IMAMAT 13
13
Lekat lulut antom men poko le neki amle'ut
1 Uisneno anfe neu Nai Musa ma Nai Harun lekat lulut i: 2Leka atoni mese in aon anmu'i akfua, ai hune, ai akbubu muti anbi in pasu le hen fani menas anbi in aon pasun le neki amle'ut, so mes neki in neu Ana' fuat knino sanut mofut Nai Harun. 3Ana' fuat knino mes antae atoni nane in aon le menas anpoi anbi in aon pasun. Kalu funuf anbi pasu bale menas atoni nane anfani muti, ma bale menas nane kalu in antam anesi na'ko pasu bale menas nane, atoni nane in napeni men poko le neki amle'ut. Ana' fuat knino mes nalile ma naton nak atoni nane amle'ut ma ka naleko fa. 4Mes kalu bale le namen masan muti ma kan tam fa mnanu na'ko pasu bale menas nane, ma funuf anbi bale menas nane amsa ka muti fa, atoni nane mes anpaisan nani nan neno hitu in a'lon. 5Anbi neno hitu namsopu, Ana' fuat knino mes antae anteni. Ma kalu anbi in tenab nak menas nane fe nabala ma kan fenus fa, atoni nane mes anpaisan in, nan neno hitu in a'lon anteni. 6Anbi neno hitu namsopu Ana' fuat knino mes antae nafani anteni, ma kalu bale menas nane in naleko ma kan fenus fa, Ana' fuat knino mes nalile ma naton nak atoni nane naknino. 7Mes kalu leka Ana' fuat knino nalile ma naton nalali nak atoni nane naknino mes menas atoni nane amfemus, in mes anfani he natef nok Ana' fuat knino. 8Ana' fuat knino mes antae anteni, ma kalu in menas namneo anfenus, atoni nane mes nalile ma naton nani nak amle'ut, in namen men poko le neki amle'ut.
9Atoni mese le namen men poko amle'ut mes neki nani neu Ana' fuat knino. 10Kalu natuin Ana' fuat knino in antae atoni nane in pasun anmu'i fu'un muti le on hune ma funuf anbi bale menas nane anfani muti, 11atoni nane in namen men poko amle'ut. Ana' fuat knino mes nalile ma naton nak atoni nane amle'ut. Ka nabe'i fa hen paisan ai naikan in, natuin namneo nalali nak atoni nane in amle'ut kun. 12Kalu Ana' fuat knino in nit nak hune-hune muti nane anfenus na'ko atoni nane in anakan talante in haen, 13ma natuin in taes nak menas nane anfenus neu atoni nane in aon ok-oke ma in pasun ok-oke muti nalali, nak atoni nane in naknino. 14Mes kalu hune anpoi, Ana' fuat knino mes antae anteni. 15Kalu nane namneo hune, atoni nane mes nalile ma naton nani nak in amle'ut kun, natuin in namen men poko amle'ut. 16Mes kalu hune nane naleko ma anfani muti anteni, atoni nane mes he nao natef nok Ana' fuat knino, 17he nati' antae anteni. Kalu hune nane namneo in anfani muti nalali, Ana' fuat knino nalile ma naton nak atoni nane naknino.
18Kalu atoni mese in anmu'i bisu le naleko nalali, 19mes anbi in balan anpoi fu'un muti ai hune-hune muti masan me', atoni nane mes he nao he natef nok Ana' fuat knino he nati' antae in. 20Kalu hune-hune nane onle antam nesin pasu le anfun nan hune-hune nane ma funu anbi bale menas nane anfani muti nalali amsa, Ana' fuat knino nalile ma naton neu atoni nane nak in amle'ut kun. Bisu nane menas ahunut na'ko men poko amle'ut. 21Mes kalu natuin Ana' fuat knino antae funu anbi bale menas nane kan fani fa muti ma bale nane kan tam fa mnanu nesi na'ko pasu anfun nan bale menas nane, al in masan nane fe fe'u, atoni nane mes anpaisan ai naikan in nan neno hitu in a'lon. 22Kalu hune muti nane anfenus, Ana' fuat knino mes nalile ma naton neu atoni nane nak amle'ut natuin in namen men poko amle'ut. 23Mes kalu hune muti nane ka nabaina fa ma kan fenus fa amsa, nane al bisu in balan, nalile ma naton neu atoni nane nak in naknino.
24Kalu atoni mese antoman papa' mnotu, oke te pasu anbi papa' nane anfani muti ai muti namas me' amtasa, 25Ana' fuat knino mes antae nani. Kalu funuf anbi bale menas nane anfani muti ma in papa' antam anesi na'ko pasu anfun nan bale menas nane, nane men poko amle'ut natnani nalali neu papa' mnotu nane, ma Ana' fuat knino mes nalile ma naton neu atoni nane nak in amle'ut kun. 26Mes kalu funuf anbi bale nane kan fani fa muti ma bale nane kan tam anesi fa na'ko pasu anfun nan bale menas nane, al in masan nane fe fe'u, atoni nane mes anpaisan ai naikan nan neno hitu in a'lon. 27Anbi neno hitu namsopu Ana' fuat knino mes antae nafani nani. Kalu hune nane anfenus, atoni na ne' in namen men poko amle'ut, ma mes nalile ma naton neune nak in amle'ut kun. 28Mes kalu hune muti nane ka nabaina fa ma kan fenus fa, al in mas muti nane anesi, nane ka men poko amle'ut fa. Ana' fuat knino mes nalile ma naton neu atoni nane nak in naknino, natuin mas muti nane al papa' mnotu in balan.
