HARURUAR 12
12
Ari Pesta Paskah
1Dipangkulingi Tuhan ma si Musa dohot si Harun di tano Mesir, ninna ma, 2“Bulan on ma na gabe bulan parjolo di almanakmunu. 3Dokkon ma parenta on tu halak Israel: Di ari sampulu bulan on ganop halaklahi angkon mamili sada anak ni biri-biri sanga anak ni hambeng di ganop ripe. 4Tapi muda otik do bilangan ni halahi na saripe i, mangabiskon sada anak ni biri-biri sanga anak ni hambeng, bolas do rap halahi dohot hombar bagasna mangankon anak ni biri-biri sanga anak ni hambeng mangihutkon bahat ni halahi na mangankon dohot bahat ni juhut na lobas panganon ni ganop halak. 5Tola do pilionmunu sian biri-biri sanga hambeng, tapi angkon jantan do na marumur sataon jana na so martihas. 6Jana di ari paopatbolaskon bulan on, sude ma halak Israel manyambol anak ni pahan-pahanan i. 7Dung i daiskon ma saotik sian mudarna i tu dua tiang ni pintu i dohot tu pamalpal ni pintu sian ginjang di bagas inganan ni halahi mangankon juhutna i. 8Borngin i ditutung ma juhutna i, dipangan ma rap dohot sayur paet dohot roti na so marragi. 9Angkon nitutung do sude uluna, patna dohot isi ni butuhana. Pangan hamu ma juhut na nitutung i ulang adong mangan na mata sanga na nibolgang. 10Saotik pe nada tola tinggalkononmunu tu ancogot; muda adong na lobi, angkon nitutung lopus abis. 11Angkon mopop do hamu mangankon harana marpakean do hamu singkop songon na giot mardalanan, marsipatu patmunu jana tiop hamu tungkot di tanganmunu. On ma Ari Pesta Paskah laho pasangapkon Au Tuhan.
12Di borngin i bolusanKu ma sude tano Mesir, jana bunuonKu ma sude anak halaklahi siangkaan, bope di jolma bope di pahan-pahanan. UhumanKu ma sude sombaon na di Mesir, angke Au do Tuhan. 13Mudar na di pintu ni bagasmunu i ma tandana paboahon bagas ingananmunu. Muda Huida mudar i salpuanKu ma hamu, jana nada agoonKu hamu di na manguhum halak Mesir i Au. 14Ari on ma ari parningotan di hamu. Angkon pagodangonmunu do ari on laho marningot angka aha na dung Hubaen. Rayahon hamu ma ari on salolot-lolotna.”
Ari Pesta Roti Na So Marragi
15Didok Tuhan, “Pitu ari honokna nada tola panganonmunu roti na marragi. Di ari parjolo, nada tola adong ragi di bagasmunu, angke muda adong halak mangan roti na marragi di bagasan pitu ari i, nada etongon be ia bangsongKu. 16Di ari parjolo dohot di ari papituhon, angkon marlagut ma hamu maribadat. Di ari i nada tola adong markarejo hum saotik pe. Hum pasingkop panganon do tola si karejohononmunu. 17Angkon tongtong do baenonmunu parningotan di Ari Pesta on, angke di ari on ma Huoban sude bangsomunu haruar sian Mesir. Tu angka ari na ro pe angkon baenon do parningotan di Ari Pesta on lalu tu angka pomparanmunu. 18Di bulan parjolo, mamungka sian borngin ni ari opat bolas lopus borngin tanggal dua pulu sada, nada tola panganonmunu roti na marragi. 19-20Di bagasan na pitu ari i, nada tola simpanonmunu ragi di bagasmunu. Betak adong halak, bope halak Israel, bope halak na asing mangankon roti na marragi, nada tola etongon be i sahalak sian bangsongKu.”
