JEHESKIEL 42

Dua bilik di lambung ni Bagas Na Badia

1Dung i dioban bayo i ma au tu alaman parruar i jana ditogu ia ma au tu bangunan na asing sabola Utara ni Bagas Na Badia, nada sadia dao sian bangunan na godang na di sabola Hasundutan ni Bagas Na Badia i. 2Lima pulu meter ginjang ni bangunan i jana dua pulu lima meter bidangna. 3Sabariba topi ni bangunan i mangadop tu emper sisampulu meter i do, jana topina na sabariba nari mangadop tu lante batu na di alaman parruar i. Martirket tolu do bangunan i, ganop tirket juruk do tar tubagasan martimbangkon tirket na di toruna. 4Di jolo ni angka bilik i di bagasan adong do dalan lima meter bidangna jana ginjangna lima pulu meter. Mangadop tu Utara do angka pintuna i. 5Sumompit do angka bilik na di tirket parginjang i ulang pado bilik-bilik na di tirket na di toruna, angke umbidang do dalan na di jolo ni angka bilik na di ginjang i ulang pado dalan na di toruna. 6Martirket tolu do angka bilikna i, jana nada sarupa tiangna songon angka tiang ni alaman i, hara ni ido umbahen na ummenek dibaen bilik pargincat dohot partonga. 7Satonga sian tirket na di toru i, hum tembok sajo do i dua pulu lima meter ginjangna, 8jana lobina i sidua pulu lima meter nari, disi ma dibaen angka bilik. Di tirket parginjang i adong do angka bilik sian ujung tu ujung. 9Jana mulai sian toru ni angka ruangan adong do sada haroroan sian Habincaran. Muda masuk iba tusi, angkon sian tembok parluar. 10Di sabola Habincaran di jolo ni inganan na tartutup i dohot di jolo ni bangunan sabola Hasundutan i, adong muse do disi angka bilik.

Di topi ni Bagas Na Badia sabola Selatan, adong do bangunan na sarupa dohot sinangkin, nada sadia dao sian bangunan na di sabola Hasundutan i. 11Di jolo ni angka bilikna i adong do sada dalan na sarupa tu dalan na adong di sabola Utara. Ukuranna pe sarupa, potonganna sarupa jana angka pintuna i pe sarupa. 12Di toru ni angka bilik sabola Selatan i, i ma di ujung sabola Habincaran di pangkal ni tembok i adong muse do sada pintu.

13Didok bayo i ma tu au, “Na badia do bangunan na dua i. Disi ma angka malim bolas mangadop tu haroroan ni Tuhan, mangankon angka haul na sun badia. Angkon disi muse ma payakkonon ni halahi angka haul na sun badia i, i ma: Haul gandum dohot haul panyesa ni dosa sanga haul panobus ni hasalaan. 14Muda dung sidung markarejo angka malim di Bagas Na Badia, jana giot kehe ma tu alaman parruar, angkon tinggalkonon ni halahi ma pakean hapunjungan na nipake ni halahi di na markobasi ibadat i. Angkon pakean na asing noma pakeon ni halahi, baru pe anso tola halahi kehe mandapotkon rayat na marlagut i.”

Ukuran ni Bagas Na Badia humaliang

15Dung sidung disuhat bayo i Bagas Na Badia i sian bagasan, dioban ia ma au haruar sian horbangan Habincaran, lalu disuhat ia ma Bagas Na Badia i humaliang. 16Disuhat ia ma dohot tungkot pangukurnia i topina na sabola Habincaran: dapot ma dua ratus lima pulu meter. 17-19Dung i disuhat ia ma topina i sabola Utara, sabola Selatan dohot topina sabola Hasundutan; sarupa do ginjangna sude topina i, rap dua ratus lima pulu meter be. 20Jadi marsogi opat do tano na masuk tu pakarangan ni Bagas Na Badia i, dua ratus lima pulu meter be ganop topi. Dihuliangi tembok do sude pakaranganna i laho mambolat tano hapunjungan di Tuhan i ma tano na badia sian na so badia.

Currently Selected:

JEHESKIEL 42: LAIAKB

Highlight

Copy

Compare