KELUARAN 40
40
Nahakeb Um-ume Uisneno ma naknino nani neu Uisneno
1 Uisneno nakua a'an neu Nai Musa nak, 2“Muhakeb Au Um-ume anbi fun mese antam neno mese. 3Mutam Peti Fef Bela le matua nok Plenat Bo'mese neu in nanan ma amtao pilu kubat anbi in matan. 4Amtao mei nok in paken. Mutam tet paku amsa ma motu in paku sin. 5Amtao baki tulu mnatu bale mnotu atu fomeni anbi Peti Fef Bela matan ma muboni eka anbi Um-ume in enon. 6Amtao mani baki tulu fua mnotu anbi Um-ume in eno matan. 7Amtao tasu oe anbi Um-ume ma baki tulu le nane sin atnanan ma amtao oe neune. 8Nalali te amhel pilu anfun natef Um-ume in po'an ma muboni po'an in pilu eka naek.
9Nalali te Um-ume nok in blua en so ho mutulu mani neu Kau nok lanan amnose mina buat neune, nok lanan nane hom beti ale sa'-sa' neu Kau. 10Mutulu baki tulu nane nok in blua in neu Kau ma anmo'e onan amsa he nati' hi miknino sin neu Kau. 11Anmo'e onan amsa neu tasu oe ma in sukit.
12Nalali te amlenu Nai Harun ma in anah sin nem neu Um-ume in enon ma anboe sin aon. 13Mipakeb Nai Harun pake Ana' fuat knino ma miknino in meki mina ma ambeti in he nati' antuthae Kau anfani Ana' fuat knino. 14Ma amlenu in anah sin anhaumakan ma antao sin sobalu. 15Ma amtao neu sin mina onle ho mo'e neu sin amaf he nati' sin amsa antuthae Kau on Ana' fuat knino. Nok buat le nane sin uf na'ko batan nao neu batan of anfani Ana' fuat knino.”
16Nai Musa anmo'e nani ale lasi nane onle Uisneno naplenat nani neune. 17Es nane te anbi fun mese antam neno mese anbi ton nua in nanan leka atoni Israel nasaitan nalali Mesir. Sin nahakeb Um-ume Uisneno nane. 18Nai Musa antao in sukit sin, nahakeb in haunu, antao in kbat sin ma namepan in ni sin. 19Oke te sin anhel Um-ume in oben ma sin antao obet aon bian kotin in fafon onle Uisneno naplenat nani. 20Nalali te sin natam fatu nua en nane neu Peti Fef Bela in nanan nalali te Nai Musa antao Peti nane, ma natam hau lo'i sin neu niti sin nanan. 21Ma in natam Peti nane neu Um-ume nane ma naboni pilu kubat anbi in matan onle Uisneno naplenat nalali neune.
22Nalali te Nai Musa antao mei anbi Um-ume in nanan anbi kabenan ne'u le pilu in kotin, 23oke te in antao nani bukae utunu' onle Uisneno naplenat nani neu Nai Musa anbi mei in tunan. 24In antao tet paku anbi Um-ume in nanan, anbi in kabenan li ma anbaina nok mei nane, 25oke te napina paku-paku nane anbi Uisneno in matan. 26Baki tulu mnotu nane antao anbi Um-ume in nanan anbi pilu in matan, 27ma notu atu fomeni onle Uisneno naplenat nalali neu Nai Musa. 28Nai Musa naboni Um-ume in pilu eka naek, 29ma anbi eno in matan nane in antao baki tulu fua mnotu. Anbi baki tulu nane in tunan in natulu fua mnotu ma fua bukae. 30Tasu nit molo nane in antao anbi Um-ume ma baki tulu atnanan, oke te antao oe neune. 31Nai Musa, Nai Harun ma in anah sin nafanu sin niman ma anboe sin haen anbi nane, 32leka sin hen tam neu Um-ume Uisneno in nanan ai anhaumak baki tulu. 33Nai Musa anhel pilu anfun natef Um-ume ma baki tulu ma naboni pilu eka neu po'an in eno naek. Nok nane te ale mepu in nasopu nani.
Nope an amu nan Um-ume Uisneno
(Bil. 9:15-23)
34Nalali te nope ansanu ma an amu nan Um-ume Uisneno, ma Um-ume nane nahenu nok Uisneno In apinat. 35Es nane te Nai Musa kan tam fa neu Um-ume nane in nanan. 36Leka nope nane ansae anfani na'ko Um-ume Uisneno, to Israel anpukai sin um-ume ma natnani neu bale bian anteni. 37Mes kalu nope nane kan sae fa sin kan poi fa he nao na'ko bale nane. 38Anbi leku to Israel sin fe naoinsok, Uisneno nabala anbi Um-ume nane la namasbon on nope anbi ne-neno ma namasbon on ai anbi fa-fai.
Currently Selected:
KELUARAN 40: AOZ
Highlight
Copy
Compare
Share
Want to have your highlights saved across all your devices? Sign up or sign in
