KELUARAN 17
17
Oe anpoi na'ko fatu naek
(Bil. 20:1-13)
1Nalali onane te ale to Israel sin nasaitan mnela snaen Sin ma sin natnani na'ko bale es neu bale bian onle Uisneno naplenat nani. Anbi leku mese leka sin nahakeb um-ume anbi Rafidim, mes anbi nane kan mu'i fa oe mninu. 2Oke te sin namunu Nai Musa nak, “Amfe neu kai oe mninu.” Nai Musa natae nak, “Nansa' hi mimunu ma amsu' Uisneno?”
3Mes natuin atoni-atoni nane sin anmenon es nanete sin na'munu' Nai Musa piut. Sin namolok nak, “Nansa' es ho meki kai ampoi mi'ko pah Mesir? He nati' hai, ma hai anah sin, ma hai mu'it sin anmate natuin meno?”
4Es nane te Nai Musa in onen ma ansakoi neu Uisneno, nak, “Of au mo'e sa' ka neu atoni-atoni le i? Amkiso nai, sin hen poli kau neki fatu.”
5 Uisneno nakua a'an neu Nai Musa nak, “Amboin atopus fauk-fauk ma amnao mihunun to le nane. Meki tias le hom pake ma amlulun neu Noe Nil. 6Of Au hake bi ho matam anbi fatu naek mese anbi Tubu Sinai. Amtepo fatu nane, ma oe of anpoi talante atoni-atoni nane sin ninu.” Nai Musa anmo'e onane ma ale atopus Israel sin ansaksi lasi nane.
7Nai Musa nakanab bale nane Masa natuin anbi bale nane atoni Israel ansu' Uisneno anbi tabu sin natan nak, “Uisneno nok kit ai kahaf?” Bale nane amsa nakanab nak Meriba natuin anbi bale nane atoni Israel sin namunu.
Makenat nok atoni Amalek
8Namuni te atoni Amalek sin nem ma anmaken nok atoni Israel anbi Rafidim. 9Nai Musa nak neu Nai Yosua nak, “Ambeti nai atoni fauk-fauk he nati' amaken mok atoni Amalek. Noka fa of au hake bi tubu in tunan ma au na' tias le Uisneno anlenu kau ma au eki.” 10Nai Yosua anmo'e sa' le Nai Musa naplenat nani neune. In nao ma anmaken nok atoni Amalek, Nai Harun ma Nai Hur sin ansae neu tubu nane in tunan. 11Anbi tabu Nai Musa na' naiti in niman, atoni Israel sin nisan. Mes leka Nai Musa nasanut in niman, atoni Amalek sin nisan. 12Leka Nai Musa anhae, Nai Harun ma Nai Hur sin antao fatu mese he nati' Nai Musa antok anbin; Nai Harun ma Nai Hur anhake anbi Nai Musa in aon bian a'li ma bian a'ne'u ma antuntaku in niman, he nati' na'aition piut talantia manas antes. 13Namuni te Nai Yosua in nis ma anbe'u atoni Amalek.
14 Uisneno nakua a'an neu Nai Musa nak, “Amtui antom lasi mnisat le i he nati' hi mimnau piut. Mutonan Nai Yosua mak of Au ule'un atoni Amalek.” 15Oke te Nai Musa nafena baki tulu mese ma in nakanab nak “Uisneno nane au pen-pene.” 16Nai Musa nak, “Miaiti nai pen-pene Uisneno! Uisneno anmaken ma anlaban atoni Amalek tal nabal-bal!”
Currently Selected:
KELUARAN 17: AOZ
Highlight
Copy
Compare
Share
Want to have your highlights saved across all your devices? Sign up or sign in
