KELUARAN 8
8
Snama Be'o
1Oke te Uisneno nakua a'an neu Nai Musa nak, “Amnao nai ma amhake anbi kesel in matan ma mutiaba neune Au han ba'an i: ‘Mufetin Au to he sin nao he naluli nabes neu Kau. 2Kalu hom tite, pah le i of Au uhenu ani nok ale be'o anfani kasat. 3Noe Nil of nahenu nok ale be'o, ma mu'it-mu'it nane of anpoi na'ko oe in nanan ma antam neu ho sonaf, neu ho ke'an le hom tup ambine in nanan ma ho hala tupa, neu ale anaet ma to ana sin ume, ma neu ale bale tun utunu' ma ale nai. 4Be'o-be'o nane of an ele ma ansae neu ko, ale anaet ma to.’ ”
5 Uisneno nakua a'an neu Nai Musa nak, “Amlenu Nai Harun hen lulun in tias neu noe-noe sin fafon, ale lolok ma ale nifu ne nati' ale be'o anpoi ma nahenu pah Mesir.” 6Ma Nai Harun anlulun in tias neu ale oe sin fafon, oke te ale be'o anpoi ma nahenu pah le nane. 7Mes ale mnane nane sin anmo'e onane amsa, ma ale be'o anpoi anbi pah le nane.
8Kesel no'en Nai Musa ma Nai Harun, ma nak, “Amonen nai neu Uisneno he nati' In naneku be'o-be'o le i, ma of au ufetin ho to sin nao he natulu fua tulu Uisneno.”
9Nai Musa natae nak, “Nok malinat of au una'at ko anbi onen Usif. Amlek mani in tabu, he nati' au una'at ko Usif anbi onen, ale anaet ma to. Ma of nafetin ko na'ko be'o-be'o nane, ma na'lob sin na'ko ko Usif, sin al anbi Noe Nil.”
10Kesel natae nak, “Amonen neu kau anbi neno noka.”
Nai Musa nak, “Of Au unaoba sa' le hom toti Usif. Of au Usif ho muhin nak kan mu'i anteni fa Uisneno bian onle Uisneno, hai Uisneno. 11In of nafetin ko Usif, ale anaet ma to na'ko be'o-be'o nane. Of kan mu'i fa be'o anbi ume-ume, so alkun anbi Noe Nil.” 12Oke te Nai Musa ma Nai Harun sin nasaitan kesel. Nalali te Nai Musa in onen neu Uisneno he nati' naskotun be'o-be'o le In anfe nem neu kesel. 13Uisneno ansimo Nai Musa in onen totis, ma be'o-be'o le anbi ume-ume, anbi ume enon ma lene-lene anmate ok-oke. 14Atoni-atoni Mesir sin nibun be'o-be'o nane sin nuif antia na'lat, talante pah nane nahenu nok fof ma punu. 15Leka kesel ankiso nak ale be'o-be'o nane anmate nalali, in namanub in nekan. Ma onle Uisneno naton nalali nak of in kan lomi fa he nen ma natnin Nai Musa ma Nai Harun sin molok.
Snama basin
16 Uisneno nakua a'an neu Nai Musa nak, “Amlenu Nai Harun antepo nain neki in tias, ma afu anbi pah Mesir le i anfun natef of nabaina anfani basin.” 17Oke te Nai Harun antepon in tias neu afu, ma ale afu anbi pah Mesir nane nabaina anfani basin le antai mansian ma mu'it. 18Ale mnane sin anpake sin hinen ma sin ela he basin anpoi onan amsa, mes sin ka nabe'i fa. Basin anpoi anbi me-me, 19talante ale mnane nane namolok neu kesel nak, “Le i Uisneno es anmo'e nani.” Mes kesel namanub in nekan, ma onle Uisneno naton nalali nak, kesel nane of ka nen ma natnin fa Nai Musa ma Nai Harun.
Snama akbeo
20 Uisneno nakua a'an neu Nai Musa nak, “Amnao nai anbi nok-noka mueku mok kesel anbi tabu in ansanu neu noe, ma mutiaba Au molok i neu in: ‘Mufetin Au to he sin nao he naluli nabes neu Kau. 21Leka hom tite, of Au usanut akbeo neu ko, neu ho anaet sin ma ho to sin. Atoni Mesir sin ume ma pah le i anfun natef of nahenu nok akbeo. 22Mes of Au ka usanut fa neu Gosyen, bale Au to namaika anbine. Of kan mu'i fa akbeo anbi nane, he nati' hi mihin nak Au, Uisneno, es anmo'e lasi nane. 23Of Au banaika Au to nok ho to. Lasi amkakat nane of anbol anbi neno noka.’ ” 24Uisneno nasanut akbeo namfau neu kesel in sonaf ma ale anaet sin ume. To anbi pah Mesir anfun natef sin nasusbok natuin akbeo-akbeo nane.
25Nalali te kesel no'en Nai Musa ma Nai Harun oke te in nak, “Amnao nai he mutulu fua tulu neu ho Uisneno, mes anbi pah le i in nanan.”
26“So leko kaisa,” Nai Musa natae onane, “natuin atoni Mesir sin nekan mes namen leka sin nit hai tulu' nane, ma namneo sin of anpoli kai neki fatu talantia hai mate. 27Hai mes hem nao neu mnela hufui le in a'lon atnao anbi neno tenu in nanan he mitulu fua tulu neu Uisneno, hai Uisneno, onle in naplenat nalali neu kai.”
28Kesel nak, “Leko, au ufetin ki he him nao neu mnela hufui he mitulu fua tulu neu Uisneno, hi Uisneno, al kais him nao mi'lo. Mimnau, amonen neu kau!”
29Nai Musa natae nak, “Leka au nao ulali, nok manoe of au onen neu Uisneno he nati' anbi neno noka akbeo-akbeo le i nasaitan ko Usif, ale anaet ma to. Mes kais hom fuli amteni kai, ma kais am eka to Israel he nao natulu fua tulu neu Uisneno.”
30Nai Musa nasaitan kesel, oke in onen neu Uisneno, 31ma Uisneno ansimo Nai Musa in onen totis. Akbeo-akbeo nane natpen ma nasaitan kesel, ale anaet ma to. Ma kan mu'i fa esle' he nabala amsa. 32Mes haefes le i amsa kesel namanub in nekan ma ka nafetin fa to le nane he sin nao.
Currently Selected:
KELUARAN 8: AOZ
Highlight
Copy
Compare
Share
Want to have your highlights saved across all your devices? Sign up or sign in
