IMAMAT 1
1
Fua tulu Mnotu
1Na'ko In Um-ume, Uisneno no'en Nai Musa ma anfe neune lekat lulut 2le mes atoni Israel he natuin nani.
Leka atoni mese natulu mu'it neu fua tulu mnotu neu Uisneno, in nabe'i natulu bijae, bibi kase ai bibi. 3Kalu le natulu nane bijae mese, mu'it nane mes he keso ma kan mu'i fa in amle'un. Bijae nane mes neki nani neu eno Um-ume Uisneno, he nati' Uisneno anlomi nan atoni nane. 4Oke te in mes antao in niman neu mu'it nane in anakan, ma in tulu tnatas nane of Uisneno ansimo nani neu hen sako in sanat. 5Oke te bijae nane mes anlolo nani anbi Um-ume nane in enon. Ale Ana' fuat knino sanut mofut Nai Harun mes natulu bijae nane in na' neu Uisneno, oke te anpofi baki tulu in kabenan ha sin anbi Um-ume in eno matan. 6Oke te atoni nane mes anpu' bijae nane in pasu ma anheli mu'it nane. 7Ale Ana' fuat knino mes napina ai anbi baki tulu in tunan oke te antao hau mnotu anbi in fafon. 8Ale sisi heli anfani tulu, nok bijae in anakan ma in balun amsa, sin mes antao nani anbi ai in fafon. 9Oke te atoni nane mes anboe bijae nane in taifen ma bijae nane in pusun, ma Ana' fuat knino le nanaoba mepu mes notu nani ok-oke. Fua tulu mnotu nane in fon anhalin Uisneno In nekan.
10Kalu le natulu nane bibi kase ai bibi, mu'it nane mes he keso ma kan mu'i fa in amle'un. 11Atoni nane mes anlolo mu'it nane anbi baki tulu in aon bian a'li, oke te ale Ana' fuat knino mes anpofin in na' neu baki tulu in kabenan ha sin. 12Leka anheli nalali mu'it nane, ale sisi le anheli nane, nokin anakan ma in balun amsa, Ana' fuat knino mes antao nani anbi ai in fafon anbi baki tulu. 13Oke te atoni nane mes anboe mu'it nane in taifen ma mu'it nane in pusun. Oke te Ana' fuat knino mes natulu nani ok-oke neu Uisneno, ma notu nani anbi baki tulu in tunan. Fua tulu mnotu nane in fon anhalin Uisneno In nekan.
14Kalu le natulu nane kolo mese, mes kol otos ai kol kase tipu mese. 15Ana' fuat knino mes neki kolo nane neu baki tulu, oke te an neok kolo nane in to'an ai in neon ma notu in anakan anbi baki tulu nane in tunan. Kolo nane in na' mes anlisin anpoi neu baki tulu nane in aon bian. 16Asa'kaen nok in nesan ok-oke mes napoitan sin, oke te anpolin sin anbi baki tulu in aon neno saen afu balan. 17Oke te mes anpisu kolo nane anbi ninen un, mes in ninen ka nabe'i fa he natfek. Oke te kolo nane mes antunu nani anbi baki tulu in tunan. Fua tulu mnotu nane in fon anhalin Uisneno In nekan.
Currently Selected:
IMAMAT 1: AOZ
Highlight
Copy
Compare
Share
Want to have your highlights saved across all your devices? Sign up or sign in
