KELUARAN 24
24
Uisneno namepan In Fef Bela
1Nalali te Uisneno nakua a'an neu Nai Musa nak, “Amsae nai ma amhake ambi Au matak, ho mok Nai Harun, Nai Nadab ma Nai Abihu, ma atopus to bo'hitu anbi pah le nane, ma milui mibes neu Kau na'ko lo. 2Al ho mes es nabe'i ho aum ma amhaumak Kau. Le bian ka nabe'i fa he sin anhaumak, ma neu to kais ansae nok neu tubu le i in tunan.”
3Oke te Nai Musa in anao ma naton neu to nane ale plenat ma lekat lulut na'ko Uisneno. Sin alsin natae nak, “Haim lomi he mo'e mituin ale lasi le Uisneno naton nalali.” 4Nalali te Nai Musa antui ale plenat Uisneno. Ma anbi noka fa nok-noka, in nahakeb baki fuat mese nok fatu taka' bo'es am nua anbi tubu in un; fatu taka' mese-mese anfani mnaut neu nonot ma uf Israel. 5Oke te Nai Musa anlenu atoni munif fauk-fauk, ma sin natulu fua tulu mnotu neu Uisneno ma sin anlolo bijae fauk-fauk anfani tulu halan nekaf. 6Nai Musa naiti nan bijae in na' kle'o ma antao neu fane-fane sin nanan. Ma anponin na' bian neu baki tulu in tunan. 7Nalali te in naiti beno knino le antui nani plenat-plenat Uisneno, ma in anso'i nok han a'aikat neu to le nane. Sin nak, “Haim lomi he mituin Uisneno ma minaeb ale In aplenat sin.”
8Oke te Nai Musa in naiti na' le anbi fane-fane nane in nanan ma anlisin neu to sin. In namolok nak, “Na' le i namepan Fef Bela le Uisneno anfutun nalali nok ki ma ansukin In plenat-plenat sin.”
9Nalali te Nai Musa, Nai Harun, Nai Nadab, Nai Abihu ma atopu to sin bo'hitu nane sin ansae neu tubu in tunan, 10ma sin nit Uisneno Israel anhake anbi sa'-sa' es in fafon onle lapet na'ko fatu klima, ma mate onle neno tnanan in masan. 11Ale atopus Israel nane sin nit nalali Uisneno; maski nak onane ka namate fa sin. Nalali onane te sin nah ma sin ninun.
Nai Musa anbi Tubu Sinai in tunan
12Namuni te Uisneno nakua a'an neu Nai Musa nak, “Amsae aim neu Kau anbi tubu in tunan. Anbi nane of Au fe neu ko fatu nua le Au tui ulali Au plenat-plenat sin. Ale plenat nane Au fe sin he nati' ho munoina to nane.” 13Oke te Nai Musa ma Nai Yosua in ababat sin naloitan ma Nai Musa ansae neu tubu le Uisneno anbine. 14Nai Musa anta'en nalali neu ale atopus to Israel nak, “Ampao kai anbi um-ume i talante hai amfani aim. Nai Harun ma Nai Hur sin namaika nok ki anbi i. Sekau le anmu'i molok, nabe'i nem neu sin he naloitan nani.”
15Ma Nai Musa ansae neu Tubu Sinai in tunan, oke te nope an aum nan in. 16-17Uisneno In apinat nane ansanu anbi tubu nane in tunan ma ale atoni Israel sin ankiso onle ai anpin anbi tubu in tunan. Nope an aum nan tubu nane anbi neno ne in nanan, ma anbi neno hitu Uisneno anboin Nai Musa na'ko nope in nanan. 18Oke te Nai Musa ansae piut ma antam anbi nope in nanan. Nai Musa namaika anbi nane nan neno bo'ha ma fai bo'ha.
Currently Selected:
KELUARAN 24: AOZ
Highlight
Copy
Compare
Share
Want to have your highlights saved across all your devices? Sign up or sign in
