YOEL 1
1
1Le i han ba'an Uisneno neu Nai Yoel, Nai Petuel in anah.
To Israel sin nekan antu' natuin lamat nah nani lene in nesan
2Amnen hoi ale mnasi-mnasi;
ampanat nai, ale atoni anbi Yehuda.
Lasi onle i anbol kan bi hi tabu monit,
ai anbi hi be'i hi na'i sin monin?
3Amkakan lasi le i neu hi anhenu,
he nati' sin natiab anteni pi'ot le i neu sin anhenu.
Hi sufam so sin nen nani amsa,
ma nanaob nani anteni neu sin sufan ma sin ka'un.
4Pukan lamat le in ani ka maso'ik fa antok
anbi lene-lene ma nah nani lene in nesan.
So le lamat le i nami
lamat bian of nah nani anteni.
5Hoi ale amafu tua sin, amfen nai!
Hoi ale amninu tua sin, so him kae nai!
Natuin tua min kase fe'u
nane nasik nani na'ko hi fefam!
6Pukan lamat nane antoman hit pah,
sin abe'it kun ma sin amfaun kat so'i fa,
in nisin nane naaik onle meo asu ainaf in konin.
7Sin nale'un hit tua min kase in ta'un,
ma hit hau bubuk in tukluan.
Sin nanisi in po'an,
talantia in tlaen sin nane muti.
8Amkae nai hoi ale to, onle fenai akulut
le ankae natuin naimone le in anah nane anmate.
9Ane kase ma tua min kase nane namneku nalali
na'ko Ume Uisneno.
Es nanet ale Ana' fuat knino
le na'kian tuthaes neu Uisneno nane sin ankulun.
10Tabu le i ale lene luman,
es nanet afu ankul nok,
natuin ane kase nane amsa namneuk,
ma ale tua min kase amneot,
ma min fomeni saitun nane namneuk.
11Hoi ale atof lene, amkae nai!
Hoi ale amafu tua min kase amkul nai!
Natuin ane kase, sai me' ma ale luat namle'u.
12Ale hau mafua anbi lene-lene alsin anmeto:
leko tua min kase, koi kase, bub kase, pet kase ma lin kase.
Es nanet to ka namlil anteni fa.
13Hoi ale Ana' fuat knino le antuthae anbi baki fuat,
ampake kalo nai ma amkae nai.
Amtam nai meu Ume Uisneno hem kae ma amkul fai teme mese,
natuin kan mu'i fa fuat tua min kase ma ane kase anteni neu Uisneno.
14Muplenat ho to he nati' nanahok,
anmo'e nai ekut buat le anaek!
Amhone ale atopus ma ale mnasi
ma ale atokos Yehuda,
he nati' nem neu Ume Uisneno,
he nati' amsakoi ma amtoti tuntakus ma babat na'kone.
15Neno Uisneno In anhaumak nalali, neno le neki hakataus;
tabu Akuasat Afin-finit nasanut snama amle'ut.
16Ale mnahat namneku ankon kun
na'ko hit matak,
ma anbi hit Uisneno In Ume
kan mu'i anteni fa a'baf malinat.
17Fini anmate anbi afu skuku.
Kan mu'i anteni fa ane kase le mabela,
es nanet lopo-lopo nane luman ma anfani baki atkua.
18Ale mu'it sin anbai ma nas'unu,
kan mu'i anteni fa mnela hun neune.
Pukan bib kase amsa anbel.
19Au toti babat ma tuntakus neu Ko, koi Uisneno,
natuin ale hun anmeto
ma anmoi, ale hau anmeto
onle ai es notu nani.
20Ma ale mu'i fui anbi nasi
ansakoi neu Ko ma antoti babat.
Sin ka naleko fa sin meno,
natuin ale noe anmeti.
Currently Selected:
YOEL 1: AOZ
Highlight
Copy
Compare
Share
Want to have your highlights saved across all your devices? Sign up or sign in
