YOEL 2

Lasi mnaut neu Neno Uisneno In of natiabon

1Ampu to'is, ma mihanab takaf amnaut

anbi Tubu Sion le aknino, Uisneno In bale.

Amlilitai nai, hoi ale amaika anbi Yehuda!

Natuin Neno Uisneno In tabu anhaumak ma of anbol lab-lab.

2Neno nane metan ma names'ok,

nahenu nope ma nipu.

Lamat onle meo pukan anteli nem

onle nope anamunan tubu.

Lasi onle nane kan mu'i nit fa,

ma of kan bol anteni fa talantia nabal-bal.

3Onle ai le notu ma anputu,

sin nale'un ale hau sena onane.

Anbi ahun-hunut pah le i onle Eden, etu Uisneno,

mes anbi amsopun onle mnela snaen le anmonas.

Kan mu'i fa esle' nabalah,

kan mu'i fa esle' nafetnon na'ko sin.

4Sin human onle bikase,

sin naenan onle bikase hopu.

5Sin elen anbi tubu in tunan,

onle aklet ma benat a'kilon,

ma onle ai le notu ane ta'u.

Sin makatuin onle pukan meo abe'it,

le naloitan ma antam neu bale makenat.

6Anbi tabu makenat anbol, onle atoni na'tai',

ma ale sin human anmutik ma anmofu.

7Sin anmaken onle meo pa'e ma ansae

natuin baki lape onle abe'ut anbi makenat.

Sin maakatuin amneo neu matan

ma ka nok fa penu ai nabain'on fa.

8Sin kan mabe'un fa mes es-es,

nao natuin kun in lanan.

Sin alsin nao ma naskuku ale kot,

ma kan mu'i fa es he nas-nasab sin.

9Sin anbe'u ale kot-kot,

ma naen antom in baki lape in tunan.

Sin ansae ma antam neu ale ume-ume,

ma antam natuin eno ana onle abakat.

10Leka sin anao mat pah pinan na'tai'

ma neno anlilitai.

Es nane te manas ma funan names'ok,

ma ale afkun in pinan namneku.

11 Uisneno In hanan onle lotos na'lu'

ma anfe hanaf neu ale meo

pa'e amakenat in solalus sin nane namfau!

Solalus le nanaob in aplenat nane abe'it kun!

Namneo amkakat kun,

ma Neno Uisneno nane matani kun!

Kan mu'i fa es hen hake na'ki anbine.

Etus tonas he naloitan monit

12 Uisneno nakua a'an nak, “Mes tabu le i,

amli' ma mo'e baniom meu Kau meki hi nekam oke,

ma minahom, amkul ma amkae nai.

13Muskuku ho nekam ma kais ho bale pake.”

Amli' ma mo'e baniom neu ho Uisneno.

In nek meunuan ma nek mamun,

In nek mahoe ma nahenu nok manekat.

In anlomi ansako sanat ma kan lomi

fa he nanaoba kasat.

14Oni ai ho Uisneno nane of nabaina In salit,

ma of anfe ki In athoen neno nok athoes.

Talantia nabe'i he mitulu fuat tua min kase

ma ane kase neu Uisneno, le hi Uisneno.

15Ampu to'is nai anbi Tubu Sion, Tubu Uisneno,

amkakan nai neno hi minahom,

ma mo'e nai buat-buat anaet.

16Mibuab ale to,

ma amnibun ale to pukan-pukan.

Amlenu ale mnasi nem,

ale li'ana ma ale li'ansusu sin amsa.

Ma ale akabin fe'u nem nok amsa.

Amlenu sin he nasaitan sin ke'an.

17Amlenu ale ana' fuat sin antuthae Uisneno,

ma amkul ma amkae anbi baki fuat ma po'an abit matan sin atnanan,

ma namolok nak, “Amnek Ho to kai koi Uisneno,

kais mufetin Ho ini he namle'u,”

talantia ale uf-uf bian naslaet ma namolok nak,

“Sin Uisneno nane esme ka?”

Uisneno napokab nafani afu

18Es nane te Uisneno anpanat In afu,

ma In nek nani In to.

19In natae sin nak on i,

“Tabu le i Au fe neu ki:

ane kase, tua min kase, ma min fomeni saitun he hi miah,

he nati' hi alki mimsen.

Of Au ka ufetin ki fa he nati' nakle'ut ki

ai uf-uf anmanis ki.

20Meo pukan lamat na'ko neno kaben ne'u of Au li'u ani,

bian of Au li'u ani neu mnela snaen.

Lolok abit matan of Au tite neu Tasi Maten

ma lolok amunit of Au tite neu Tasi Tnanan.

In nuif sin of nafo,

of Au umate sin natuin sin anhamu'i ki.

21Kais mimtau, hoi lene-lene, amhalin ho nekam;

mumnau lasi naek le Uisneno anmepu nani neu ko!

22Hoi ale mu'it, kais mioelbom.

Ale mnela nahenu nok hun le no mate.

Ale hau-hau nafua nok alekot,

tua min kase in fuan nok bubuk in fuan nane nathoe.

23Hoi to abit Sion, mimlil nai!

Mimlil ma mi'ba' nai!

Natuin ale alekot na'ko ho Uisneno.

Anbi tabu oe tene In nasanut ulan,

ma tuna anbo anbi in tabu on afi ahunut.

24Es nanet pana of nahenu anfani neki ane kase,

tua min kase ma mina fomeni saitun of ansai anbi bale nabit.

25Of Au seka ufani ho mnekut

anbi ton-ton lamat nah nani ho hau sena in fuan.

Natuin Au es asonu ani pukan lamat nane neu ko.

26Of hi miah nok athoes talantia hi mimsen,

of hi minaeb hi Uisneno,

natuin In anmo'e lasi amkakat namfau neu ki.

Au to nane of ka napeni anteni fa kle'at!

27Es nane te Israel, of hi mihin mak Au, ok ki anbi hi atnanam,

ma Au Uisneno, fani ho Uisneno.

Kau mu'i anteni fa Uisneno alkun Au.

Au to nane of ka nanaobon fa anteni.”

Uisneno In neno

28“Nalali onane te of Au usanut Au Smanan Knino neu ale atoni.

Es nanet ho anfeto ma ho anmone sin of nabeno Au han manta'en sin;

ale mnasi-mnasi anbi ho atnanam of napeni nanait

ma of Au fe ani mnitas neu atoni ma bife munif.

29Anbi tabu le nane amsa of Au usanut Au Smanan Knino amsa

neu atuthaes sin atoni ma bife.”

30Of Au mo'e lasi amkakat namfau anbi neno tunan ma pah pinan. Of anmu'i maopan na', ai pina ma masu naek. 31Manas of namesok' ma funan of amtasa onle na'. Ale lasi nane of anbol nahun na'ko Neno Uisneno nane anbol, neno le neki amtaus ma hakataus! 32Mes neu sekau le antoti tuntakus na'ko Uisneno, in of napeni honis. Uisneno nakua a'an nak, “Anbi Yerusalem atoni-atoni le Au beti sin of napeni honis.”

Currently Selected:

YOEL 2: AOZ

Highlight

Copy

Compare