JEHESKIEL 47

Mual ni aek na ruar sian Bagas Na Badia

1Dioban bayo i muse ma au tu pintu masuk ni Bagas Na Badia i. Huida ma aek mamolus sian toru ni pintu i kehe sabola Habincaran. Mardalan sian toru ni Bagas Na Badia i do aek i sabola Selatan mamolus sian topi sabola Selatan ni langgatan i. 2Dung i dioban bayo i ma au ruar mamolus horbangan Utara jana ditogu ia ma au tu horbangan Habincaran. Mamolus sian topi sabola Selatan ni horbangan i do bondar na menek i. 3Di na lalu marsuhat ia dohot tungkot pangukurnia i, lalu dioban ia ma au paihut-ihut pardalan ni aek i tu Habincaran lima ratus meter daona, jana disuru ia ma au taripar. Anggo di inganan i hum olat ni tambihul do bagas ni aekna i. 4Dung i disuhat ia ma lima ratus meter nari, jana lalu tu gonting bagas ni aekna i. 5Sanoli nari disuhat ia ma lima ratus meter nari, jana mabagastu do disi aekna i anggo boluson mardalan pat. Muda giot taripar halak disi angkon marlange noma i. 6Jadi didok bayo i ma tu au, “Ale jolma parsantongkinan, tangkas ma parrohahon sudena on.”

Dung i dioban ia ma au mangulahi paihut-ihut batang aek i, 7jana huida ma hape na bahat sajo do hayu di topi ni batang aek i angkup bariba. 8Didok ia ma tu au, “Mamolus tu Habincaran do batang aek on manyalpui luat on lalu tu Rura ni Batang aek Jordan lopus tu Laut Mate. Muda dung lalu aekna tu bagasan Laut Mate, digonti ia ma aek laut na ancim i dohot aek tawar. 9Sanga na tu dia pe batang aek on mamolus, adong muse ma disi sude ragam ni ihan dohot binatang na asing i. Gabe tawar dai ni aek ni Laut Mate dibaensa jana sanga na tu dia pe mamolus batang aek i, adong ma dumpang disi hangoluan. 10Sian angka mual haroroan ni aek na di En-Gedi lopus tu angka mual ni aek na di En-Eglaim, ribur ma disi angka parihan na manjomuri jalana disi. Sude ragam ni ihan adong ma dapot di bagasan aek i, laing songon na dumpang di Laut Tonga. 11Tapi anggo aek na di ombik-ombik dohot paya-paya na adong sapanjang topi ni laut i nada ra gabe tawar, tapi laing hot do i pambuatan ni sira. 12Sapanjang topi ni batang aek angkup bariba martubuan do sude bona ni hayu sipanganon, nada unjung malos bulung ni hayu-hayu jana batuna pe nada marnamantak. Ganop bulan do bona ni hayu i marbatu, hara ni aek na sian Bagas Na Badia i mangaehisa. Sipanganon do angka batuna i jana bulungna marguna baen ubat.”

Angka batas ni tano

13Didok Tuhan Debata i ma, “On ma batas-batas ni tano na giot bagi-bagion tu angka marga ni Israel na dua bolas i. Horong Josep manjagit dua bagian.#47:13 DUA BAGIAN: Marga Manase dohot Efraim anak ni si Josep i manjagit sabagian be. 14Na dung Husumpahon do na giot lehenonKu tano i tu ompumunu. Hara ni i, buat ma tano i jana bagi-bagi ma i tigor di hamu be.

15Batas na di Utara mamungka sian Laut Tonga manuju tu Habincaran lalu tu kota Hetlon, sabola Hamat, torus tu kota Zedad, 16tu Berota dohot Sibraim (di antara ni kota Damaskus dohot kota Hamat do parpayak ni angka kota i), dung i tu kota Hasar-Enan di parbalohan ni kota Hauran. 17Jadi batas sabola Utara, mamungka ma i sian Laut Tonga lopus tu Habincaran, tu kota Hasar-Enan; jadi anggo luat ni Damaskus dohot Hamat, sabola Utara ni parbatasan do i.

18Parbatasan sabola Habincaran lalu tu Selatan, mamungka sian sada inganan antara ni luat ni Damaskus dohot luat ni Hauran. Jadi Batang aek Jordan ma batasna antara ni tano ni Israel di Hasundutanna dohot Gilead di Habincaranna, lopus tu Tamar na di topi ni Laut Hamatean.

19Anggo batas sabola Hasundutan lopus tu Barat Daya, sian Tamar lalu tu mual Kades-Meriba, lalu tu Barat Laut na marbatas dohot Mesir lopus tu Laut Tonga.

20Anggo batas sabola Hasundutan mangihutkon potongan ni Laut Tonga do i, lalu tu Utara tu sada inganan di Hasundutan ni dalan laho tu Hamat.

21Bagi-bagi ma tano i di hamu be, mangihutkon angka marga-marga ni Israel; 22jana nampunamunu noma tano i salolot-lolotna. Angka halak sileban na dung hot maringanan di tonga-tongamunu jana na adong dakdanakna na sorang dison, angkon maruli bagian do di tano i. Angkon etongon do halahi songon anggota na gok di bangso Israel, jana angkon dohot do halahi undion anso maruli tano di hatiha dibaen pambagian ni tano i di angka marga-marga ni Israel. 23Ganop halak sileban angkon dilehen do tano rap dohot marga ni Israel sanga na di dia ia maringanan. Au Tuhan Debata madung mandok songon i.”

Currently Selected:

JEHESKIEL 47: LAIAKB

Highlight

Copy

Compare