JEHESKIEL 45

Angka tano na dipaasing gabe bagian ni Tuhan

1Taran so dibagi-bagi dope tano i gabe pusako ni ganop marga, angkon jolo dipaasing do sabagian di Tuhan. Angkon dua bolas satonga kilometer do ginjang ni tano i, jana bidangna sampulu kilometer. Ditontuhon ma sude tano i na badia. 2Diparade ma sian tano i baen di Inganan Na Badia marsogi opat, dua ratus lima pulu meter ma ganop topina i jana dihuliangi tano lapang dua pulu lima meter bidangna. 3Satonga sian tano ginjangna dua bolas satonga kilometer jana bidangna lima kilometer angkon paradeon do, disi ma inganan na badia, jana Inganan Na Sun Badia do i. 4Na badia do tano i, jana na niparade gabe bagian ni angka malim na markarejo mangoloi Tuhan di Bagas Na Badia i. Baen parbagasan ni halahi ma deba sian tano i jana na deba nari baen inganan hajongjongan ni Bagas Na Badia. 5Satonga nari sian tano i, i ma sidua bolas satonga kilometer noli lima kilometer i, siparadeon di halak Levi noma i na markarejo di bagasan Bagas Na Badia. Disi ma sipajongjongon angka kota baen inganan ni halahi.

6Di lambung ni tano na badia i, angkon laing diirahon dope tano ginjangna dua bolas satonga kilometer jana bidangna dua satonga kilometer, baen inganan ni sada parkotaan siinganan ni sanga ise sian bangso Israel.

Tano baen di parkuaso na mamarenta

7Diparade muse do tano di parkuaso na mamarenta. Gistang do tano i sian batas na di Hasundutan ni tano na ditontuhon hapunjungan ni Tuhan i lopus tu Laut Tonga, jana sian batas sabola Habincaran ni tano na ditontuhon gabe hapunjungan ni Tuhan i lopus tu batas Habincaran ni luat i. Jadi sarupa ma ginjangna dohot ginjang ni sada bagian ni tano na dilehen tu marga-marga ni Israel. 8Gabe tano ni angka parkuaso na mamarenta di tano Israel ma i, anso ulang sai dipisat halahi be rayat i, tapi anso dilehen halahi salobi ni tano i gabe bagian ni angka marga-marga ni Israel.

Angka sipatupaon ni parkuaso na mamarenta

9Didok Tuhan Debata i ma, “Tuk ma da angka dosamunu i, ale angka parkuaso ni Israel! Antak hamu ma na mambaen roha-rohamunu i dohot na mamisat rayat i. Baen hamu ma na tigor dohot na sintong. Na so jadi usironmunu be bangsongKu sian tano ni halahi. Au, Tuhan Debata do mamarentahon i tu hamu.

10Timbangan dohot parsuhatan na tutu ma pake hamu.

11Saefa parsuhatan ni sisuhaton na mahiang angkon sarupa isina dohot sabat disuhat-suhat ni na maraek. Angkon sahomer do suhat-suhatna. Jadi angkon songon on ma suhat-suhat i:

1 homer#45:11 HOMER: Parsuhatan tu na mahiang dohot na maraek, hira-hira 17,5 liter. 1 Homer = 10 kaleng. = 10 efa#45:11 1 efa = 1 bat, hira-hira 17,5 liter. 1 efa = 1 kaleng. = 10 bat

12Angkon songon on do timbanganmunu:

1 sikal#45:12 SIKAL: Hasadaon ni timbangan di hatiha ni si Jeheskiel, hira-hira 11,4 gram. = 20 ringgit

1 mina = 60 mas

13-15On ma sitiopan ni ukuran laho manontuhon angka haul:

gandum:

1/60 bagian sian na dapot

bajaure:

1/60 bagian sian na dapot

miak zetun:

1/100 bagian sian na dapot

(Suhat ma dohot bat: 10 bat = 1 homer = 1 kor)

biri-biri:

sada biri-biri sian ganop 200 biri-biri.

Angkon haulkononmu do haul gandum, haul situtungon dohot haul pardamean, anso disesa angka dosamunu. Au Tuhan Debata do na mangalehen parenta taringot tusi.

16Angkon obanon ni halak na saluat on do angka haul tu parkuaso na mamarenta di Israel. 17Angkon paradeonnia do pahan-pahanan baen haul situtungon songon i angka sipakeon baen tu haul gandum dohot haul anggur di sude bangso Israel muda dapot di ari pesta Bulan Na Imbaru, di Ari Sabat dohot angka ari pesta na asing i. Angkon paradeonnia do haul hasesaan ni dosa, haul gandum, haul situtungon, dohot haul pardamean laho mangido anso diampuni bangso Israel.”

Angka ari na godang

(Har. 12:1-20; Ham. 23:33-43)

18Didok Tuhan Debata i ma tu bangsoNia i, “Di tanggal sada bulan sada, angkon paiasonmunu do BagasKu marhite na manghaulkon sada lombu jantan na so martihas. 19Angkon buaton ni malim do mudar na sian haul hasesaan ni dosa i, lalu diapuskon ma i tu angka tiang ni pintu ni BagasKu, songon i muse tu na opat suhi-suhi ni langgatan, dohot di angka pintu ni horbangan laho tu alaman na di bagasan i. 20Laing songon i muse ma baenon di tanggal pitu bulan i, di sude halak na dung mambaen dosa sian na so diuntil sanga hara ni na so dibotosa. Songon i ma baenonmunu laho manjago habadiaan ni BagasKu.

21Di tanggal opat bolas bulan sada, angkon pestahononmunu do Pesta Paskah. Pitu ari honokna angkon mangan roti na so marragi sude halak. 22Di ari na parjolo, angkon haulkonon ni parkuaso na mamarenta do sada lombu jantan baen haul hasesaan ni dosa disia sandiri dohot di sude rayat i. 23Salolot pesta sipitu ari i, ganop ari angkon haulkononnia do tu Tuhan pitu lombu jantan dohot pitu biri-biri jantan na so martihas, lalu ditutung ia ma i himpal-himpal. Ganop ari angkon haulkononnia do sada hambeng jantan baen haul hasesaan ni dosa. 24Asing ni i angkon haulkononnia dope gandum bahatna 17,5 liter tu ganop sada lombu jantan dohot tolu liter miak zetun tu ganop sada biri-biri jantan.

25Di Pesta Undung-undung Bulung Rata na mamungka di tanggal lima bolas bulan pitu, ganop ari dibagasan pitu ari honokna angkon haulkonon ni parkuaso do angka haul na sarupa, i ma haul hasesaan ni dosa, haul situtungon dohot haul gandum dohot miak zetun.”

Currently Selected:

JEHESKIEL 45: LAIAKB

Highlight

Copy

Compare