YOEL 3
3
Uisneno of anlefi uf-uf sin lasi
1 Uisneno nakua a'an nak, “Anbi tabu nane of Au beti ani athoes neu Yerusalem ma Yehuda. 2Ale uf of Au nibun ma Au eki sin neu Nonof Lef lasi. Anbi nane of Au lefi sin lasi maufinu neu Au to natuin sin anbeti nalali pah Israel ma sin anpolin Au to neu pah bian. 3Of sin nosun sulat neu sekau es of napeni atoni po'an sin. Sin nasosa munif atoni ma bife he nabaina sin anfani ate. Ma in noni nane sin anpake neu lasi mapaisa ma neu lasi he ninu tua min kase. 4Hi he mo'e kau onme ka, hoi Tirus, Sidon ma pah Filistin anfun natef? Ai hi mimnau kot neu him seunbanin nek nanan neu Kau? Es nanet amsimo nai Au seunbanin lab-labah. 5Hi misik milali noni muti ma mnatu ma Au maus le maupa hi mitam mani neu hi bale luli besa. 6Atokos anbi Yehuda ma Yerusalem hi meki sin na'lo na'ko sin pah; nalali te hi misosa sin neu pah Yunani. 7Tabu le i Au upoitan sin na'ko bale-bale le hi misosa sin anbine ma of Au seunbanin hi maufinu neu sin. 8Hi anmone ma anfeto of Au u'sosa ani sin neu amaika anbi Yehuda, ma of sin na'sosa anteni sin neu Syeba, pah le na'lo. Au Uisneno es umolok ulali onane.
9Ambokan beno le i neu ale uf-uf: Miloitan nai he maken ma amaban! Amnibun ale meo besi ma meo pa'e; mibuab ale solalus! 10Amtutu he besi foi nane anfani suni, ma ho besi lefi nane blua he mupau. Ma neu atoni a'olet so in namolok nak, ‘Au of a'maken onle solalus amsa!’ 11Es nanet aim labah nai, hoi ale uf-uf na'ko neno kabenan sin! Mibuaom nai anbi nonof le nane.”
Koi Uisneno amlenu nai ale Ho solalus hen maken nok sin.
12 Uisneno nakua a'an anteni nak, “Ale uf-uf so naloitan ma sin nao neu Nonof Lef Lasi. Anbi nane Au Uisneno of Au lefi lasi neu ale uf-uf le namaika anhaumak Au to. 13Sin anmaufinu; es nanet mibenat sin onle ane kase amnatus anbi lene. Muhapun sin onle tua min kase anbi nabit le nahenu ma nat'op. 14Atoni nifun-nifun anbi Nonof Lef Lasi. Natuin anbi nane Neno Uisneno In tabu of nanokbon. 15Manas ma funan of namesok, ma afkun sin of ka naton anteni fa sin pinan.”
Uisneno of anfe In athoen neno neu In to
16 Uisneno nakua a'an neu Sion, In tubu;
In hanan nane na'lu' na'ko Yerusalem.
Neno tunan ma pah pinan anainun natuin In.
Mes Uisneno of anpesi nok
ma anpanat Israel, In to.
17“Hoi Israel, tabu le i of ho muhin,
mak Au le i ho Uisneno,
Au umaika anbi Sion, Au tubu knino.
Es nanet Yerusalem of anfani kot le aknino amsa,
atoni anao amnemat of kan tam fa neune.
18Anbi tabu le nane tubu-tubu of nahenu nok lene tua min kase.
Au mu'it sin of neku hun anbi tubu-tubu le maafa.
Noe-noe anbi Yehuda
in oe of kan meti nit fa.
Noe mese of ansai na'ko Ume Uisneno,
ma napete Nonof Akasia neki oe le oe tene.
19Mesir of anfani mnela le anmeto,
ma Edom nane of luman ma kan mu'i fa atoni le namaika anbine.
Natuin sin anken nalali atoni Yehuda,
ma namate atokos le ka nasanab fa anbi pah nane.
20-22Of Au toti seunbanin neu sin na',
ma of Au utselab ani atoni le namate sin.
Mes Yehuda ma Yerusalem of anmu'i amaika piut,
ma of Au umaika ubalah anbi Tubu Sion.”
Currently Selected:
YOEL 3: AOZ
Highlight
Copy
Compare
Share
Want to have your highlights saved across all your devices? Sign up or sign in
