KELUARAN 34
34
Fatu bena fe'u nua
(Ul. 10:1-5)
1Nalali te Uisneno nakua a'an neu Nai Musa nak, “Am pah man fatu bena nua on afi ahunut. Anbi fatu bena nua en nane of Au tui uab ma molok le namnes nok le anbi fatu nua en le ho mupe' mulali sin nane. 2Muloitan nai he nati' anbi noka am nok-noka hom sae neu Tubu Sinai in tunan ma amhake ambi Au matak. 3Kais anmu'i atoni mese le nok ko ai anbi kabenan me na'ko tubu le nane. Ale bijae ma bibi kase kais mifetin sin he nati' he nah hun anbi tubu nane in un.” 4Oke te Nai Musa ansapi anteni fatu bena nua, ma anbi noka fa am nok-noka in neki sin ma ansae neu Tubu Sinai in tunan onle Uisneno naplenat nalali neune.
5Ma Uisneno ansanu anbi nope mese in nanan; In anhake nok Nai Musa anbi bale nane, ma naton In kanan le aknino, esle' Uisneno. 6Nalali te Uisneno anhake anbi Nai Musa in matan ma nakua a'an nak, “Au Uisneno kau, Uisneno amnekat ma nek amahoet. Au manekak nane nathoe, Au aki'at kau ma Au ka uto' fa labah. 7Au mes uton Au manekak neu sufa ka'uf nifun-nifun ma of Au nose ani sin sanat; mes atoni le nasanab of Au ka ufetin fa na'ko sanat, ma of Au kas in anah-anah sin ma in upuf sin talante batan tenu ma batan ha natuin sin mnasi sin sanat.”
8Anbi leku nane amsa Nai Musa anlitu naluli ma nabes. 9In nak, “Koi Uisneno, kalu namneo-namneo Hom nek Kau, au toti Ko, so Hom nao mubua mok kai koi Uisneno. Namneo to le i nak fatu mes amnose hai maufinu ma hai sanat ma amsimo man kai anfani on Ho to anmes kun.”
Nafe'un Fef Bela
(Kel. 23:14-19; Ul. 7:1-5, 16:1-17)
10 Uisneno nakua a'an neu Nai Musa nak, “Leku le i Au he mo'e ani Fef Bela nok to Israel. Ale uf of nit ale lasi-lasi amkakat le Au mo'e le Au fe ka uton ani fa anbi uf-uf pah pinan le i sin matan. Ale uf of nit lasi-lasi amkakat le Au mo'e, natuin Au, Uisneno of Au mo'e sa' esle' anaek neu ki. 11Moe mituin ale Au plenat-plenat sin le Au fe neu ko anbi neno le i. Of Au li'u uaenab uf Amori, Kanaan. Het, Feris, Hewi ma Yebus anbi tabu him nao mat. 12Kais amanta'en mok atoni-atoni anbi pah le him tam ambine natuin lasi nane anfani kle'o le neki maten neu ki. 13Es nane te, kais hi mo'e onane, mes mitselab sin baki-baki fuat sin, ma miskuku mani sin fatu le'u sin ma mitselab sin ume fuat Asyera, in ni-ni sin.
14Kaisa miluli ma mibes neu uisneno teta bian, natuin Au Uisneno, le hi Uisneno kais hi minesa nok sa' es amsa. 15Kaisa hi mo'e manta'en mok uf anbi pah le nane amsa, natuin anbi leku sin nabes ma natulu fuat neu uisneno teta, sin of anfuli ki, ma hi of mituin sin. 16Leka hi anah-anah sin anmafe nok bife-bife mata teme nane, bife-bife nane of anfuli sin he nati' sin nasaitan Kau ma nabes neu sin fatu le'u ma sin hau le'u.
17Kaisa miluli ma mibes neu uisneno teta le anmo'e na'ko niti molo.
18Minaeb tolas utunu' le kan tao fa lalu haef. Onle Au uplenat ulali neu ki, so hi miah utunu' le kan tao fa lalu haef anbi neno hitu in nanan anbi funan ahunut, natuin anbi funan nane hi misaitan pah Mesir.
19Ale li'anmone unu ma mu'it keso le nahonis nahunun nane Au in-ini, 20mes so him soi mani bikase luke mnanu le nahonis nahunun ma mitulu bibi ankeso mese anfani on in asekan. Leka hi kam lomi fa hem soi mani in, so him ipu bikase luke mnanu nane in to'an. So hi anmone nae sin amsoi mani sin amsa.
Kaisa atoni mese nem anhaumak Kau leka in ka neki fa fua tulu.
21Anmu'i neno ne he hi mepu; kais hi mepu anbi neno hitu, maski nak anbi tabu tofas ai anbi tabu sekit.
22Minaeba Tolas Sekit anbi leku him nibun ane kase in punen ahunut. Ma minaeb amsa Tolas La' Hau no' anbi ton in amsopun, leka him seu hau in fuan.
23Anbi ton mese ale atoni so sin nem ma nabes neu Kau, Uisneno atoni Israel, haef tenu. 24Anbi leku Au li'u ulali uf-uf na'ko hi matam ma Au he menuaba' hi pah, anbi leku him nao he minaeb Tolas Utunu' Ka Nok fa Lalu haef ma Tolas Sekit ma Tolas La' Hau no'.
25Anbi leku hi mitulu mu'it le malolo, kais hi mitulu sa'-sa' le hi mo'e meki lalu haef. Mu'it le him lolo neu tulu fuat neno tolas Paskah so hi miah mani anbi fai nane amsa, ma kais anmu'i in nesin talante neno noka.
26So anbi ton mese-mese hi meki hi pah in afan ahunut neu Ume Uisneno.
Bibi kase ana' in nesan ai bibi ana' in nesan kais hi mihan meki in ainaf in susun oen.”
27 Uisneno nakua a'an neu Nai Musa nak, “Amtui uab molok le i natuin Au anmo'e Fef Bela le i oke ko ma to Israel.” 28Anbi neno bo'ha ma fai bo'ha Nai Musa namaika anbi bale nane nok Uisneno, ma Nai Musa ka nah ma ka ninu fa amsa. Molok-molok Fef Bela nane, esle' Uisneno In plenat sin bo'mese, le antui nani sin anbi fatu nua.
Nai Musa ansanu na'ko Tubu Sinai
29Leka Nai Musa in ansanu na'ko Tubu Sinai in neki plenat bo'mese nane, in human anpin natuin in namolok nok Uisneno, mes Nai Musa anmes ka nahin fa neu in human anpin onane. 30Nai Harun ma ale to sin ankiso neu Nai Musa in human anpin, es nane te sin namtau ma kan haumak fa in. 31Mes Nai Musa anboin sin, ma Nai Harun nok ale sin atopus sin nem anhaumak in, ma Nai Musa namolok nok sin. 32Nalali te ale to Israel sin nabua ma anfun natef nan in, ma Nai Musa natiab ale plenat-plenat le Uisneno anfe nani neu in anbi Tubu Sinai in tunan. 33Leka in namolok nalali nok sin, Nai Musa antobe in human neki pilu. 34Anbi ale tabu leka Nai Musa antam neu Um-ume Uisneno he namolok nok Uisneno, in anfai nani pilu nane talante in anpoi. Nalali te in natiaba neu to Israel ale Uisneno In Fef bela, 35ma sin nit Nai Harun in human anpin. Ma in antobe anteni in human talante leku amnemat leka in namolok anteni nok Uisneno.
Currently Selected:
KELUARAN 34: AOZ
Highlight
Copy
Compare
Share
Want to have your highlights saved across all your devices? Sign up or sign in
