JEHESKIEL 46

Parkuaso dohot angka aturan ni pesta

1Didok Tuhan Debata i ma, “Angkon tongtong do martutup anggo pintu horbangan Habincaran laho tu alaman parbagasan salolot onom ari karejo. Hum di Ari Sabat dohot di Pesta Bulan Baru do na tola bukaon horbangan i. 2Anggo di ari-ari na songon i angkon masuk sian alaman parruar i do parkuaso. Taran manghaulkon haul situtungon dohot haul pardamean na sian parkuaso i angka malim, angkon manungkap ia di pintu ni horbangan i marsomba tu Tuhan, dung i kehe ma ia. Lalu tu bornginna i, nada tola tutupon horbangan i. 3Laing di jolo ni horbangan i, angkon sude rayat i manungkap marsomba tu Tuhan ganop Ari Sabat dohot di Pesta Bulan Baru.

4Di Ari Sabat, angkon haulkonon ni parkuaso do tu Tuhan haul situtungon, i ma onom anak ni biri-biri dohot sada lombu jantan, sudena i na so martihas. 5Rap dohot lombu jantan i angkon haulkononnia muse 17,5 liter haul gandum rap dohot sada be anak ni biri-biri i, angkon haulkononnia muse haul gandum sanga sadia bahat giotnia. Ganop dibaen haul gandum i angkon ihut do dihaulkon tolu liter miak zetun.

6Di Pesta Bulan Baru angkon sada lombu jantan do baenon haulna, onom anak ni biri-biri dohot sada hambeng jantan, sudena i nada tola na martihas. 7Rap dohot lombu i sada dohot hambeng jantan i, angkon haulkononnia gandum bahatna 17,5 liter, jana rap dohot ganop anak ni biri-biri i angkon haulkononnia sanga sadia bahat giotnia. Ganop haul gandum i angkon dohot do donganna tolu liter miak zetun.

8Muda giot marsomba parkuaso i di BagasKu, angkon masuk sian bilik na lapang i do ia, jana laho mulak pe angkon sian i muse. 9Tapi anggo rayat na marroan marsomba tu Tuhan di angka ari na godang, jadi angka na masuk sian horbangan Utara, angkon sian horbangan Selatan do laho mulak dung sidung halahi marsomba. Jana angka na masuk mamolus sian horbangan Selatan, angkon mamolus sian horbangan Utara do laho mulak. Diorai do halak mulak mamolus sian dalan na nibolusnia laho masuk; angkon mamolus sian horbangan na sabariba nari do laho mulak. 10Angkon rap masuk do parkuaso rap dohot rayat i tu Bagas Ni Tuhan i jana parmulakna pe angkon rap do.

11Di angka ari pesta dohot parayaan, rap dohot sada lombu jantan dohot sada biri-biri jantan angkon haulkonon do 17,5 liter gandum, jana rap dohot ganop anak ni biri-biri laing haulkonon do gandum i sanga sadia bahat giot ni halakna na marsomba i. Ganop haul gandum angkon ihut do dohot na manghaulkon tolu liter miak zetun.

12Muda por roha ni parkuaso i laho mangalehen haul sian rohana sandiri tu Tuhan, sanga na haul situtungon pe i sanga pe haul pardamean, angkon bukaon do horbangan Habincaran na torus tu alaman na di bagasan i tusia. Angkon haulkononnia do i laing sarupa songon pambaenna di Ari Sabat, tapi disi mulak ia, angkon manigor tutupon do horbangan i mangulahi.”

Haul siganop ari

13Didok Tuhan ma, “Ganop ari taran manyogot, angkon haulkonon do sada anak ni biri-biri na marumur sataon jana na so martihas gabe haul situtungon di Tuhan. 14Tamba ni i, ganop manyogot angkon laing haulkonon muse do dua kilo gandum dohot saliter miak zetun sicampurkonon dohot gandum i. I ma haul gandum sihaulkonon ganop ari di Tuhan; sapanjangna do dalankonon aturan i. 15Ganop manyogot angkon torus do sapanjangna haulkonon di Tuhan: Sada anak ni biri-biri, haul gandum dohot miak zetun.”

Tano ni raja

16Didabu Tuhan Debata i ma parenta, mandok, “Muda dilehen sada halak parkuaso na mamarenta deba sian tano pusakona tu sada halak anaknia, gabe tano ni anaknia i noma i jana masuk tu bagian panjaeanna ma i. 17Tapi muda dilehen parkuaso i tano pusakona i deba tu hatobanna, mulak do tano i muse gabe nampuna ni parkuaso i di Taon Hamumulak.#46:17 TAON HAMUMULAK: Sanoli di bagasan lima pulu taon, sandok halak Israel angkon mangalehen habebason tu angka dongan sabangsona na gabe hatoban hara ni utang. Halahi pe angkon paulahonna do tu nampuna parjolo tano pusako na targadis hara ni utang. Ia do nampuna tano i jana hum ia do dohot angka dakdanaknia na tola torus gabe nampuna tano i. 18Saotik pe nada tola buaton ni parkuaso i anggo sian arta pusako ni rayatna i. Hum tanonia sandiri do na tola lehenonnia tu angka anaknia, anso ulang adong sahalak pe sian bangsongKi na disirang sian sinadonganna.”

Angka dapur na di Bagas Na Badia

19Dung i dioban bayo i ma au mamolus sian pintu na di lambung ni horbangan i tu angka kamar na badia na mangadop tu Utara. Na hasaya tu angka malim do diparade kamar-kamar i. Ditudu bayo i ma tu bilik parujung sabola Hasundutan, 20jana didok ia ma, “Di inganan on ma angkon bolgangon ni angka malim haul hasesaan ni dosa dohot haul panobus ni hasalaan. Dison muse do ditutung haul gandum, anso ulang adong saotik pe sian haul na badia i hona oban tu alaman parruar gabe hamamago tu rayat.”

21-22Dung i dioban ia ma au tu ruar jana dipatidahon ia ma tu au, adong do hape di suhi-suhina na opat i ganop be sada alaman na ummenek, 20 meter ginjangna jana 15 meter bidangna. 23Dihuliangi tembok batu do angka alaman i, jana adong ma angka dalihan di tembok i. 24Didok bayo i ma tu au, “Angka on ma dapur inganan ni angka pangoloi ni Bagas Na Badia, angkon dison ma lompaon ni halahi angka haul sihaulkonon ni rayat i.”

Currently Selected:

JEHESKIEL 46: LAIAKB

Highlight

Copy

Compare