KELUARAN 32
32
Bijae na'ko mnatu
(Ul. 9:6-29)
1Leka to Israel sin nit nak Nai Musa a'lo ma kan sanu fa na'ko tubu in tunan, mes in fe nabala anbi nane amsa, sin nauban Nai Harun ma sin nak neune nak, “Hit ka tahin fa neu sa' es anbol neu Nai Musa, atoni le napoitan nalali kit na'ko pah Mesir, es nane te anmo'e neu kai uisneno teta le of antopu anteni kai.”
2Oke te Nai Harun nak neu sin nak, “Amfenu falo mnatu le hi fenai ma hi anah sin anpake sin, ma meki sin nem neu kau.” 3Ma sin es-es te anfenu sin falo mnatu ma neki sin nem neu Nai Harun. 4Nai Harun in naiti ale falo nane, in nanoeba ma antesi neu bale mese ma in anmo'e nahumbon anfani bijae mese. To nane nak,
“Hoi Israel, le i hit uisneno teta le neki kit atpoi ta'ko pah Mesir!”
5Oke te Nai Harun nahakeb baki tulu mese anbi bijae nane in matan in naton nak, “Noka fa anmu'i tolas he nati' taluli tabes neu Uisneno.” 6Anbi noka fa fe nok-noka atoni-atoni Israel neki mu'it fauk-fauk neu fua mnotu, ma mu'it fauk-fauk anteni neu fuat halan nekaf. Sin antok ma anbukae ma ninun, ma sin anfen anhaken namlil ma namoek.
7Ma Uisneno nak neu Nai Musa nak, “Amsanu laba nai, natuin to le ho mupoitan mulali na'ko pah Mesir sin anmo'e nalali amle'ut. 8Sin anboe nalali na'ko Au plenat-plenat sin. Sin anmo'e nalali nahumbon onle bijae na'ko mnatu tesi', es nane te sin naluli nabes ma natulu fuat neune. Si nauab nak nane sin uisneno teta le neki sin anpoi na'ko pah Mesir. 9Au uhin ulali neu to le i sin na'nak fatu. 10Kais hom eka Kau. Au uto'an sin ma of Au ule'un sin. Mes ho mok ho sufam of Au mo'e ki amfani uf anaek mese.”
11Nai Musa antoti neu Uisneno nak, “Koi Uisneno, nansa' es Ho mo'e onane neu sin? Ai ka Ho fa es mufetin mulali sin na'ko pah Mesir meki kuasat ma be'it matani le anae le'uf kun? 12Leka Ho mule'un sin, atoni Mesir sin of namolok nak Ho mupoitan to le nane anpoi na'ko Mesir he nati' Ho mumate sin ma mule'un mufinib sin anbi tubu i. Kaisa onane, koi Uisneno, mubaina Ho salit ma kais mule'un to nane. 13Mumnau Ho ate sin, Nai Abraham, Nai Ishak ma Nai Yakub. Mumnau sin natuin Ho manta'en mulali meki supat he nati' mumfaub sin sufan onle afkun anbi neno tnanan, ma pah le Hom ta'en mulali anfun ma natef of anfani sin sufan in-ini talante nabal-bal.” 14Es nane te Uisneno nabaina In salit ma In ka nanaob fa salit amle'ut, he nati' to le nane antoman snama amle'ut nane.
15Nai Musa ansanu na'ko tubu nane in tunan in neki fatu nua en le antui nalali plenat-plenat Uisneno anbi in aon bian. 16Uisneno In neknon es anmo'e fatu le nane ma anlun nani plenat-plenat sin anbine.
17Fe sin nao neki ansani, Nai Yosua in nen atoni-atoni Israel na'ba'en, ma in nak neu Nai Musa nak, “Anmu'i slutuf makenat anbi bale snasat.”
18Nai Musa nak, “Anbi hit nenat ka onfa a'baf mnisat ai han hunun natuin malinat; mes nane hanaf na'ko atoni le ansi.”
19Leka Nai Musa anhaumak Um-ume nane, in ankiso nit bijae mnatu le nane ma atoni-atoni sin nabso'an, es nane te in nato'. Anbi tubu in un nane amsa, Nai Musa antepon nape' fatu le in neki nane talante anpe' Pisa-pisa. 20Nalali te Nai Musa naiti bijae le atoni-atoni Israel anmo'e nane, in nanoeba, ma in antutu naskuku onle' afu, nalali te in anselo nok oe. Ma in anlenu atoni Israel sin ninu nani. 21In nak Nai Harun nak, “Sin anmo'e sa' neu ko talante ho mufetin sin nasanab nae le'uf onle i?”
22Nai Harun natae nak, “Kais ho muto'an kau; ho muhin amsa neu atoni-atoni le i sin salit he nati' anmo'e amle'ut. 23Sin nak neu kau nak, ‘Hit tahin talali neu sa' le anbol ma antoman Nai Musa, atoni le napoitan nalali kit na'ko pah Mesir; es nane te anmo'e neu kai uisneno teta le nabe'i hen topu kai.’ 24Au lenu sin he nana'at ale blua mnatu, oke te sin nana'at neu kau. Ale blua mnatu nane au unoeba anbi ai in nanan, oke te bijae le i anmot!”
25Nai Musa in nekan anbe' nak Nai Harun nafetin to Israel onle bikase le nafetin na'ko o'of in nanan, talante ale sin musu-musu anmanis sin. 26Es nane te in anfen ma anhake anbi Um-ume in eno naek ma in anhunun nak, “Sekau es anpes nok Uisneno, so in nem neu bale le i!” Es nane te uf Lewi sin nem ma anfun natef Nai Musa, 27ma in nak neu sin nak, “Uisneno atoni Israel naplenat neu ki es nok es he nati' amhosu hi suni ma amnao mituin Um-ume le i, na'ko eno amnao neu eno bian ma mimate hi olif tataf, hi biaf hi benuf ma hi in-ini sin.” 28Uf Lewi sin nanaoba plenat le nane ma anbi neno nane amsa sin namate atoni nifun tenu. 29Nai Musa nak neu uf Lewi nak, “Anbi neno le i hi mitetab milali hi aom amfani Ana' fuat knino le amtuthae Uisneno nok lanan hi mimate li'ana-li'ana ma olif tataf, es nane te Uisneno anfe nani ki tetus.”
30Noka fa Nai Musa nak neu to nane nak, “Hi mo'e milali sanat anaek. Mes leku le i of au sae fani neu tubu nane ma hake bi Uisneno In human In matan; ma nati' au upeni sako sanat natuin hi sanat sin.” 31Oke te Nai Musa in nao ma anhake anbi Uisneno In human In matan ma in nak, “To le nane anmo'e nalali sanat anaek. Sin anmo'e uisneno teta na'ko mnatu. 32Amnek Ho ate sin ma amsako sin sanat; kalu kahaf, amnose mani au kanak na'ko sulat atoni-atoni amonit.”
33 Uisneno natae nak, “Alkun atoni-atoni le nasanab nalali neu Kau of Au nose sin kanan na'ko sulat nane. 34Leku le i amnao nai, ma meki sin neu bale le Au uton ulali neu ko. Au ahake neno of antopu ko, mes in leku of antia atoni-atoni nane of sin napeni kasat natuin sin sanat-sanat sin.”
35Oke te Uisneno nasanut asnama neu atoni-atoni nane natuin sin na'seke Nai Harun hen mo'e mnatu namasbon on bijae.
Currently Selected:
KELUARAN 32: AOZ
Highlight
Copy
Compare
Share
Want to have your highlights saved across all your devices? Sign up or sign in
