JEHESKIEL 43

Mulak ma Tuhan tu BagasNa i di bagasan hasangapan

1Dung i dioban bayo i ma au tu horbangan na mangadop tu Habincaran, 2jana huida ma disi ro sian sabola Habincaran sinondang na marsilo-silo na patandahon haroro ni Debata ni Israel. Tarbege ma sora ni Debata songon laut na gumadobur, jana marlinang-linang ma tano on hara ni sinondang ni haroro ni Debata. 3Sarupa do parnidaan i dohot na huida di na ro Debata laho mangaroncohon Jerusalem dohot songon na huida di Batang aek Kebar. Dung i manungkap ma au lalu marsomba. 4Mardalan ma sinondang na marlinang i mamolus horbangan Habincaran lalu masuk tu bagasan Bagas Na Badia i.

5Diangkat Tondi Ni Tuhan i ma au jana dioban tu alaman parbagasan i; huida ma disi Bagas Na Badia digohi sinondang ni haroro ni Tuhan i. 6Dompak jongjong dope bayo i di lambungku, hubege ma mangkuling Tuhan tu au sian bagasan ni Bagas Na Badia i mandok, 7“Ale anak ni jolma, on ma habangsangKu. Dison ma Au giot maringanan di tonga-tonga ni halak Israel jana mamarenta tu halahi salolot-lolotna. Nada be pahodaron ni halahi bope angka raja ni halahi goarKu na Badia i marhite na manyomba gana-ganaan sanga marhite na manguburkon angka raja ni halahi di inganan on. 8Dipambaeni angka raja ni halahi do angka pamalpal ni pintu dohot angka tiang ni pintu ni bagas godang ni halahi di lambung ni angka pamalpal dohot angka tiang ni pintu ni BagasKu, gabe hum sada dingding sajo noma holang-kolangna. Dipajatjat halahi do goarKu na badia i marhite pangalaho ni halahi na nihagigihon i. Hara ni i ma umbaen na Huabiskon halahi di bagasan muruk ni rohangKu. 9Tapi mamungka saonnari angkon antahon ni halahi noma manyomba gana-ganaan dohot na paimbarkon saring-saring ni angka raja ni halahi. Dung i maringanan ma Au di tonga-tonga ni halahi salolot-lolotna.”

10Dung i didok Tuhan ma mangulahi, “Ale anak ni jolma, pabotohon ma tu halak Israel taringot tu bagasKon jana suru ma halahi mamparsiajari gambaranna i. Paila ma halahi hara ni sasude dosa ni halahi. 11Jana dung maila halahi hara ni angka parbuatan ni halahi i, patorang ma gambaran ni BagasKon tu halahi: potonganna, angka pintuna laho masuk dohot ruar, parsusun ni bangunanna, sandok aturanna dohot uhum-uhumna. Suratkon ma i sudena di halahi anso diida jana tarparrohahon halahi sanga bia pangaturna sude, bope mangoloi sandok angka aturanna. 12On ma tanda hasurungan ni Bagas Na Badia: Sude tano na humaliang i na di puncu ni dolok i, na sun do badiana.”

Langgatan

13On ma ukuran ni langgatan hombar tu ukuran na dipake di Bagas Na Badia. Humaliang pat ni langgatan i adong do sada bondar, bagasna satonga meter jana bidangna laing satonga meter, margadu-gadu do i di topi sian duru saparopat meter gincatna. 14Sian bondarna i lalu tu bagian partoru, sameter gincatna. Di tonga-tonga dua meter gincatna jana satonga meter sumompit sian humaliang pat ni langgatan i. Bagian patoluhon, i ma parginjang i laing satonga meter sumompit sian humaliang ni bagian partonga i. 15Bagian na patoluhon on ma inganan panutungan ni haul; dua meter gincatna. Di suhi-suhina na opat i adong do na mandungkul songon tanduk. 16Marsogi opat do potong ni langgatan i di ginjang; onom meter be ma topina i. 17Partonga-tonga i pe laing maropat sogi do, pitu meter be ma topina i, margadu-gadu di topi sian ruar, saparopat meter gincatna. (Bidang ni bondarna i satonga meter.) Di topina i sabola Habincaran adong do tangga tu ginjang ni langgatan i.

Mangarasmihon langgatan

18Didok Tuhan Debata i ma tu au, “Ale anak ni jolma, tangihon ma sanga aha na Hudok tu ho. Muda dung sidung langgatan i di pajongjong, angkon rasmihononmu do i marhite na manutung haul di ginjangna i jana pispiskon ma tusi mudar ni haul i. 19Hum malim pomparan ni si Zadok na sian Marga Levi sajo do na tola ro tu ingananKi laho mangoloi Au. Au Tuhan Debata do mamarentahon songon i. Lehen ma tu halahi sada lombu jantan sipakeon baen haul hasesaan ni dosa. 20Buat ma saotik mudarna i jana apuskon ma tu angka tanduk na di suhi-suhi na opat i na di bagian parginjang ni langgatan i, songon i di suhi-suhi ni bagian partonga i dohot di topi-topi humaliang ni langgatan i. Songon i ma baenonna mambaen badia langgatan i dohot mambaen i gabe hapunjunganKu. 21Dung salpu i, buat ma lombu jantan sipakeon baen hasesaan ni dosa i jana tutung ma i di inganan na dung ditontuhon i, i ma di ruar ni tano na masuk tu Bagas Na Badia i. 22Ancogotna i angkon haulkononmu do sada hambeng jantan na so martihas baen haul hasesaan ni dosa. Ias ma langgatan i dohot mudar ni hambeng i, laing songon na nibaenmu salaho tu lombu jantan na poso i. 23Muda dung sidung dikarejohon ho songon i, buat ma sada lombu jantan jara-jara, dua-duana i rap na so martihas, 24lalu oban ma tu Au. Angkon sirsirkonon ni malim do sira tu ginjang ni pahan-pahanan i jana tutungonna i gabe haul di Au. 25Ganop ari di bagasan pitu ari, angkon haulkononmu sada hambeng, lombu jantan, dohot hambeng jantan baen haul hasesaan ni dosa. Nada tola adong tihas ni pahan-pahanan i. 26Pitu ari lolotna angkon padalanon ni angka malim upacara pangarasmian ni langgatan i dohot mangkobasisa anso bolas pakeon. 27Dung marujung sipitu ari i, angkon mamungka ma angka malim mangkaulkon haul situtungon dohot haul pardamean di bangso i di ginjang ni langgatan i. Jadi gabe jop ma rohangKu mida hamu sudena. Au Tuhan Debata madung mandok songon i.”

Currently Selected:

JEHESKIEL 43: LAIAKB

Highlight

Copy

Compare