AMOS 8
8
Mnitas neu ki'u lai hau fua
1Au upeni mnitas mese anteni na'ko Uisneno Anesit Afinit. Au it ki'u mese le nahenu nok hau fua le namnatu. 2Uisneno natoti kau nak, “Ho mit sa' ka, Amos?”
Au utae ak, “Au it ki'u mese le matua nok hau fua le namnatu.”
Uisneno nak, “To Israel in tabu antia nalali. Of Au ka ubaina fa Au salit anteni ma namneo of Au kas sin. 3Anbi tabu le nane sit pules anbi sonaf-sonaf of anfani kaet kulut. Aon nitu of mapolin anbi me-me nok amnes-amnes.”
An kas Israel
4Amnen nai, hoi hi le misusu' atoni amamu'it talante sin anmoni nok nukat ma susal. 5Hi mimolok neu hi aom mak, “Lo matani kun neno ekut buat nane lo in lo le'uf kun. Hit atsali he tasosa tani hit ane kase lab-labah, mes neno naek le i ka oke nit fa. Of leka ka Neno Sabat nane namsopu, he nati' hit tasosa ateni? Hit lomi het lakan, ma atfuli teki su'at ma tapoibok teki atnais. 6Ane kase le namle'u hit tasosa nok upa naek. Hit tami atoni amamu'it le kan baen nabe'i fa sin tusa', maski nak tusa le nane alkun neu peni haef pasan mese in upan, ma hit atsostan sin anfani hit ate.”
7 Uisneno, atoni Israel sin Uisneno, naiti nani han sukat nak, “Of Au ka nikan fa sin mo'et maufinu le nane. 8Pah pinan of anlilitai ma ale atoni of nasusab sin nekan. Ale pah anfun natef of anainun ma of an oki on Noe Nil. 9Antia in tabu of manas antes anbi neno namtetu ma pah pinan of namesok anbi tabu manas. Au, Uisneno Anesit Afinit, es ukua ulali Au a'ak onane. 10Ho ekut buat sin of Au ubaina anfani buat susal ma ho sit-sit sin anfani kaet kulut. Hi nakan nafun of maeu' ma of him pake kalo anfani taka' neu hi nek tu'as. Of him fani onle amaf ma ainaf le sin ankae natuin sin anah mese la anmate. Neno nane of namsopu neki nek tu'as ma susal.”
11 Uisneno Anesit Afinit nakua a'an nak, “Antia in tabu of Au usanut snama amnahas neu pah le i. Atoni of namnah, mes ka namnahan fa amnahat. Atoni of anmeno, mes kan menon fa oe. Sin namnahan ma anmenon Au fef ba'an. 12Atoni of anfun natef na'ko neno kabenan a'li neu kabenan ne'u ma na'ko neno saet neu neno tesan he naeku nok Au fef ba'an nane mes of sin ka naeku nokan fa. 13Anbi neno le nane ale atoni munif ma ale aomina sin of sin natselan natuin sin anmenon. 14Atoni-atoni le naiti sukat natuin uisneno teta Samaria le namolok nak, ‘Natuin uisneno teta uf Dan’, ai ‘Natuin uisneno teta Bersyeba’ – of sin natselan ma kan fen anteni fa.”
Currently Selected:
AMOS 8: AOZ
Highlight
Copy
Compare
Share
Want to have your highlights saved across all your devices? Sign up or sign in
