KELUARAN 23
23
Monit nek amneot ma nek muti
1“Kais hi mitutab uab poi, ma kais amtuntaku atoni maufinu le anfani saksi neu lasi amle'ut. 2Kais hi mo'e mituin atoni amfaut leka sin anmo'e ansan ai an ele ma antanhai plenat ma le anfani saksi neu lasi amle'ut. 3Kais ambeti masaf ma humaf anbi lef lasi in nanan, maski nak atoni le him lefi in lasi nane atoni amamu'it.
4Leka hi mit hi musu sin bijae ai in bikase luke mnanu le ansek, so hi meki mifani neu tuaf na'ko mu'it nane. 5Leka hi musu sin bikase luke mnanu natsel natuin in baut mafena, amtuntaku in he mifena bikase luke mnanu nane, ma kais mifetin in.
6Miton amneot neu atoni amamu'it, leka in nem neki in lasi neu alef lasi sin matan. 7Mu'lon ho monim na'ko poi, ma kais mumofu atoni asanat he namate in, natuin Au ka umneob fa atoni le anmo'e maufinu onane. 8Kais amsimo baen, natuin baen nane of nafolob atoni neu amneot, ma namofu atoni-atoni le ka nasanab fa.
9Kais amtamni' ma misusu' atoni anao amnemat; hi mihin monit onme atfani atoni anao amnemat, natuin afi nahunut him fani atoni anao amnemat anbi pah Mesir.”
Ton hitu ma neno hitu
10“Anbi ton ne in nanan nabe'i him lue hi lene ma nabe'i him nibun in fuan. 11Mes antam ton hitu so hi mifetin afu le nane. Anbi ton mese nane in nanan hi ka nabe'i fa hem nibun sa' le anmoni anmes anbi hi lene. Mifetin neu atoni amamu'it, ma in nesin maut he neu mu'i fui. Anmo'e onan amsa neu lene tua min kase ma neu hi bub fua mina.
12Neno ne anbi klei mese in nanan nabe'i hi mepu, mes anbi neno hitu so hi misnas, he nati' hi mu'it sin, hi ate-ate sin, ma atoni-atoni anao amnemat le' anmepu neu ki sin nabe'i nas-nas amsa.
13Ampanat ale sa' le Au uton ulali neu ki. Kais mibes neu uisneno teta, ma ka nabe'i fa hem tek in kanan amsa.”
Lekat lulut neu neno-neno naek sin
(Kel. 34:18-26; Ul. 16:1-17)
14“Anbi ton-ton so hi minaeb neno naek tenu he nati' hi miliatas Kau. 15Anbi funan ahunut (Abib), anbi leku le maleka nalali, so hi minaeb tolas utunu' le ka malalu haef fa nok lanan le Au uplenat ulali neu ki, natuin anbi funan le nane him poi misaitan pah Mesir. Kais hi miah utunu' le anmo'e neki lalu haef anbi tolas neno hitu in nanan.
16Minaeb Tolas La' Hau No' anbi tabu him seki luet ahunut anbi hi lene. Minaeb Tolas La' Hau No' anbi ton in amsopun leka hi mibuab milali hi lene tua min kase in fuan ma lene hau fua.
17Anbi ton-ton leka hi minaeb neno naek tenu en nane, ale atoni-atoni so nem ma nabes neu Kau, hi Uisneno.
18Kais hi mitulu utunu' le amtao lalu haef leku hi mi'tulu' mu'it neu Kau. Mu'it in afan le hi mitulu neu Kau anbi neno-neno naek nane, ka nabe'i fa he hi mihena talante neno noka.
19Anbi ton mese-mese hi meki ane kase le hi monu anbi ahunut anbi hi Uisneno In ume. Sisi bibi ankase ai bibi ana' ka nabe'i fa he mihan meki in ainan in susu.”
Fef bela ma plenat
20“Of Au lenu ahake neno nahunun ki he nati' anpanat ki anbi lanan ma neki ki neu bale le au uloitan ulali. 21Ampanat nai ma mituin nai in. Kais amlaban in fun Au es a'lenu in, fun in of kan sako fa hi tanhais sin. 22Leka hi mituin in, ma hi minaob ale Au plenat sin, of Au maken ma laban ale hi musu sin. 23Au ahake nane of in nao nahunun ki ma neki ki amtam meu pah atoni Amori, Het, Feris, Kanaan, Hewi ma Yebus, ma of Au ule'un ani sin. 24Kais mibes neu fatu le'u ma hau le'u le anpanat sin, ma kais him tao mituin sin luli besa. Miskuku sin fatu ma sin hau mamasa le anpanat sin nane, ma am ipu ni fatu-ni fatu le sin anpake neu luli besa. 25Leka hi mibes neu kau, Uisneno, of Au fe ki tetus nok mnahat ma mninut, ma of Au u'lob ale menas na'ko ki. 26Anbi hi pah of kan mu'i anteni fa le namofu li'ana ai bife le ankiu. Ma of Au fe ki ua mnanu.
27Uf-uf le him tam ambine of namtausan ki; ma of Au usitab sin; ale ho musu sin of sin anfen ma sin naenan. 28Of Au usitab hi musu sin, ma uf-uf Hewi, Kanaan ma Het of Au li'u sin na'ko hi matam he nati' him nao mat piut. 29Au mes ka li'u fa sin oke anbi ton mese in nanan, he nati' afu nane kais mafetin ma kais mu'i fui anfoe nasek'on. 30Of Au li'u sin kle'o-kle'o, talante hi atoni sin namfau hen toko natau pah nane. 31Of Au lek ani ekat neu pah le nane na'ko Tasi nonof Akaba ante Noe Efrat, ma na'ko Tasi Tnana ante mnela snaen. Au fe kuasat he hi miplenat atokos abit pah le nane, talante nabe'i him li'u sin, leka him tam anbi pah nane. 32Kais hi mo'e Fef Bela mok atoni-atoni nane ai mok sin fatu le'u ma hau le'u. 33Kais mifetin atoni-atoni nane he sin namaika anbi hi pah, he nati' kais hi mibes neu sin fatu le'u ma sin hau le'u ma hi misanab neu Kau. Leka hi mibes neu sin fatu le'u ma sin hau le'u, hi mofu ambi kle'o maten in nanan.”
Currently Selected:
KELUARAN 23: AOZ
Highlight
Copy
Compare
Share
Want to have your highlights saved across all your devices? Sign up or sign in
