KELUARAN 25
25
Tulu neu Um-ume Uisneno
(Kel. 35:4-9)
1 Uisneno nakua a'an neu Nai Musa nak, 2“Amlenu atoni Israel he neki tulu neu Kau. Sekau in nekan anbe', in mes neki tulu 3onle: mnatu, noni muti ma niti molo; 4pilu muti malula, pilu mate manafu, kanalu ma memtasa, pilu na'ko bibi in funun, 5bibi kase keso in pasu le anlep me amtasa, pasu malula, ankai kase, 6mina neu paku, fo bona neu mina le anpake anbi luli besa, ma neu atu fo meni, 7fatu alim mate molo human namtis he nati' antao neu sobalu efod ma an obe Ana' Fuat Knino Amnanut in a'basan. 8Amlenu to nane anmo'e um-ume mese neu Kau, he nati' Au umaika anbi sin atnanan. 9Um-ume ma ale in blua sin so hi mo'e natuin salit le of Au uton ani neu ki.”
Peti Fef Bela
(Kel. 37:1-9)
10“Anmo'e peti mese na'ko ankai kase le in amnanun senti 110, in menuan ma in a'latan senti 66. 11Am amu in nanan ma in kotin meki mnatu nesaf ma anmo'e in ninen amsa na'ko mnatu. 12Ma neu in hau lo'i, so anmo'e niti mnatu ha ma mi'kai sin neu in haen ha sin, niti nua anbi in haen bian am bian. 13Anmo'e in hau lo'i nane na'ko ankai kase ma am amu meki mnatu, 14ma mitam hau lo'i nane antam natuin in niti le anbi peti in kabenan nane. 15Hau lo'i nane so nabalah anbi niti-niti nane in nanan ma ka nabe'i fa he mipoitan. 16Ma anbi peti nane in nanan so hom tao fatu nua en nane le nok Au plenat-plenat sin le Au fe ulali neu ko.
17Anmo'e peti nane in toben na'ko mnatu nesaf, in amnanun senti 110 ma in menuan senti 66. 18Ma so ho mo'e na'ko mnatu matutu namasbon onle ahake neno sin nua, 19es-es anbi peti nane in toben aon bian am bian. Ahake neno le mamasa nane so anmo'e sin anfani nua nok peti in toben, 20ma anmo'e sin anmabaina es nok es ma nauf sin ninen anbi peti in tunan. 21Amtao fatu nua en nane neu peti in nanan ma amtobe mani peti nane. 22Anbi bale nane of Au ueku oke ko, ma anbi tobes le nane in tunan anbi ahake neno nua en nane sin atnanan, of Au fe ko Au plenat-plenat sin neu to Israel.”
Mei loitan utunu'
(Kel. 37:10-16)
23“Anmo'e nai mei mese na'ko ankai kase le in amnanun senti 88, ma in menuan senti 44, ma in alatan senti 66. 24Am amu meki mnatu nesaf ma amtao mnatu neu in ninen anfun natef. 25Anmo'e mei nane in ninen menuan senti 7,5 ma am eka meki mnatu anfun natef mei nane in ninen. 26Anmo'e niti ha na'ko mnatu ma amtao sin anbi in haenen ha sin ninen. 27Niti nane he nati' amtao hau lo'i ma maiti mei nane. 28Hau lo'i nane so anmo'e na'ko ankai kase ma am amu meki mnatu. 29So anmo'e pika sin, klas sin, in posi sin, in fane sin neu tulu tua min kase. Ale blua neu mei nane so anmo'e na'ko mnatu nesaf. 30So amtao mei nane antom Peti Fef Bela nane in matan, ma anbi mei nane in tunan so miloitan utunu' piut.”
A'tet paku
(Kel. 37:17-24)
31“Anmo'e tet paku nane na'ko mnatu nesaf. In sukit ma in na'an nane so anmo'e na'ko mnatu le matutu; onle tuna-tuna amasat, in sufan ma in amun so anmatalu nok in sukin ma in na'an. 32Anbi in na'an nane so anmo'e tlaef ne, tlaef tenu aon bian am bian. 33Anbi in atlaen tenu sin so anmo'e onle tuna naek tenu nok in sufan ma in amun. 34Anbi in na'an so anmo'e lunat onle tuna naek ha nok in sufan ma in amun. 35Anbi tlaef mese-mese in a'pinan nane so anmo'e tuna mese in sufan. 36Paku nane in haenen nok tuna-tuna in sufan ma in atlef sin so anmo'e na'ko mnatu nesaf le matutu tuka mese. 37Anmo'e paku hitu anbi tet paku le nane ma anmo'e onle nane he nati' in pinan antom mat. 38So anmo'e blua mese na'ko mnatu nesaf he nati' amnose abas na'ko paku in toben. 39Ampake mnatu nesaf kilo bo'tenu am nim he nati' amepu tet paku nane nok in blua sin. 40Ampanat he nati' tet paku le nane anmo'e natuin leta le Au uton ulali neu ko anbi tubu le i in tunan.”
Currently Selected:
KELUARAN 25: AOZ
Highlight
Copy
Compare
Share
Want to have your highlights saved across all your devices? Sign up or sign in
