KELUARAN 18
18
Nai Yitro anao ma ansenu Nai Musa
1Nai Musa, in babaf, Nai Yitro, Ana' fuat knino anbi pah Midian, in nen neu Uisneno anmo'e ale sa' neu Nai Musa ma to Israel, anbi leku In napoitan sin na'ko pah Mesir. 2Es nane te Nai Yitro in anao ma ansenu Nai Musa, in neki bi Zipora, Nai Musa in fenai le fe namaika anbi pah Midian, 3in nok Nai Gersom ma Nai Eliezer, in anmone nua sin. In anmone unu nakanab Nai Gersom natuin Nai Musa nak, “Au atoni amnemat kau anbi pah mata teme,”; 4anmone kliko nakanab Nai Eliezer natuin Nai Musa nak, “Uisneno le au na'i au be'i nabes neune In antuntaku nalali kau ma In es nafetin kau talante Kesel Mesir ka namate kau fa.” 5Nai Yitro nem nok Nai Musa in fenai ma in anah nua sin neu mnela snaen bale Nai Musa nahakeb in um-ume anhaumak nok tubu knino. 6In anfe hanaf neu Nai Musa nak of sin neman, 7es nane te in anpoi ma ansenu sin. In nabes anbi Nai Yitro in matan ma anek in. Ma sin mantotin es nok es neu sin aominan ai kahaf, oke te sin antaman neu Nai Musa in um-ume. 8Nai Musa natonan in babaf ale sa' le Uisneno anmo'e nalali neu kesel ma neu to Mesir he nati' nafetin to Israel. In amsa naton neune ale mafena-mafena le Israel naeku ma natef anbi lanan atnanan, ma onme Uisneno nafetin sin. 9Leka Nai Yitro in nena ale lasi nane in namlil 10ma in nak, “Pules liatas neu Uisneno le anfe ki aomina ma nafetin ki na'ko kesel in niman ma na'ko to Mesir! Pules liatas neu Uisneno le nafetin to Israel na'ko lasi aten! 11Tabu le i au uhin nak Uisneno nane naek anesin ale uisneno teta, natuin ale lasi le In anmo'e nane leka atoni Mesir sin naton neka naeb neu to Israel.” 12Nalali te Nai Yitro neki tulu mnotu ma tulu lolot anfani tulu neu Uisneno. Nai Harun nok ale atopus to Israel sin nem ma anbukae nok Nai Yitro anbi Uisneno In human ma In matan.
Nai Musa na' naiti alef lasi sin
(Ul. 1:9-18)
13Anbi noka fa Nai Musa anlefi lasi matoes anbi atoni-atoni Israel. Mepu nane nah tabu na'ko nok-noka antia fai nanesab. 14Leka Nai Yitro ankiso ale Nai Musa in mepu sin in natoti nak, “Sa' es mes ho he mepu neu to le i? Ale mepu i mes ho mese mepu sin, talante al hen toti ho fainekat, atoni-atoni nane mes anhake anbi i na'ko nok-noka talantia anfai?”
15Nai Musa natae nak, “Atoni-atoni nane sin nem neu kau he nati' nahin Uisneno In lomin. 16Kalu sin anmabanan, sin nem neu kau he nati' au ufek sin lasi, ma au utiaba neu sin ale plenat ma lekat lulut Uisneno.”
17Nai Yitro nak, “Ka leko fa onane. 18Nok lanan nane ho muhaeb ho aom, ma atoni-atoni nane amsa. Mepu nane mafena neu atoni mese. 19Mutnin au fainekat, ma Uisneno of antuntaku ko. Namneo leko hom fani on aseka neu to le i anbi Uisneno In matan, ma ho meki sin lasi neu In. 20Ho mes munoina neu sin plenat-plenat Uisneno ma muton neu sin monit alekot ma sa' le sin he nanaoba nani. 21Mes naik na'ko nane mes hom beti atoni fauk-fauk le mahine, ma amlek sin hen fani atopus neu atoni nifun mese, atoni natun mese, atoni bo'nim, ma atoni bo'mese. Sin le nane so atoni-atoni le namtausan ma na'ki neu Uisneno, atoni le mapalsai ma le kan lomi fa hen simo noni mate. 22Ma amlenu sin hen fani on alef lasi neu to le i, es-es neu in nonot. Mepu nane mes sin nanaoba nani nok alekot. Lasi-lasi mafena nabe'i sin neki nem neu ko, mes mabanat le an-ana nabe'i sin naloitan nani. Lasi nane of anhakaf ko ma sin ansutai anpeni ko. 23Leka ho mo'e onane, ma lasi nane Uisneno es naplenat nani neu ko, ho mes nabe'i munaoba ho mepu, ma ale atoni of sin anfani nok malinat natuin sin lasi mapaloli nok manoe.”
24Nai Musa natuin Nai Yitro in fainekat, 25ma in anbeti atoni-atoni ahinet na'ko to Israel sin atnanan. In anlek sin anfani atopus neu atoni nifun mese, atoni natun mese, atoni bo'nim ma atoni bo'mese. 26Sin nanaoba sin mepu anfani alef lasi neu to Israel. Ale lasi mafena sin neki neu Nai Musa, mes lasi-lasi a'baut sin anmes naleko nani. 27Nalali te Nai Musa nafetin Nai Yitro anao ma anfani neu in pah.
Currently Selected:
KELUARAN 18: AOZ
Highlight
Copy
Compare
Share
Want to have your highlights saved across all your devices? Sign up or sign in
