KELUARAN 4
4
Uisneno anfe kuasat neu Nai Musa hen mo'e lasi amkakat
1Oke te Nai Musa natae Uisneno nak, “Mes onme ka kalu atoni Israel sin kan palsai fa ma sin kan lomi fa he nen au molok-molok sin? Of au he mo'e onme ka leka sin namolok nak Uisneno ka nalil'on fa neu kau?”
2 Uisneno natan Nai Musa nak, “Sa' esle' ho nimam nane?” Nai Musa natae nak, “Tias.”
3 Uisneno nakua a'an nak, “Ampolin nai neu afu.” Nai Musa anpolin in, oke te tias nane nabaina anfani kauna ma Nai Musa naen na'lo na'ko in. 4Uisneno nakua a'an neu Nai Musa nak, “Amhaumak kauna nane, ma amna in ikon.” Nai Musa anhaumak in ma anheke kauna nane le nabaina anfani tias anbi Nai Musa in niman nanan. 5Uisneno nakua a'an nak, “Anmo'e onane he nati' atoni-atoni Israel anpalsai nak Au, Uisneno, na'i sin Uisneno, Uisneno Nai Abraham, Nai Ishak ma Nai Yakub, Au ulil'ok ulali neu ko.”
6 Uisneno nakua a'an anteni neu Nai Musa nak, “Mutam ho nimam nai neu ho sobalu in nanan.” Nai Musa natuin, ma leka in hel napoitan nafani in nimam, in niman nane muti natuin antoman men poko le nahainisin. 7Oke te Uisneno nakua a'an nak, “Mutam mufani ho nimam neu ho sobalu in nanan.” Nai Musa anmo'e onane, ma leka in napoitan anteni in nimam, in nimam nane naleko anfani. 8Uisneno nakua a'an nak, “Kalu sin kan lomi fa hen palsai neu ko, ai sin ka natebes fa leka sin nit nalali lasi amkakat ahunut, lasi amkakat le i of anmo'e sin ma sin anpalsai. 9Kalu sin kan palsai fa neu ko amsa maski nak sin nit nalali lasi amkakat nua en le i, ma sin ka nen fa ho molok sin, maiti oe kle'o na'ko Noe Nil ma amopan neu nain. Oe nane of nabaina ma anfani na'.”
10Mes Nai Musa nak, “Koi, Uisneno, au atoni le ka umolok uhin fa, leko anbi ahunut ma anbi leku le i, leka Uisneno mukau mulali a'an neu kau. Au mak anmafen, au ka manoe fa anbi molok ma ka nao fa leko.”
11 Uisneno nakua a'an neune nak, “Sekau ka es anfe fefaf neu mansian? Sekau ka es anmo'e in anmono ma antono? Sekau ka es anmo'e in he nit ma anfolo? Ai Au le i, ka Uisneno kau fa? 12Leku le i, amnao nai, of Au tuntaku ko anbi molok ma of Au unoina ko sa' le of ho mumolok.”
13Mes Nai Musa natae nak, “Au toti Ko, kaisa amlenu kau, koi Uisneno, amlenu atoni bian.”
14Oke te Uisneno nato'an Nai Musa ma nak neune nak, “Ai ho biaf Nai Harun nane ka ho ini fa? Au uhin in namolok nahin. Namneo, in anbi lanan nem neu bale i, ma in of anmalin naeku nok ko. 15Mumolok mok in ma mutonan neune sa' le of in he namolok. Of Au tuntaku ki nua ki ma unoina ki sa' le mes hi he mimolok ma sa' le mes hi he mo'e. 16In mes namolok natuin ho kanam anbi to sin matan. In of anfani ho atalu maf ma in of nabaina ko amfani Uisneno le naton neune sa' le of in namolok. 17Meki tias le nane, fun nok tias nane of ho muton ale lasi amkakat.”
Nai Musa in nao anfani neu pah Mesir
18Nalali onane te Nai Musa anfani neu in babaf Nai Yitro in ume ma in nak neune nak, “Mufetin kau he au fani neu pah Mesir he senu au benu sin ma kiso sin ai fe sin anmoni ka.” Nai Yitro nak neu Nai Musa nak, “Amnao nai nok aomina.”
19Leka Nai Musa fe anbi pah Midian, Uisneno nakua a'an neune nak, “Amfani nai neu Mesir. Ale atoni le ansali he namate ko sin anmate nalali.” 20Es nane te Nai Musa natonan in fenai ma in anah-anah sin ma nasaeba sin neu bikase luke mnanu in tunan oke te sin nao anfani neu pah Mesir. Natuin Uisneno In aplenat, Nai Musa amsa neki in tias.
21 Uisneno nakua a'an neu Nai Musa nak, “Au fe ulali kuasat neu ko he muton ale lasi amkakat. Es nane te leka hom nao amfani mulali anbi pah Mesir, ho mo'e ale lasi amkakat nane anbi Kesel Mesir in matan. Mes of Au umanub in nekan, talante in ka nafetin fa to le nane he sin anao. 22Oke te ho mutonan kesel nane mak Au, Uisneno, Au ba'an on i: ‘Israel nane Au anmone anaet, 23ma Au uplenat ulali ko he mufetin Au anah le nane he nao he nati' naluli nabes neu Kau, mes hom tite. Es nane te of Au umate ho anmone anaet.’ ”
24Anbi bale mese anbi um-ume in nanan anbi lanan le nane, Uisneno nem neu Nai Musa ma he namate in. 25In fenai, bi Zipora, naiti fatu mese le naaik ma anheli in anmone in aon po'an, oke te an onon neu Nai Musa in haen. Bi Zipora nak, “Ho au mone la naopan in na' neu kau.” 26In namolok lasi nane anmatalu nok lekat mahapit ai mahelit. Es nane te Uisneno ka namate fa Nai Musa.
27Namnes nok le nane amsa Uisneno nakua a'an neu Nai Harun nak, “Amnao nai neu mnela hufui he mueku mok Nai Musa.” Nai Harun in nao, oke te in naeku nok in olif anbi tubu knino, ma in nek in. 28Nai Musa natonan Nai Harun ale lasi le Uisneno namolok nalali neune anbi tabu anlenu in he nao anfani neu pah Mesir, ma neu ale lasi amkakat le of in anmo'e nani amsa. 29Nalali te Nai Musa ma Nai Harun sin nao neu Mesir ma nabuab ale nakaf to Israel. 30Nai Harun natiab neu sin ale sa' le Uisneno naton nalali neu Nai Musa, ma Nai Musa anmo'e ale lasi amkakat anbi atoni-atoni nane sin matan. 31Es nane te sin anpalsai, ma leka sin nen nak Uisneno anpanat to Israel ma nit nalali sin nukat, sin naluli ma nabes neu in.
Currently Selected:
KELUARAN 4: AOZ
Highlight
Copy
Compare
Share
Want to have your highlights saved across all your devices? Sign up or sign in
