JEHESKIEL 44

Horbangan Habincaran na tartutup

1Dung i ditogu bayo i ma au mangulahi tu horbangan parruar na di sabola Habincaran di Bagas Na Badia i. Martutup do horbangan i 2didok Tuhan ma tu au, “Angkon totop do tutup anggo horbangan on, nada tola bukaon. Sahalak pe nada tola adong masuk sian i, angke Au Tuhan, Debata ni Israel, madung masuk Au sian horbangan on. Jadi angkon totop do martutup anggo horbangan on. 3Tapi tola do kehe anggo angka parkuaso na mamarenta tu dalan ni horbangan on laho mangankon sipanganon na badia di adopanKu. Angkon mamolus sian bilik na lapang i masukna jana laho mulak pe laing sian i muse.”

Hatorangan taringot tu paribadat dohot tu angka malim

4Dung i dioban bayo i ma au tu horbangan Utara na paadop-adop dohot Bagas Na Badia i. Hupamanat ma, jana huida ma Bagas Na Badia i digohi sinondang na marlinang-linang na patandahon haroro ni Tuhan. Dung i manungkap ma au jana marsomba, 5jana didok Tuhan ma tu au, “Ale anak ni jolma parsantongkinan tangkas ma parrohahon sanga aha na niidamu dohot na nibegemu. PaboaonKu ma tu ho sude paraturan dohot uhum salaho tu BagasKon. Tangkas ma suratkon sanga na angka ise na tola masuk tu BagasKon dohot na so tola masuk.

6Dokkon ma tu halak Israel na sai tagi-tagi mangalo i bahaso Au Tuhan Debata, nada ra be Au padiarkon halahi mambaen hodar. 7Madung dipahodar halahi BagasKu, angke taran manghaulkon tabo-tabo dohot mudar ni haul i tu Au dipaloas halahi do masuk tu bagasan angka halak sileban na so marsunat jana na so marpangoloion tu Au. Markite-hite angka parbuatan ni halahi na nihagigihon i, dilaosi halahi do parjanjianKu dohot halahi. 8Indada be halahi na mangatur angka upacara na badia di bagasan BagasKi, tapi angka halak sileban na nitugaskon ni halahi i noma mandalankon.

9Au Tuhan Debata, pabotohon, ganop halak sileban na so marsunat dohot halak na so marpangoloion tu Au, nada tola masuk tu BagasKi. Laing songon i muse do dohot tu halak sileban na hot maringanan ditonga-tonga ni bangso Israel.”

Dipaduru angka halak Levi sian hamalimon

10Didok Tuhan ma tu au, “UhumanKu ma angka halak Levi na rap dohot angka halak Israel na asing i na manadingkon Au dohot na marsomba gana-ganaan. 11Anggo di bagasan BagasKu, hum parkarejo dohot panjago ni horbangan do na tola halahi. Tola do halahi dohot manyambol angka pahan-pahanan sibaenon haul situtungon dohot haul na asing jana angkon sai dohot do halahi mangoloi bangso i. 12Tapi hara ni na dung dohot halahi mandalankon parsombaan ni gana-ganaan di bangso Israel jana i ma dalanna umbaen na dohot tarsarat bangso i tu dosa, jadi gabe Husumpahon ma, Au Tuhan Debata manyumpahon, angkon manaon uhuman ma halahi. 13Nada tola be dohot halahi mangoloi Au songon malim sanga dais tu angka na badia di Au sanga pe masuk tu Inganan Na Sun Badia. I ma uhumanna maradopkon angka pangalaho sihagigian na nibaen ni halahi. 14Saonnari Husuru ma halahi mangkarejohon karejo na kasar na porlu sipatupaon di BagasKu.”

Angka malim

15Didok Tuhan Debata i ma, “Di na nitadingkon ni bangso Israel Au, anggo angka malim Levi na sian pomparan ni si Zadok hot do mangoloi Au di BagasKu. Hara ni i, angkon halahi noma saonnari mangoloi Au dohot na ro tu adopanKu laho manghaulkon tabo-tabo dohot mudar na sian angka haul i. 16Hum halahi do na tola masuk tu BagasKu, mangoloi Au di langgatanKu dohot manguluhon upacara paribadatan di BagasKu. 17Di na masuk halahi sian pintu horbangan laho tu alaman na di bagasan i, angkon marpakean abit linen do halahi. Nada tola halahi mamake pakean na sian abit wol muda hatiha markarejo di alaman na di bagasan i, sanga di bagasan BagasKu. 18Anso ulang mungkup sanga hodohan, angkon mamake saraor linen do halahi, nada marbobat, dohot panambat ni ulu sian abit linen. 19Muda kehe halahi tu alaman parruar, inganan parluhutan ni bangso i, angkon tadingkonon ni angka malim i do pakean dinas ni halahi di bagasan bilik-bilik na badia na di BagasKi, lalu marpakean na asing, anso ulang mangalap hamamago pakean i tu bangso i.#44:19 HAMAMAGO ... BANGSO I: Di haporsayaan ni halak narobi, marmara do angka halak na somal, muda ditondongsa sanga aha na dung ditontuhon hapunjungan ni Tuhan.

20Nada tola marcukur ulu ni angka malim sanga marginjang obuk. Angkon marpangkas pendek do hombar tu aturan na dung ditontuhon. 21Nada tola inumon ni halahi anggur muda masuk tu alaman na di bagasan i.

22Angka malim, hum bujing-bujing ni Israel na torang habujingonna do na tola buaton ni halahi, sanga tading-tadingan ni donganna malim. Nada tola buaton ni halahi boru na disirangkon.

23Angkon ajarkonon ni angka malim do tu bangsongKu sanga dia angka na ditontuhon gabe hapunjunganKu dohot na so hapunjunganku, dia na ias mangihutkon ugamo dohot na hodar. 24Muda adong tarjadi parkaro, angkon pasidungon ni halahi do i hombar tu angka aturan na sian Au. Angkon pagodangon ni halahi do angka pesta ugamo, marguru tu angka aturan dohot angka uhum na sian Au, jana angkon pasangapon ni halahi do Ari Sabat songon ari hapunjungan di Au.

25Nada tola pahodaron ni malim dirina marhite na dais tu bangke, asing ni bangke ni simatobangna, anakna, kahanggina sanga ibotona na so marbagas dope. 26Dung ias ia mangulahi, angkon painteonnia dope pitu ari nari, 27lalu kehe ma ia tu alaman parbagasan na di BagasKu, jana haulkononna haul laho paias dirina anso tola ia mangulahi markarejo ni BagasKu. Au Tuhan Debata madung mandok songon i.

28Dijagit angka malim i do jabatan hamalimon i gabe songon bagian ni halahi sian na Hulehen tu Israel marsundut-sundut. 29Angkon mangolu sian gandum na dihaulkon do halahi, sian haul hasesaan ni dosa, dohot sian haul parsiding ni hararugi, jana sasude na dung diaturkon gabe hapunjunganKu, angkon lehenon do i tu halahi. 30Angkon bagian na dumenggan do lehenon di angka malim sian sude ragam ni suha patumonaan ni suan-suanan, dohot sian sandok na dihaulkon tu Au. Ganop mambaen roti bangso Israel, anggo roti na parjolo dibaen i bagian ni malim do i. Jadi gabe pasupasuonKu ma angka bagas ni bangso Israel. 31Unggas dohot angka binatang na asing i na mate sandiri, nada tola panganon ni angka malim.”

Currently Selected:

JEHESKIEL 44: LAIAKB

Highlight

Copy

Compare