KELUARAN 3
3
Uisneno no'en Nai Musa
1Anbi leku nane Nai Musa natuku Nai Yitro in babaf, Ana' fuat knino anbi pah Midian in bibi ma in bibi kase sin. Leka in fe anpo'o mu'it nane neu mnela snaen aon bian, in nem antia Tubu Sinai, tubu knino nane. 2Anbi nane ahake Uisneno naklil'on neu in anbi ai pina le anpoi na'ko kisan in nanan. Nai Musa in nit kisan nane anpin, mes kan putu fa. 3“Matani nae le'uf kun,” in natenab onane. “Kisan nane kan putu fa! Leko au haumak he kiso.”
4 Uisneno nit Nai Musa neu in anhaumak bale nane, es nane In nakua a'an na'ko kisan nane in atnanan nak, “Musa! Musa!”
“Au es kau i,” Nai Musa natae onane.
5Oke te Uisneno nakua a'an nak, “Kaisa amhaumak aum. Amkasu ho pen haef, natuin hom hake anbi bale le' in knino kun. 6Au le i ho na'i sin Uisneno, Uisneno Nai Abraham, Nai Ishak ma Nai Yakub.” Es nane te Nai Musa an amu in human, natuin in namtau hen kiso Uisneno.
7Oke te Uisneno nakua a'an nak, “Au it ulali Au to sin nukat ma sin nu'ut anbi pah Mesir, ma Au nen ulali sin sakoit ma antoti fetin na'ko atoni-atoni le an aten sin. Namneo, Au uhin ulali sin nu'ut ok-oke. 8Es nane te Au sanu he ufetin sin na'ko atoni Mesir ma eki sin anpoi na'ko pah nane he nao neu pah mese le menuan kun. In afu nane nathoe ma maafa, ma leku le i atoni Kanaan, atoni Het, Amori, Feris, Hewi ma Yebus es natua pah nane. 9Kaet kulut atoni Israel Au nen ulali, ma Au it ulali amsa neu atoni Mesir an aten sin. 10Tabu le i Au lenu ko he hom nao ma amhake ambi Kesel Mesir in matan he nati' ho mupoitan Au to na'ko pah le nane.”
11Mes Nai Musa nak neu Uisneno nak, “Au le i sekau kau ka, talante nabe'i au hake bi kesel in matan ma upoitan atoni Israel na'ko pah Mesir?”
12Uisneno natae nak, “Of Au tuntaku ko. Ma leka uf nane ho meki mupoitan sin na'ko Mesir, hi of miluli ma mibes neu Kau anbi tubu le i. Nane anfani taka' nak Au es alelu ko.”
13Nai Musa natae nak, “Mes leka au ueku oke atoni-atoni Israel ma au utonan sin ak, ‘Hi na'i sin Uisneno anlenu kau neu ki,’ sin mes natan nak, ‘In kanan sekau?’ oke te of au he utae sin ak sa ka?”
14Uisneno nakua a'an nak, “AU UISNENO KAU. Le i es mes ho mutonan to Israel. In le antek AU UISNENO KAU, es anlenu nalali kau neu ki. 15Muton neu sin amsa mak Au, Uisneno, hi na'i sin Uisneno Nai Abraham, Nai Ishak ma Nai Yakub, es anlenu kau neu ki. Au le Uisneno kau, le nane Au kanak talantia nabal-bal. Ale uf ma ale batan of antek nani kau onane. 16Amnao nai ma amnibun ale atopus to Israel. Muton neu sin mak Au, Uisneno Kau, na'i sin Uisneno, Uisneno Nai Abraham, Nai Ishak ma Nai Yakub, nalil'on nalali neu kau. Mutonan sin mak Au aum ulali neu sin ma Au it ulali neu atoni Mesir anhamu'i sin. 17Ma Au ufek ulali he eki sin anpoi na'ko Mesir, bale anhamu'i sin, ma eki sin neu pah mese le nahenu nok athoes ma maafa, pah atoni Kanaan, atoni Het, Amori, Feris, Hewi ma Yebus.
18Au to of sin nen ho molok. Nalali te ho mok ale nakaf atoni Israel mes him nao ma amhake anbi Kesel Mesir in matan ma miton neune mak: ‘Uisneno, atoni Ibrani sin Uisneno In nem nalali ma nalil'on neu kai. Leku le i mufetin kai he hai mnao neu mnela snaen le neno tenu in a'lon he nati' hai mitulu fua tulu neu hai Uisneno, hai Uisneno.’ ” 19Nalali te Uisneno nakua a'an anteni nak, “Au uhin Kesel Mesir of ka nafetin ki fa he him nao, so hi miseke in. 20Mes of Au pake Au kuasat, ma Au kas Mesir eki snama-snama le anaek le of Au usanut anbi nane. Nalali onane te, in of nafetin ki he him nao.
21Of Au mo'e atoni Mesir sin nekan anmahoe neu ki, talante anbi leku Au to anpoi ma an nao, hi of kam nao fa nok nim luman. 22Bife Israel sin of mese-mese antoti blua pake, noni muti ma mnatu na'ko atoni Mesir le ume anhaumak ma na'ko bife Mesir le natua nabua anbi ume mese. Hi of mipakeb sin neu hi anah-anah sin. Nok lanan nane of hi misik atoni Mesir sin a'mu'in.”
Currently Selected:
KELUARAN 3: AOZ
Highlight
Copy
Compare
Share
Want to have your highlights saved across all your devices? Sign up or sign in
