki fa neu Uisneno
10Ai hit ala kit ka Amaf mese fa? Ai Uisneno kan mepu ma kan pakae kit fa oke? Kalu onane, nansa' es hit tanhai han ta'en ma nok lasi nane hit at ele ma atanhai fef bela le Uisneno anmo'e nalali nok hit na'if sin? 11To Yehuda an ele ma antanhai nalali fef bela Uisneno nok sin anmo'e lasi-lasi le nahainisin anbi Yerusalem ma anbi pah anfunam natef. Sin nalahib nalali Ume Uisneno le In nek nani ma sin anmafe nok bife-bife le naluli ma nabes neu fatu le'u ma hau le'u uf bian. 12So nati' atoni-atoni le anmo'e onle nane Uisneno anpolin napoitan sin na'ko to Israel. So nati' kais sin nok anteni he natulu fua tulu neu Uisneno Akuasat Afinit.
13Ma hi mo'et bian esle' i. Baki tulu Uisneno hi mihenu nok matnu; him kae ma amkul natuin Uisneno kan lomi fa hen simo hi fua tulu sin. 14Hi mitoti mak nansa' es In kan lomi fa hen simo sin. Natuin Uisneno nahin ho ka mu'ki fa neu bife le ho mafe mok in anbi tabu ho munif ko. Bife nane soba anbi ho monim, mes hi mitotan in, maski nak anbi Uisneno In human In matan hi manta'en milali he mi'ki piut neu In. 15Ai Uisneno Akuasat Afinit nane es anmo'e ki amfani aof mese ma smanaf mese nok bife le nane? Uisneno In salit onme ka neu lasi nane? Ka naik fa na'ko he hi mipeni li'ana-li'ana le anfani to Uisneno amneot ma amnonot. Es nane te ampanat ho aom, he kais anbi hi atnanam anmu'i le ka na'ki fa neu in fenai. 16“Au nek to'an lasi mapolin,” Israel sin Usi sin Uisneno nakua a'an onane. “Au nek to'an ki leka anmu'i atoni mese na'ko ki anmo'e lasi bulalu onle nane neu in fenai. Es nane te ampanat hi aom ma kais mutotan ho fenai.”
Neno lef lasi anhaumak nalali
17Uisneno anlenan ho molok luman sin. Mes hi mitoti mak, “Uisneno anlenan kai onme ka?” Ma hi mimolok mak, “Ale atoni le anmo'e amle'ut Uisneno nabai anfani alekot, ma In anlomi sin.” Ai nok han totis mak, “Uisneno amneot ma amnonot nane esme ka?”
Currently Selected:
MALEAKHI 2: AOZ
Highlight
Copy
Compare
Share
Want to have your highlights saved across all your devices? Sign up or sign in
