IMAMAT 14
14
Luli besa naknino'on leka naleko na'ko men poko amle'ut
1 Uisneno anfe neu Nai Musa 2lekat lulut i antom luli besa naknino'on leka naleko na'ko men poko amle'ut. Anbi neno atoni nane he nalile ma naton neune nak in naknino mes neki in neu Ana' fuat knino, 3ma Ana' fuat knino neki in anpoi na'ko um-ume. Kalu natuin Ana' fuat knino in antae nalali nak 4atoni nane in naleko, Ana' fuat knino anlenu in neki kolo leko nua le fe anmoni, nok hau aijo tuka mese, tani me' nono mese ma akmeo tlaef mese. 5Kolo mese mes anlolo anbi tasu nain le nahenu nok oi knino na'ko oi mata. 6Kolo mese anteni nok hau aijo, tani me' ma akmeo tlaef mese anlep nani neu kolo in na' le anlolo nalali. 7Ana' fuat knino anpisil kolo nane in na' hae hitu neu atoni le naleko nalali, ma le naton neune nak in naknino. Oke te kolo le fe anmoni nane mes nafetin neu mnela. 8Namuni te atoni nane mes anfase in blua pake, an eu in nakfunu ok-oke, ma naniu. Nok nane te in naknino, ma nabe'i antam anbi in um-ume nanan, mes anbi neno hitu in a'lon anteni in ka nabe'i fa hen tam neu in um-ume nanan. 9Anbi neno hitu namsopu te in mes hen eu in nakfufu ok-oke, in konon amsa, in matan funu ma funuf ok-oke le anbi in aon. Oke te in mes anfase in blua pake ma naniu. Oke onane te in naknino kun.
10Anbi neno fanu namsopu te atoni nane mes he neki kase keso ana' nua ma bibi kase opu mese le fe ton mese, le es-es kan mu'i fa in amle'un. Nesi na'ko nane amsa ut kilo tenu le anselo nalali nok mina bub fua mina botil batis mese. 11Oke te Ana' fuat knino mes neki in nok tulu tnatas neu Um-ume Uisneno in eno matan. 12Ana' fuat knino mes naiti bibi kase keso ana' nua ma mina bub fua mina botil batis nane neu fua tulu seka lukit, ma natulu nani on tulu tnatas etus tonas neu Uisneno. 13Bibi kase ana' nane mes anlolo nani anbi bale le nateta nani hen lolo mu'it neu fua tulu sako sanat ma fua tulu mnotu. Bibi kase nane mes anlolo anbi bale nane natuin fua tulu seka lukit ma fua tulu sako sanat nane knino le'uf kun ma anfani pa' ma nama' Ana' fuat knino. 14Ana' fuat knino mes naiti nan na' akle'o na'ko na' bibi kase ana' nane oke te anosen neu atoni nane in luken non a'ne'u abit apinan, neu in kalulun anaet niman a'ne'u ma neu in kalulun anaet haen a'ne'u atoni le of naton neune nak in naknino. 15Namuni te Ana' fuat knino naiti nan mina bub fua mina akle'o ma antesi neu in niman a'li in nanan. 16Oke te in anlep in kalulun niman a'ne'u neu mina nane in nanan, ma anpisil hae hitu anbi Um-ume Uisneno in nanan. 17Oke te mina akle'o le anbi in niman mes anosen anbi bale-bale le anosen nalali na', esle' anbi in luken a'ne'u, ma kalulun anaet haen a'ne'u atoni le of naton neune nak in naknino. 18Mina le anesi nane mes an op nani neu atoni nane in anakan. Nok nane te Ana' fuat knino anmo'e luli besa neu naknino atoni nane anbi Uisneno In human In matan.
19Namuni te Ana' fuat knino mes natulu ma natnat fua tulu sako sanat he nati' atoni le nale'u nane naknino anfani. Oke te in mes anlolo mu'it neu fua tulu mnotu, 20ma natulu natnat nok fua tulu mnahat anbi baki tulu fafon. Nok nane te Ana' fuat knino anmo'e nalali luli besa neu naknino atoni nane, ma in naknino anfani.
21Kalu atoni nane atoni amamu'it ma kan mu'i fa sa'-sa', onane te fua tulu seka lukit in al nabe'i neki bibi kase keso ana' mese neu tulu tnatas etus tonas neu Uisneno. Nesi na'ko nane ut kilo mese anselo nok mina bub fua mina neu fua tulu mnahat, ma mina bub fua mina botil bait ses. 22In amsa mes neki kol ot kase ana' nua ai kol ot ana': es neu fua tulu sako sanat ma es anteni neu fua tulu mnotu. 23Ale tulu tnatas nane in mes neki sin neu Ana' fuat knino anbi Um-ume Uisneno eno matan anbi neno fanu luli besa naknino in aon. 24Ana' fuat knino mes naiti bibi kase ana' ma mina bub fua mina nane ma natulu natnat nani on tulu tnatas etus tonas neu Uisneno, ma nane neu pa' ma nama' Ana' fuat knino. 25Oke te Ana' fuat knino mes anlolo bibi kase keso nane ma anosen na' akle'o neu atoni nane in luken non a'ne'u, anbi in kalulun anaet niman a'ne'u ma in kalulun anaet haen a'ne'u atoni le of naton neune nak in naknino. 26Ana' fuat knino mes an op mina akle'o neu in niman a'li in nanan, 27ma nok in kalulun niman a'ne'u anpisil mina nane hae hitu anbi Um-ume Uisneno in matan. 28Oke te mina akle'o le anbi in niman mes anosen neu bale-bale le anosen nalali na', esle' anbi atoni nane in luken non a'ne'u, anbi in kalulun anaet niman a'ne'u ma in kalulun anaet haen a'ne'u atoni le of naton neune nak in naknino. 29Mina anesit nane mes an op nani neu atoni nane in anakan neu luli besa knino in aon anbi Uisneno In human In matan.
