KELUARAN 39
39
Anmo'e Ana' fuat knino in blua pake
(Kel. 28:1-14)
1Nai Bezaleel ma Nai Aholiab anmo'e blua pake luli besa na'ko ab mate manafu, kanalu ma me' neu le Ana' fuat knino anbi leku sin antam ma nanaoba mepu anbi Ke'an Knino. Blua pake Ana' fuat knino neu Nai Harun sin anmo'e namnes nok Uisneno In plenat neu Nai Musa.
2Efod anmo'e na'ko pilu muti manula, ab mate manafu, kanalu ma me', ma aba mnatu. 3Sin nape' mnatu pisa-pisa nalali te anpini manihis anfani abas ma antenu nok pilu muti manula, ab mate manafu, kanalu ma me'. 4Nalali te anmo'e tani benaf nua hen fani efod in futun le anso nani in ninen. 5Futu tnanaf antenu nani le anmo'e na'ko abas le namnes ma anso neu efod nane talante anfani mese onle Uisneno naplenat nani neu Nai Musa. 6Sin anfon fatu klima mate molo ma nanineb neki mnatu. Nok hinet sin anlun Nai Yakub in anah sin bo'es am nua sin kankenu anbi fatu-fatu nane. 7Nalali te antao fatu-fatu nane anbi tani benaf na'ko Efod anfani lasi mnaut neu uf bo'es am nua na'ko to Israel, onle Uisneno naplenat nalali neu Nai Musa.
Anmo'e pilu ansaof
(Kel. 28:1-14)
8Nai Bezaleel ma Nai Aholiab anmo'e pilu ansaof na'ko abas le namnes nok Efod ma nabuna amsa onan. 9In nasusufon ma anli' nono nua, in menuan ma in amnanun es-es senti 22. 10Anbi pilu basaf nane sin naketi fatu klima ketis ha. Ketis ahunut: Fatu klima mate molo, ma fatu klima molo. 11Ketis no nua esle': Fatu klima mate leko, ma klima koto, fatu klima mate. 12Ketis no tenu esle': Fatu klima me', fatu klima muti me', ma fatu klima putun. 13Ketis no ha esle': Fatu klima, nus onle neno, fatu klima mate molo; fatu klima bo'es am nua en nane ma fatu neki mnatu. 14Anbi fatu klima mese anlun kanaf mese na'ko Nai Yakub in anah sin bo'es am nua hen fani mnaut neu uf-uf Israel. 15Ma anmo'e heke mnatu nua na'ko mnatu nesaf ma an ane onle tani. 16Anmo'e niti nua amsa na'ko mnatu ma antao sin anbi pilu basaf in panan sua sin. 17Ma heke mnatu nua en nane natam sin anao niti mnatu sin nanan, 18ma in panan nua en bian anfutu sin anbi nin fen nua sin, talante pilu basaf nane anmatalu nok tani basaf na'ko Efod in matan. 19Oke te anmo'e anteni niti mnatu nua ma antao sin anbi pilu basaf nane anbi in panan abit nanan ma antoman efod. 20Nalali onane te anmo'e niti mnatu nua ma antao sin anbi tani benaf nua sin le antom nok efod in matan anhaumak nok in sot le antalu nek in sanu, anbi futu tnanaf le antenu na'ko ab manula in fafon. 21Namnes nok plenat Uisneno neu Nai Musa niti pilu basaf anmalutab neki tani mate nok niti efod, talante pilu basaf nane nabala anbi futu tnanaf in fafon ma ka natsefi fa.
Anmo'e blua bian neu Ana' fuat knino
(Kel. 28:31-34)
22Sobalu bet kone le anpake anbi efod in fafon anmo'e na'ko ab mate manafu. 23Sobalu bet kone nane in to'an namepan anteni neki pilu matenu he kaisa natpisu laba. 24-26Anbi in ninen abit nanan anfun natef antao lun lin kase fuan na'ko pilu muti manula, ma ab mate manafu, kanalu ma me', ma nakselo sin neki bano na'ko mnatu namnes nok Uisneno In plenat neu Nai Musa.
27Sin anmo'e sobalu bet kone neu Nai Harun ma in anah sin, 28ma pilu, ma nos tuka na'ko muti manula, 29ma futu tnanaf na'ko muti manula, ab mate manafu, kanalu ma me' ma mabuna onle Uisneno naplenat nani neu Nai Musa. 30Ma anmo'e amsa blua amasat na'ko mnatu nesaf, anfani taka' nak sin mabeti nalali neu Uisneno. Anbi blua amasat le nane sin antui a'at nak, “Anbeti nalali neu Uisneno.” 31Blua amasat nane sin antao antom pilu in, matan namnes nok Uisneno In plenat neu Nai Musa.
Nasopu nani mepu le nane
(Kel. 35:10-19)
32Ma sin nasopu nani ale mepu nafena Um-ume Uisneno. Atoni Israel sin nasopu nani ale sa' onle Uisneno naplenat nalali neu Nai Musa. 33Sin neki neu Nai Musa Um-ume nane nok in blua sin, kaif sin, in hau kbaf sin, in ni ma in sukit sin, 34in eka na'ko bibi keso in pasun le anlep neu me', eka na'ko pasu manula, ma pilu obet. 35Peti Fef Bela le antao fatu nua en, hau lo'i ma in toben, 36mei nok in blua sin ma bukae utunu', 37tet paku na'ko mnatu nesaf, in paku sin nok in pake, mina neu paku, 38baki tulu na'ko mnatu, mina neu buat, atu fomeni, pilu eno naek neu Um-ume, 39baki tulu le anmo'e na'ko niti molo nok kaba' niti molo le' makano, in hau lo'i nok in pake, tasu bale he nafanu nok in sukit sin. 40Pilu-pilu neu po'an ma ni-ni nok in sukit sin, pilu eno naek na'ko po'an ma in tani-tani sin, Um-ume in suan sin, ma ale blua le anpake nani anbi Um-ume in nanan. 41Ma blua pake luli besa neu Ana' fuat knino anbi leku sin nanaoba mepu anbi Ke'an Knino ma blua le mabeti neu Nai Harun ma in anah sin. 42Atoni Israel sin nasopu nani ale mepu namnes nok Uisneno In plenat neu Nai Musa. 43Nai Musa antae ale sa' ma in ankiso nak sin anmo'e anmatom onle Uisneno naplenat nalali. Oke te Nai Musa anfe tetus neu sin.
Currently Selected:
KELUARAN 39: AOZ
Highlight
Copy
Compare
Share
Want to have your highlights saved across all your devices? Sign up or sign in
