JEHESKIEL 41

1Dioban bayo i ma au tu bagasan bilik tonga ni Bagas Na Badia. Disuhat ia ma dalan laho tusi: tolu meter ginjangna, 2jana bidangna lima meter. Dingdingna i angkup be dua satonga meter hapalna. Dung i disuhat ia muse ma bilik tonga ni Bagas Na Badia i: dua pulu meter ginjangna jana bidangna sampulu meter.

3Dung i masuk ma ia tu bilik na di bagasan i. Disuhat ia ma dalan laho tusi: sameter ginjangna, bidangna tolu meter, jana dingdingna i angkup be tolu satonga meter hapalna. 4Dung i disuhat ia ma dohot bilik i: marsogi opat do potonganna, ginjangna dohot bidangna sampulu meter be. Dung i didok ia ma tu au, “On ma Inganan Na Sun Badia.”

Angka bilik na dibangun di tembok ni Bagas Na Badia

5Dung sidung i, disuhat bayo i ma tembok parbagasan ni Bagas Na Badia i: tolu meter hapalna. Di tembok na humaliang Bagas Na Badia i adong angka bilik bidangna dua meter be. 6Martirket tolu do angka bilik i jana tolu pulu bilik ma ganop tirket. Dingding ni ganop tirket umnipis do i ulang pado tirket na di toruna, jadi gabe tarbaen ma maratur angka bilik-bilik i so pola mangalubangi tembok ni Bagas Na Badia i. 7Sian duru, sarupa do idaon hapal ni tembok ni Bagas Na Badia i sian ginjang lalu tu toru. Di tembok ni Bagas Na Badia i sian ruar, di ruar ni bilik-bilik i adong do dua tangga na godang, jadi gabe tarbaen halak do manaek sian tirket partoru i tu tirket paduahon dohot patoluhon. 8Huligi ma di Bagas Na Badia i alasna gumincat sian na humaliangna dohot ojahan ni bilik-bilik na di dingding ni Bagas Na Badia i, di antara ni emper bidangna tolu meter jana gincatna tolu meter. 9Ia bidang ni dingding ni bilik emper parruar dua satonga meter, di antara ni emper i dohot balerong sipakeon ni angka malim i, 10jana bidang ni angka bilik i sampulu meter di siamun siambirang ni Bagas Ni Tuhan i. 11Pintu ni bilik emper i sada sabola Utara jana sada sabola Selatan jana bidangna dua satonga meter.

Bangunan na di sabola Hasundutan

12Di bariba ni alaman na sabola Hasundutan i, adong do sada bangunan na godang opat pulu lima meter ginjangna jana tolu pulu lima meter bidangna, jana hapal ni angka dingdingna i dua satonga meter.

Ukuran ni sude Bagas Na Badia i

13Disuhat bayo i ma ginjang ni Bagas Na Badia i; lima pulu meter. Sian pudi ni Bagas Na Badia i lopus tu tembok ni bangunan na godang i sian pudi, i ma sabola Hasundutan i, laing lima pulu meter antarana. 14Di jolo ni Bagas Na Badia i na mangadop tu Habincaran dohot alaman na di siamun dohot siambirang i, laing lima pulu meter bidangna. 15Disuhat bayo i ma muse bangunan na godang i na pulik mangadop tu alaman sabola Hasundutan: Lima pulu meter bidangna, dohot ma disi angka emper di siamun siambirangna.

Angka bagian-bagian ni Bagas Na Badia i

Angka bilik na di Bagas Na Badia i, bilik jolo, Inganan Na Badia dohot Inganan Na Sun Badia. 16Bangunan na godang, sian bagasan dohot ruar ditutupi dohot papan jana humaliang bangunan na tolu i adong jandelana na martutup dohot tire. Di jolo ni sude pintu ni Bagas Na Badia i ditutupi dohot papan mulai sian lante i lopus tu angka jandelana, gabe martutup ma jandela i. 17Lalu tu ginjang ni pintu i jana sahat tu bagas parbagasan lalu tu luar: Diuhir dohot gorga-gorga na marrupahon 18bona ni kurma dohot kerub, sada bona ni kurma ma diantara ni ganop dua kerub. Adong do dua batu ni kerub i 19sada ma i bohi ni jolma adop bona ni kurma sabola siambirang, dohot tompa ni singa na mangadop tu bona ni kurma i ma sabola siamun. Di sude Bagas Na Badia i adong do gorga-gorgaan i, 20mamungka sian lantena lalu tu ginjang ni pintu i adong do digorgahon angka kerub dohot kurma di dingding ni Bagas Na Badia. 21Angka tiang ni pintu di Inganan Na Badia i marsogi opat do potonganna.

Langgatan na sian hayu

Di jolo ni Inganan Na Badia i adong do idaon tarsongon 22langgatan sian hayu. Sada satonga meter gincatna jana bidangna sameter. Suhi-suhina, ojahanna dohot dingdingna i sian hayu do dibaen. Didok bayo i ma tu au, “On ma meja na di jolo ni haroroan ni Tuhan.”

Angka pintu

23Di ujung ni dalan tu Inganan Na Badia i adong do sada pintu, songon i muse di ujung ni dalan tu Inganan Na Sun Badia i. 24Dua be bulung ni pintu ni Bagas Na Badia i. Jana ganop pintu adong do dua bulung ni pintu na bisa marputar, jana ganop pintu adong be dua bulung ni pintu. 25Diuhirkon do angka hayu ni kurma dohot angka kerub di bulung ni pintu ni Bagas Na Badia i. Di jolo ni pintu ni Bagas Na Badia adong do tangga hayu na di ruar kurma. 26Di topi ni dingding i sian lambung ni bilik tonga, adong do angka jandela jana dingdingna i dibunga-bungai do dohot gorga ni bona ni kurma.

Currently Selected:

JEHESKIEL 41: LAIAKB

Highlight

Copy

Compare