KELUARAN 33
33
Uisneno anlenu to Israel he nasaitan Tubu Sinai
1Oke te Uisneno nakua a'an neu Nai Musa nak, “Misaitan bale le i ma amnao nai mok to le ho mupoitan sin na'ko pah Mesir nane meki sin nao neu pah le Au ta'en ulali neu Nai Abraham, Nai Ishak ma Nai Yakub ma neu sin sufan amsa. 2Of Au sonu ahake neno mese he nati' antopu ki. Of Au li'u uf Kanaan, Amori, Het, Feris, Hewi ma Yebus. 3Hi mes amnao neu pah le nahenu nok athoes ma maafa. Mes of Au ka nao oke ki fa, he nati' kais Au umate ki anbi lanan in atnanan natuin hi le i uf le nek manu.”
4-6Namuni onane te Uisneno anlenu Nai Musa he natonan to Israel nak, “Hi le i uf le nek manu ki. Oni bati Au he nao ubua oke ki maski nak kle'o amsa, namneo of hi mate. Amkasu hi blua mnatu sin, ma of Au lek ani neu ki.” Leka sin nen nalali Uisneno In hanan nanen, sin ankul onle atoni le ankae ma ankul. Oke te sin ankasu nani sin blua mnatu sin. Es nane te leka sin nao nasaitan Tubu Sinai, to Israel sin kan pake fa blua mnatu.
Um-ume Uisneno
7Anbi ale leku, leka atoni Israel sin nahakeb Um-ume, Nai Musa in nahakeb Um-ume na'lo na'ko sin um-ume. Sin nahakeb um-ume ma Um-ume le antek nak Um-ume Uisneno, ma sekau le anlomi he naheni Uisneno In salit in nao neu bale nane. 8Leka Nai Musa in nao neu Um-ume nane, atoni-atoni Israel sin anhake anbi sin um-ume in ninen ma ankiso natuin Nai Musa talante in antam. 9Leka Nai Musa antam nalali, ni nope nane ansanu ma anhake anbi Um-ume in enon. Es nane te Uisneno namolok nok Nai Musa anbi nope le nane in nanan. 10Leku atoni Israel sin nit ni nope nane anbi Um-ume Uisneno in enon, sin al-al sin anfen ma anlitu anbi es-es in ume in enon. 11Uisneno namolok nok Nai Musa humaf nok humaf, onle atoni mese' namolok nok in benuf. Nalali onane te Nai Musa in nao anfani neu in um-ume. Mes Nai Yosua Nai Nun in anah, li'anmunif mese le antuntaku Nai Musa in namaika nabala anbi Um-ume nane in nanan.
Uisneno an manta'en nak In of naneo ma nahafo In to
12Anbi neno mese Nai Musa nak neu Uisneno nak, “Koi Uisneno, Ho muplenat mulali kau he nati' au topu to le i neu pah le Hom ta'en mulali. Mes Ho ka muton fa neu sekau es Hom beti mulali he nati' antuntaku kau. Uisneno, Ho mumolok mak Ho muhin mulali kau, ma Hom lomi kau. 13Kalu onane, so Ho muton kau sa' le Hom sali, koi Uisneno, he nati' nabe'i au tuthae Ko ma au halin Ho nekam piut. Mumnau amsa nak to le i Hom beti mulali anfani Ho ini.”
14 Uisneno nak, “Of Au uneo ma uhafo ki he nati' pah le Au ta'en ulali neu ki anfnai hi ini.”
15Nai Musa natae nak, “Leka Uisneno Ho kam nao mok kai fa, kais amlenu kai he hai misaitan bale le i. 16Anmo'e onme ka he nati' atoni nahin nak Hom nek kau ma neu to le i leka Ho kam tuntaku kai fa? Uisneno Hom haek mok kai anbi hai tnanam of anbanaika kai na'ko uf bian anbi pah pinan.”
17 Uisneno nak neu Nai Musa nak, “Of Au utis ho totis natuin Au uhin ko ma Au nek ko.”
18Oke te Nai Musa antoti nak, “Koi Uisneno, muton neu kau Ho apinat ma Ho matakum.”
19 Uisneno natae nak, “Of Au hake anbi ho matam eki Au apinat ma Au anaet, ma Au uton ani Au kanak le aknino. Au le i Uisneno kau, ma Au uton ulali Au nek mamun ma Au athoes neu atoni-atoni le Au beti. 20Of Au ka uton fa Au humak neu ko, natuin kan mu'i fa atoni le nabe'i he na'aiti matan ma ankiso Kau, ma in hen moni nabala. 21Anbi Au aok bian nane anmu'i tubu fatu; ho nabe'i amhake ambi nane. 22Leka Au fin nok Au apinat, of Au utam ko anbi tubu fatu nane in kan ma Au tobe ani ko eki Au nimak talante Au nao fini. 23Oke te of Au aiti ufani Au nimak he nati' hom kiso koti Kau, mes ho ka mit fa Au humak.”
Currently Selected:
KELUARAN 33: AOZ
Highlight
Copy
Compare
Share
Want to have your highlights saved across all your devices? Sign up or sign in