29Kalu atoni mese ai bife mese namen men poko 30anbi in anakan ai in a'su'in, Ana' fuat knino mes hen tae in. Kalu bale menas nane onle antam anesi na'ko pasu anfun nan bale menas nane, ma nakfunu ai konon anbi bale nane anfani molo oke te ankolu, atoni nane namen men poko amle'ut ma mes nalile ma naton neune nak in amle'ut kun. 31Kalu natuin Ana' fuat knino antae nak bale menas nane kan tam anesi fa na'ko pasu le anfun nan bale menas nane, mes kan mu'i fa nakfunu ai konon le leko anbi bale nane, atoni nane mes anpaisan ai naikan in nan neno hitu in a'lon. 32Anbi neno hitu namsopu, Ana' fuat knino mes antae nafani bale menas nane kan fenus fa ma kan mu'i fa nakfunu ai konon le molo anbi bale nane, nesi anteni amsa onle kan tam anesi fa na'ko pasu 33anbi bale menas nane, atoni nane mes an eu in nakfunu ai in konon anfun natef bale menas nane. Oke te in mes anpaisan ai naikan in anteni nan neno hitu in a'lon. 34Anbi neno hitu namsopu, Ana' fuat knino mes antae nafani anteni. Kalu in menas kan fenus fa ma bale nane onle kan tam anesi fa na'ko pasu anfun natef bale menas nane, atoni nane nalile ma naton nani nak in naknino ma mes anfasi in blua pake. 35Mes kalu leka naton nalali nak atoni nane naknino nalali mes in menas anfenus, 36Ana' fuat knino mes antae nafani anteni. Kalu menas nane namneo anfenus, ka nabe'i fa Ana' fuat knino antae anteni ai atoni nane in nakfunu ai in konon anfani molo, natuin namneo teb in namle'u kun. 37Mes kalu natuin tenab Ana' fuat knino atoni nane in menas kan fenus fa, ma in nakfunu anmoni ai in konon leko anbi bale nane, menas nane naleko nalali, ma Ana' fuat knino mes nalile ma naton neu atoni nane nak in naknino.
38Leka atoni mese ai bife mese anmu'i hune muti anbi in pasun, 39Ana' fuat knino mes antae atoni nane. Kalu hune-hune nane atkisot on muti namsab-sab, al mahatas natlak neu in, ma naton neune nak in naknino.
40-41Kalu atoni mese napeni hune anbi in kotin ai anbi in anakan antom mat, monas ai mois nane kan mo'e fa in anfani amle'ut. 42Mes kalu fu'un muti me' amtasa anpoi anbi bale monas ai mois nane, in namen men poko amle'ut. 43Ana' fuat knino mes antae atoni nane, ma kalu namneo anmu'i fu'un muti me' amtasa, 44Ana' fuat knino mes naton neune nak amle'ut kun natuin in namen men poko amle'ut anbi in anakan.
45Atoni mese le namen men poko amle'ut in mes anpake blua pake kloef ma nafetin in nakfunu ansisa'e. In mes antobe in human a pinan ma anhunun ma ankoa nak, “Amle'ut! Amle'ut!” 46Leka in fe namen menas nane in antam atoni amle'ut ma mes natua anbi um-ume in kotin na'lo na'ko atoni-atoni bian.
Lekat lulut antom sa' le anlapu'
47Kalu napenu anbi blua pake ai lipa na'ko manafu ai pilu muti le anlapu', 48ai anbi pasu ai sa' le anmo'e na'ko pasu, 49ma lapu' nane masan mate ai masan me' amtasa, lapu' nane humaf le anfenus ma mes nalile ma naton nani neu Ana' fuat knino. 50Ana' fuat knino mes antae blua nane, oke te anpaisan ai naikan nan neno hitu in a'lon. 51Anbi neno hitu namsopu in mes antae nafani anteni, ma kalu lapu' nane namneo anfenus a teb, blua nane amle'ut. 52Ana' fuat knino mes notu nani blua nane, natuin lapu' nane humaf le anfenus, es nane te mes nale'un nani neki ai.
53Mes kalu natuin Ana' fuat knino antae nak lapu' nane kan fenus fa anbi blua pake nane, 54in anlenu he nati' blua pake nane anfase nani ma anpaisan ai naikan nani nan neno hitu in alon. 55Oke te Ana' fuat knino mes antae nafani nani. Kalu lapu' nane kan fenus fa mes in masan nabala, blua pake nane fe amle'ut ma mes notu nani, maski lapu' nane napeni al anbi blua pake nane matan ai anbi in kotin. 56Mes kalu natuin Ana' fuat knino in antae lapu' nane in namle'u nalalien, pa' le anlapu' na'ko blua pake nane mes anpisu nani. 57Kalu namuni te lapu' nane anpoi anfani, nak lapu' nane anfenus, ma tuaf nane mes notu nani blua nane. 58Kalu leka anfase lapu' anbi blua pake nane ma namneku, onane te blua pake nane mes anfase anteni, oke te blua nane namneo in naknino kun.
59Onle nane lekat lulut neu amle'ut ai lapu' le napeni anbi blua pake ai lipa na'ko pilu muti ai manafu, ai anbi blua sa' le anmo'e na'ko pasu.
Currently Selected:
IMAMAT 13: AOZ
Highlight
Copy
Compare
Share
Want to have your highlights saved across all your devices? Sign up or sign in
