IMAMAT 12
12
Lekat lulut he naknino bife leka nahoni nalali
1 Uisneno anfe neu Nai Musa lekat lulut i 2neu nonot Israel. Leka bife mese in nahonis li'anmone, anbi neno hitu in a'lon bife nane nanuni ai nakae, onle tabu in nit funan. 3Anbi neno fanu namsopu in anah nane mes hen hapi ai hen heli. 4Namuni na'ko neno bo'tenu am tenu anteni bife nane fe nanuni ai nakae natuin fe napoitan na'. In ka nabe'i fa hen le'o blua-blua le anpake neu luli besa ma ka nabe'i fa hen tam neu Um-ume Uisneno talante neno in naknino'on nane namsopu.
5Leka bife mese in nahonis li'anbife, anbi neno bo'es am ha in a'lon bife nane nanuni ai nakae, onle tabu in nit funan. Namuni na'ko neno bo'ne am ne' anteni bife nane fe nanuni ai nakae natuin fe napoitan na'. 6Leka neno in naknino'on namsopu, leko natuin nahonis nalali li'anmone ai li'anbife nane mes neki tulu tnatas neu Ana' fuat knino anbi Um-ume Uisneno in eno matan. Tulu tnatas nane bibi kase ana' mese fe ton mese neu fua tulu mnotu, ma kol kase ana' mese ma kol otos ana' mese neu fua tulu sako sanat. 7Ana' fuat knino mes nana'at in tulu tnatas neu Uisneno ma anmo'e luli besa neu hen sako nuni ai kae nane, talante in anfani knino. Nane esle' bife mese hen mo'e nani leka in nahoni nalali.
8Leka bife nane kan mu'i fa he naloitan bibi kase ana' mese, in mes neki kol kase ana' nua ai kol otos ana' nua: es neu fua tulu mnotu ma es anteni neu fua tulu sako sanat. Ana' fuat knino mes anmo'e luli besa neu hen sako lasi nuni ai kae na'ko bife nane, onane te in anfani naknino.
Currently Selected:
IMAMAT 12: AOZ
Highlight
Copy
Compare
Share
Want to have your highlights saved across all your devices? Sign up or sign in
