KELUARAN 7
7
1 Uisneno nakua a'an neu Nai Musa nak, “Of Au mo'e ko amfani on Uisneno anbi kesel in matan, ma ho biaf Nai Harun of namolok neune on ho mafefa knino. 2Mutiaba neu Nai Harun ale sa' le Au uplenat neu ko. Amlenu Nai Harun he naton neu kesel nak so mes nati' in nafetin atoni Israel he nasaitan pah Mesir. 3Mes of Au umanub kesel in nekan. In of ka nen ko fa, maski nak Au usanut snama namfau anbi Mesir. 4Es nane te of Au kas Mesir nok kasat le mafena, nalali te of Au eki to Israel ok-oke, Au to, anpoi na'ko pah nane. 5Es nane te atoni Mesir of sin nahin nak Au le i Uisneno kau, anbi tabu Au kas sin ma Au eki Israel anpoi na'ko sin pah.” 6Nai Musa ma Nai Harun nanaoba sa' le Uisneno naplenat nalali. 7Nai Musa in nom ton bo fanu ma Nai Harun in nan ton bo fanum tenu leka sin nao ma anhake anbi Kesel Mesir in matan.
Nai Harun in tias
8 Uisneno nakua a'an neu Nai Musa ma Nai Harun nak, 9“Kalu kesel antoti ki he mo'e lasi amkakat anfani on taka', amlenu Nai Harun he naiti in tias ma anpolin neu nain anbi kesel in matan. Tias nane of nabaina anfani kauna.” 10Es nane te Nai Musa ma Nai Harun sin nao ma anhake anbi kesel in matan ma sin anmo'e sa' le Uisneno naplenat nalali neu sin. Nai Harun anpolin in tias neu nain anbi kesel in matan ma ale in ameput sin matan, oke te tias nane nabaina anfani kauna. 11Natuin lasi nane kesel no'en in atoni ahinet sin ma mnane sin, oke te sin anmo'e onane amsa nok sin hine ma sin ela. 12Sin anpolin sin tias neu nain ma sin tias-tias nane anfani kauna. Mes Nai Harun in tias an olo nan sin tias sin. 13Maski onane amsa, kesel in namanub in nekan nabala ma in kan lomi fa he nen Nai Musa ma Nai Harun sin molok, onle Uisneno naton nalali neu sin.
Pah Mesir napani snama
Oe nabaina anfani na'
14Nalali te Uisneno nakua a'an neu Nai Musa nak, “Kesel nane namanub in nekan nae le'uf kun; in kan lomi fa he nafetin to Israel he sin nao. 15Es nane te amnao nai ma mieku mok in anbi nok-nok ana, anbi tabu in ansanu neu Noe Nil. Meki tias le nabaina anfani kauna nane ma ampao in anbi noe in ninen. 16Mutonan kesel nane mak: Uisneno, atoni Ibrani sin Uisneno, anlenu kau he uton ko Usif he mufetin In to he sin nao he nati' naluli ma nabes neu In anbi mnela hufui. Mes antia leku le i au Usif ho kam lomi fa hem nen. 17Es nane te Uisneno nakua a'an nak on i, ‘Na'ko sa' le of In anmo'e, ho of muhin mak Au le i Uisneno kau. Of au tepo oe anbi noe eki tias le i, ma in oe of nabaina anfani na'. 18Ika-ika of anmate, ma oe le i of nafo, talante to Mesir of ka ninu fa.’ ”
19 Uisneno nakua a'an neu Nai Musa nak, “Amlenu Nai Harun naiti in tias ma anlulun neu ale noe in fafon, lolok-lolok ma ale nifu anbi Mesir. In oe of anfani na', ma pah le i anfun natef of anfani na', leko anbi ale ton na'ko hau ma kuis fatu.”
20Nai Musa ma Nai Harun nanaoba sa' le Uisneno naplenat nani. Anbi kesel ma ale in ameput sin matan, Nai Harun naiti in tias ma antepo oe anbi Noe Nil, ma in oe nabaina anfani na'. 21Ika-ika le anbi noe nane in nanan anmate, ma in nafo nae le'uf, talante atoni Mesir ka ninu fa oe nane. Anbi pah Mesir anfun natef anmu'i na'. 22Mes ale mnane Mesir sin anmo'e onane amsa neki sin mahine mnane, talante kesel in nekan namanu nabala. Onle Uisneno naton nalali, kesel of ka nen fa Nai Musa ma Nai Harun. 23Mes in anao anfani neu sonaf ma in kan filoli fa lasi nane kle'o amsa. 24Ale atoni Mesir anhani bola' anbi noe ninen he nami oe mninu, natuin oe noe nane ka nabe'i fa he mninu.
25Neno hitu anfin nalali onane Uisneno ankas Noe Nil.
Currently Selected:
KELUARAN 7: AOZ
Highlight
Copy
Compare
Share
Want to have your highlights saved across all your devices? Sign up or sign in
