KELUARAN 9
9
Ale mu'it anmate
1 Uisneno nakua a'an neu Nai Musa nak, “Amnao nai ma amhake ambi kesel in matan ma muton neu in mak Uisneno, atoni Ibrani sin Uisneno, nakua a'an nak: ‘Mufetin Au to he sin nao he nati' sin naluli nabes neu Kau. 2Kalu ho kam lomi fa he mufetin sin, 3Au of usanut snama anaek neu ale ho mu'it, bikase, bikase luke mnanu, bikase paha snaen, bijae, bibi kase ma ho bibi sin. 4Au of banaika atoni Israel sin mu'it ma atoni Mesir sin mu'it. Na'ko atoni Israel sin mu'it of kan mu'i fa esle' hen mate. 5Au, Uisneno kau, Au lek ulali neno noka he unaoba ani lasi nane.’ ”
6Anbi nokfa fe nok-noka Uisneno anmone onle In namolok nalali. Ale mu'it atoni Mesir anmate ok-oke, mes na'ko atoni Israel sin mu'it kan mu'i fa esle' hen mate. 7Kesel natoti neu sa' es anbol nalali, oke te natonan in nak na'ko atoni Israel sin mu'it kan mu'i fa esle' hen mate. Mes kesel namanub in nekan ma in kan lomi fa he nafetin to nane he sin anao.
Men bisu
8 Uisneno nakua a'an neu Nai Musa ma Nai Harun nak, “Maiti afu poho fauk na'ko bale hanat. Anbi kesel in matan, Nai Musa mes amkifun afu nane neu neno atnanan. 9Ma afu nane of nasitbon anfun natef pah Mesir. Afu nane of napoitan bisu-bisu le anpe' ma anfani papa' le naoe anbi mansian ma mu'it sin aon.” 10Oke te Nai Musa ma Nai Harun sin naiti afu, ma sin anao ma anhake anbi kesel in matan. Nai Musa ankifun afu nane neu neno atnanan.
11Bisu anpoi anbi mansian ma mu'it anpe' ma anfani papa' le naoe. Ale mnane kan hake nabe'i fa anbi Nai Musa in matan natuin sin aon nahenu nok bisu onle atoni-atoni Mesir bian. 12Mes Uisneno namanub kesel in nekan, ma onle Uisneno namolok nalali, kesel nane kan lomi fa he nen ma natnin Nai Musa ma Nai Harun sin molok.
Sen-sene ai ul fatu
13 Uisneno nakua a'an neu Nai Musa nak, “Amnao nai neu kesel in matan anbi fe nok-noka ma mutonan in mak Uisneno, atoni Ibrani sin Uisneno nak: ‘Mufetin Au to he nati' sin anao ma naluli nabes neu Kau. 14Anbi haef le i of Au usanut snama ka alfa neu ho anaet sin ma ka alfa neu ho to sin, mes neu ko amsa, he nati' ho muhin nak kan mu'i fa esle' he nanes'on nok Kau anbi pah pinan anfun natef. 15Oni bait Au he kas ko mok ho to eki menas, namneo hi mate mimle'u milali. 16Mes Au ufetin ki he hi moni he nati' Au uton Au kuasat neu ko, talante Au kanak mateka anfun natef pah pinan.
17Maski nak onane, ho fe munaebom ma kam lomi fa he mufetin Au to sin he nao. 18Noka fa, tabu papmese onle i, of Au usanut ul fatu le anae le'uf kun, le fe kan bol nit fa anbi Mesir na'ko neno ahunut antia leku le i. 19Es nane te mupoitan aplenat he nati' ale mu'it ma ale amaus le anbi mone natam sin neu bale tainine. Ale mansian ma ale mu'it anbi me-me le ka na haof ton fa of anmate natuin antoman ul fatu.’ ” 20Fauk-fauk anbi anaet sin namtausan a'an Uisneno. Sin neki sin ate-ate sin ma sin mu'it sin natam sin neu ume he nati' nahaoftok. 21Mes bian sin natuin lasi mnaut nane ma sin nafetin sin ate-ate sin ma sin mu'it sin anbi mnela.
22Oke te Uisneno nakua a'an neu Nai Musa nak, “Muaiti ho nimam neu neno tunan, ma ul fatu of ansanu nem neu pah Mesir anfun natef. Ulan nane of antoman mansian, mu'it ma ale luet anbi lene.” 23Nai Musa naiti in tias neu neno tunan, ma Uisneno nasanut anin slutuf ma ul fatu, limat ma lotos neu pah pinan. Uisneno nasanut 24ul fatu le nae le'uf kun nok limat ma lotos le anku'an anfun natef. Le nane ul fatu le nae le'uf kun anbi atoni Mesir sin monin. 25Anbi pah nane anfun natef ul fatu nane nale'un ale sa' anbi lene, ma mansian ma mu'it. Ale luet anbi lene in nanan namle'u ma ale hau-hau sin natselan. 26Alkun anbi pah Gosyen, bale atoni Israel namaika anbine, ul fatu kan sanu fa anbine.
27Oke te kesel no'en Nai Musa ma Nai Harun ma in nak, “Au usanab ulalilen. Uisneno nane es amneot, au ma au to hai mo'e milali sanat. 28Amonen nai neu Uisneno; hai misusbon anaek natuin lotos ma ul fatu le i. Au of ufetin ki hem nao. Ka nabe'i he hi mimaika amteni anbi bale le i.”
29Nai Musa nak neu kesel nak, “Leka au tia ulali kot nane in kotin, of au uaiti au nimak ma onen toti neu Uisneno. Lotos of nasnas ma ul fatu of namne he nati' au Usif ho muhin nak pah pinan le i Uisneno in-ini. 30Mes au uhin nak au Usif ma ale anaet hi ka mimtausan fa Uisneno.”
31Pen mina ma sain namle'u, natuin pen mina ma sain he napune. 32Mes ale ane kase ma buka' ka namle'u fa natuin fe kan tia fa in etin.
33Oke te Nai Musa nasaitan kesel ma in nao neu kot in kotin; anbi nane in na'aiti in niman ma in onen neu Uisneno. Anbi leku nane amsa limat ma lotos, ul fatu 34ma ulan nasnas. Leka kesel in nit lasi le anbol nane, in anmo'e anteni sanat. In ma in anaet sin nekan namanu piut. 35Onle Uisneno naton nalali anao natuin Nai Musa, kesel kan lomi fa he nafetin atoni Israel sin he nao.
Currently Selected:
KELUARAN 9: AOZ
Highlight
Copy
Compare
Share
Want to have your highlights saved across all your devices? Sign up or sign in
