IMAMAT 16
16
Neno naek sako sanat
1Namuni na'ko Nai Harun in anah nua sin anmate anbi tabu natulu natnat ai le Uisneno kan lomi fa, Uisneno nakua a'an neu Nai Musa, 2In nak, “Mutiaba neu ho tataf Nai Harun, mak al tabu le natetab nani in nabe'i antam neu Ke'an Knino le'uf le an eka nani neki pilu ekat, natuin anbi nane Au ulile ma uton Au aok anbi nope in nanan anbi Peti Fef Bela in toben. Kalu Nai Harun antanhai plenat nane, in of anmate. 3Al nok lanan natulu natnat bijae keso tipu' neu fua tulu sako sanat ma bibi keso neu fua tulu mnotu, Nai Harun nabe'i antam neu Ke'an Knino le'uf.”
4Anesi na'ko nane Nai Harun mes anpanat lekat lulut i. Nahunu na'ko in fe kan tam fa neu Ke'an Knino le'uf nane in mes naniu oke te anpake blua pake Ana' fuat knino esle', sobalu, noso naef, pasu futu ma pilu nakaf, ale nane ok-oke na'ko pilu muti.
5Oke te nonot Israel nana'at neu Nai Harun bibi keso nua neu fua tulu sako sanat ma bibi kase keso mese neu fua tulu mnotu. 6Nai Harun mes natulu natnat bijae keso mese neu fua tulu sako sanat neu in aon kun ma in ume nanan. 7Bibi keso nua na'ko nonot Israel mes neki neu eno matan Um-ume Uisneno. 8Anbi nane in mes nosu sulat anpake fatu nua, le es te nataka nani “neu Uisneno”, ma bian “neu Azazel”. 9Bibi le mabeti neu Uisneno mes natulu natnat nani neu fua tulu sako sanat. 10Bibi le mabeti neu Azazel mes nahakeb nani nok a honis anbi Uisneno In human ma In matan oke te anli'u in neu mnela hufui neu Azazel, he nati' sanat-sanat nonot Israel an nose nani sin.
11Leka Nai Harun natulu natnat nalali ma anlolo bijae keso neu fua tulu sako sanat neu in aon kun ma neu in ume nanan, 12in mes naiti bale ai na'ko baki tulu ma antao ai flae neune talante nahenu ma atu fomeni malule nima nua, oke te neki neu Ke'an Knino le'uf. 13Atu fomeni nane notu nani anbi Peti Fef Bela in matan, talante in masu an amu nan Peti Fef Bela nane toben ma Nai Harun in ka nit nani fa, natuin leka in nit, in of anmate. 14Oke te Nai Harun mes naiti nan na' akle'o na'ko bijae nane, ma neki in kalulun in anpisin na' nane neu aon bian matan tobes Peti Fef Bela ma hae hitu neu Peti Fef Bela in matan.
15Oke onane te Nai Harun mes anlolo bibi neu fua tulu sako sanat nonot Israel. Na' na'ko bibi nane mes neki nani neu Ke'an Knino le'uf, oke te anpisil neu Peti Fef Bela toben matan, onle anmo'e nalali neki bijae keso in na'. 16Nok lanan nane in naknino Ke'an Knino le'uf na'ko amle'ut nonot Israel ma na'ko ale sin sanat. Um-ume Uisneno mes he naknino nani natuin in anbi um-ume nonot Israel sin atnanan ma antoman sin amle'ut. 17Naubon na'ko tabu Nai Harun antam neu Ke'an Knino le'uf he nanaoba lasi luli besa he naknino talante anpoi, atoni mese amsa ka nabe'i fa hen bi Um-ume nane in matan. Leka anmo'e nalali lasi luli besa neu in aon kun, neu in ume nanan sin ma neu nonot Israel ok-oke. 18Nai Harun mes anpoi ma in nao neu baki tulu fua tulu mnotu he naknino baki tulu nane. In mes naiti nan bijae na' akle'o ma bibi na', ma anosen neu sunaf-sunaf anbi baki tulu in si'uf-si'uf sin. 19Nok in kalulun in mes anpisil na' nane hae hitu neu baki tulu in tunan. Nok lanan nane in naknino baki tulu na'ko amle'ut nonot Israel, he nati' anfani knino.
Bibi metan
20Leka anmo'e nalali luli besa naknino Ke'an Knino le'uf bale-bale bian na'ko Um-ume Uisneno ma in baki tulu, Nai Harun mes natulu ma natnat neu Uisneno bibi le anmoni le anbeti nalali neu Azazel. 21In mes antao in niman nua sin neu bibi nane in anakan ma an au ale sanat ok-oke, sanat ma tanhais nonot Israel. Nok le nane te ale sanat nonot Israel natnanib nani sin neu bibi nane in anakan. Oke te atoni mese la natetab nani mes anli'u bibi nane neu mnela hufui. 22Bibi nane neki ale sanat nonot Israel ok-oke neu bale hufui le ka matua fa ma mes nafetin in anbi mnela hufui.
23Oke te Nai Harun mes antam neu Um-ume, napoitan blua pake Ana' fuat knino le in anpake anbi tabu in antam neu Ke'an Knino le'uf, ma nabela pake nane anbi nane. 24Oke te in mes naniu anbi bale mese le ateta kun ma in anpake nafani in blua pake. Oke te in anpoi ma natulu natnat fua tulu mnotu hen sako sanat neu in sanat kun ma sanat nonot Israel. 25Mu'it in balun neu fua tulu sako sanat mes notu anbi baki tulu.
26Atoni le nafetin bibi neu Azazel anbi mnela hufui mes anfase in blua pake ma naniu nahun na'ko in hen fani neu um-ume. 27Bijae keso ma bibi neu fua tulu sako sanat, le neki in na' neu Ke'an Knino le'uf neu sako sanat, mes neki napoitan na'ko bale um-ume ma notu nani. Pasu, sisi ma taifen na'ko mu'it nua en nane mes notu nani sin ok-oke. 28Atoni le notu nani sin mes anfase in blua pake ma naniu nahun na'ko in fe kan fani fa neu bale um-ume.
Lekat lulut he naliatas neno sako sanat
29-31Lekat lulut i mes mituin mani talante nabal-bal. Anbi neno bo'mese fun hitu, atoni Israel ma atoni anao amnemat le natua nabal nok sin mes nanahok ma antal sin he kais anmepu, natuin neno i neno knino le'uf kun. Anbi neno nane mes anmo'e lasi luli besa he naknino nonot Israel na'ko ale sin sanat he nati' sin naknino. 32Ana' fuat knino Amnanut le namepan nalali in ma beti neu Uisneno hen seka in amaf, mes nanaoba lasi luli besa he naknino nonot nane. In mes anpake blua mabeti, 33oke te nanaoba lasi luli besa naknino Ke'an Knino le'uf, ale bale bian na'ko Um-ume Uisneno, baki tulu, ale Ana' fuat knino, ma nonot Israel ok-oke. 34Lasi luli besa nane mes nanaoba hae mese anbi ton mese he naknino nonot Israel na'ko ale sin sanat. Nane lekat lulut le mes he natuin nani talante nabal-bal.
Nai Musa nanaoba lekat lulut nane onle Uisneno anfe nani plenat neu in.
Currently Selected:
IMAMAT 16: AOZ
Highlight
Copy
Compare
Share
Want to have your highlights saved across all your devices? Sign up or sign in
