AMOS 1
1
1Nai Amos nane atoni atuku bibi kase mese na'ko kot Tekoa. In anfani Mafefa knino anbi tabu Kesel Nai Uzia naplenat pah Yehuda, ma Kesel Nai Yerobeam Nai Yoahas in anmone naplenat Israel. Ton nua nahun na'ko nainunus anbol, Uisneno naton lasi-lasi le of anbolan Israel neu Amos.
2Le i Nai Amos in molok,
“Uisneno nakua a'an na'ko Tubu Sion,
In hanan nane onle lotos na'ko Yerusalem.
Mnela-mnela le nahenu nok hun of mois,
ma hun anbi Tubu Karmel of anmeto.”
Kasat Uisneno neu pah-pah le anhaumak nok nok Israel
Siria
3 Uisneno nakua a'an nak, “Amaika abit Damsyik nasanab nalali tenim-teni, es nane te namneo of Au kas sin. Sin anbulalun atoni-atoni Gilead nok matani, 4es nane te of Au usanut ai neu Kesel Nai Hazael in sonaf, ma notu nani Kesel Nai Benhadad in kot-kot sin. 5Eno-eno naek Damsyik of Au ule'un ani sin ma amaika anbi Nonof Awen of Au li'u uaenab sin na'ko sin bale maika. Ana' Aplenat Bet-Eden of Au usanut sin na'ko sin a'toko, ma amaika abit Siria of Au heke sin ma polin sin neu pah Kir.”
Filistin
6 Uisneno nakua a'an nak, “Amaika abit Gaza nasanab tenim-teni, es nane te namneo of Au kas sin. Sin naiti nalali tuaf pah mese noba tem-temen ma nasosa anfani ate neu atoni Edom. 7Es nane te of Au usanut ai neu baki lape Gaza, ma otu ani sin kot sin. 8Amaika ma ana' aplenat kot Asdod ma Askelon of Au u'loba ani sin. Kot Ekron of Au kas sin, ma atoni Filistin of Au ule'un ani sin.”
Tirus
9 Uisneno nakua a'an nak, “Amaika abit Tirus nasanab-nalali tenim-teni, es nane te namneo of Au kas sin. Sin naiti nalali tuaf pah mese noba tem-temen ma neki sin neu bale polin, ma nana'at nani sin neu Edom; sin an ele ma antanhai nalali fef bela matalus. 10Es nane te of Au usanut ai neu baki lape Tirus ma otu ani sin kot sin.”
Edom
11 Uisneno nakua a'an nak, “Amaika abit Edom nasanab nalali tenim-teni, es nane te namneo of Au kas sin. Sin anmaken nalali nok sin benuf sin atoni-atoni Israel ka nok fa nek manekat, sin nato' piut ma anmanek nanan piut. 12Es nane te of Au usanut ai nem neu kot Teman, ma otu ani baki lape Bozra.”
Amon
13 Uisneno nakua a'an nak, “Uf Amon nasanab nalali tenim-teni, es nane te namneo of Au kas sin. Leka anbi makenat Au henua sin pah, mes sin nape'at bife-bife ma'apu anbi Gilead. 14Es nane te of Au usanut ai neu baki lape kot Raba, ma otu ani sin kot sin. Anbi tabu nane makenat of anbol ma makenat nane anao mat onle nautus. 15Sin Kesel ma sin ana' aplenat sin of neki sin neu pah mapolin. Au, Uisneno, es ukua ulali Au a'ak onane.”
Currently Selected:
AMOS 1: AOZ
Highlight
Copy
Compare
Share
Want to have your highlights saved across all your devices? Sign up or sign in