30Namuni te Ana' fuat knino mes natulu natnat kol ot kase ana' mese ai kol ot ana' 31neu fua tulu sanat, ma es anteni neu fua tulu mnotu nok fua tulu mnahat. Nok nane te Ana' fuat knino anmo'e luli besa neu naknino atoni nane anbi Uisneno In human In matan.
32Nane lekat lulut luli besa neu naknino atoni le fe naleko na'ko men poko amle'ut neu atoni le kan mu'i fa sa'-sa'.
Ume hun a lapu
33 Uisneno anfe neu Nai Musa ma Nai Harun 34lekat lulut neu ume hun le an lapu ma anfenus. Lekat lulut le i nanaobon leka nonot Israel antam nalali neu Kanaan, pah le Uisneno anfe nani neu sin. 35Sekau napeni anbi in ume nanan neu in ume hun an lapu in mes naton lasi nane neu Ana' fuat knino. 36Leka Ana' fuat knino fe ka nem fa hen tae ume nane neu hun an lapu, in mes anfe plenat he nati' napoitan ale sa'-sa' na'ko ume nanan. Kalu kahaf ale sa'-sa' anbi ume nane in nanan anfani amle'ut. 37Oke te Ana' fuat knino mes nem hen tae amle'ut nane. Kalu anmu'i akbuaf masan mate ai masan me' amtasa onle antam neu baki lape in nanan, 38oke Ana' fuat knino nao nasaitan ume nane ma nafetin in ma'letu nan neno hitu in a'lon. 39Anbi neno hitu namsopu te in mes anfani nem ma antae anteni. Kalu hunat nane anfenus, 40-41in mes anfe plenat fatu-fatu baki lape le antoman hunat nane anpukai nani ma ale baki lape anbi nanan anfon sin. Luluef le anfon na'ko baki lape ma fatu-fatu nane mes anpolin nani sin neu bale amle'ut mese anbi kot kotin. 42Oke te fatu-fatu le anpolin sin le nane mes anseka sin neki fatu-fatu fe'u. Ale baki lape ume nane mes anlape nani neki lulef fe'u.
43Kalu le hunat nane anpoi anteni mes fatu-fatu ume nane anseka nalali sin ma in baki lape anfon nalali ma anlape nafani, 44namuni Ana' fuat knino mes anfani nem ma antae ume nane anteni. Kalu amle'ut nane in anfenus onane te ume nane namneo in amle'ut kun, 45ma mes anpukai nani. Ale fatu ma nau ma ale lape lulef ume nane mes neki anao neu bale amle'ut anbi kot in kotin. 46Nahunu na'ko nane sekau am sekau le antam anbi ume nane in nanan anfani amle'ut talante neno antes. 47Sekau antup ai nah anbi ume nane mes anfase in blua pake.
48Mes kalu Ana' fuat knino in nem ma natuin in antae hunat nane kan poi anteni fa leka ume nane anlape nafani nalali neki lape lulef, in naton neu ume nane naknino, natuin amle'ut nane namneku nalali ok-oke. 49Neu he naknino ume nane, Ana' fuat knino mes naiti nan kolo nua, hau aijo, tani me' ma akmeo tlaef mese. 50Kolo mese mes anlolo anbi tasu le nok oe aknino na'ko oe mata. 51Oke te hau aijo, tani me', akmeo ma kolo le fe anmoni mes anlep nani neu na' kolo le anlolo nalali ma neu oe aknino in nanan. Oke te anpisil neu ume nane hae hitu. 52-53Kolo le fe anmoni nane mes nafetin nani anbi mnela anbi kot in kotin. Nok nane te Ana' fuat knino anmo'e nalali luli besa naknino ume, ma ume nane naknino anfani.
54Nane lekat lulut antom men poko amle'ut, 55neu akbuaf-akbuaf, ai hune ai akbuaf-akbuaf muti ai fu'un anbi aon ma lapu ma hunat anbi blua pake ai ume. 56Lekat lulut nane in otan neu he nafek neu sa' es nane knino ai amle'ut.
Currently Selected:
IMAMAT 14: AOZ
Highlight
Copy
Compare
Share
Want to have your highlights saved across all your devices? Sign up or sign in