Paskah na parjolo
21Dipalagut si Musa ma sude hatobangon ni Israel, ning ia ma tu halahi, “Kehe ma hamu manjalahi anak ni biri-biri sanga anak ni hambeng sisambolon, anso ganop ripe tarbaen dohot mamestahon Paskah. 22Buat hamu ma sangkolting hisop, pamasuk ma i tu sambong na marisi mudar ni pahan-pahanan i, daiskon ma i tu na dua tiang ni pintu dohot tu pamalpal ni pintu ni bagasmunu. Lopus tu manyogotna i nada tola sahalak pe manadingkon bagas. 23Muda dibolus Tuhan luat on laho mamunu angka halak Mesir, idaon ni Tuhan ma mudar na di pamalpal dohot tiang ni pintu i, gabe nada loasonNia be Surusuruan Pangago i masuk tu bagasmunu laho mamunu hamu. 24Angkon oloanmunu do dohot dakdanakmunu aturan on ro di salolot-lolotna. 25Muda dung masuk hamu tu tano na nijanjihon ni Tuhan i tu hamu, angkon patupaonmunu do upacara on. 26Muda disapai angka dakdanakmunu, ‘Aha dehe astuan ni on?’ 27Alusanmunu ma, ‘On ma da haul Paskah laho pasangapkon Tuhan, angke sude bagas ni halak Israel di Mesir disalpui Ia do, jana dibunu Ia do angka halak Mesir, hape anggo hita dipadiar Ia do mangolu!’ ”
Dung i marsinggang ma halak Israel jana marsomba tu Tuhan i. 28Dung i kehe ma halak Israel patuluskon na niparentahon ni Tuhan tu si Musa dohot si Harun.
Hamamate ni anak siangkaan
29Di tonga borngin i, dibunu Tuhan ma sude anak halaklahi siangkaan di Mesir, mamungka sian anak siangkaan ni raja i, lalu tu anak siangkaan ni na di hurungan. Angka pahan-pahanan na parjolo sorang pe dibunu. 30Di borngin i, ngot ma raja i, menterina, bope sude halak Mesir. Tarbege do di sude Luat Mesir angguk badar angke sude bagas nada adong na so matean anak halaklahi. 31Laing di borngin i dipio raja i si Musa dohot si Harun ning ia ma, “Kehe ma hamu, sian on! Morot sude! Kehe ma hamu manyomba Debatamunu songon na nipangidomunu i. 32Oban hamu ma biri-biri, hambeng dohot lombumunu i, kehe ma hamu! Laing pangido hamu pasupasu di au!”
33Gabe disosak halak Mesir i ma anso diompoti halak Israel i manadingkon luat i. Ninna halahi ma, “Mate ma hami sude muda nada kehe hamu!” 34Jadi dibuat halak Israel ma parmasahan ni roti ni halahi na marisi adonan roti na so diragi, dibungkus halahi ma i tu abit, lalu diporsan tu abarana be. 35Dipatulus halahi do songon na nidok ni si Musa; dipangido halahi do barang sere, perak dohot pakean sian halak Mesir i. 36Gabe mardenggan ni roha do halak Mesir i mida halak Israel dibaen Tuhan. Dilehen halahi do sanga aha na nipangido ni halak Israel. Songon i ma pardalanna gabe dioban halak Israel sinadongan ni halak Mesir i haruar sian luat i.
Ditinggalkon halak Israel ma tano Mesir
37Mardalan ma halak Israel sian Ramses tu kota Sukot. Bahat ni halahi adong do 600.000 halak so padohot dadaboru dohot dakdanak. 38Bahat dope halak na asing, bahat biri-biri, hambeng, lombu dohot angka pahan-pahanan na asing. 39Ditutung halahi ma roti na so marragi sian adonan na nioban ni halahi sian Mesir. Hara ni tompuna halahi dipaorot sian i, gabe nada sanga halahi mangarade panganon sanga pauli adonan ni roti dohot ragi.
40430 taon ma honokna maringanan halak Israel di Mesir. 41Di ari parpudi di taon pa 430 hon i, sude ma bangso ni Debata maninggalkon tano Mesir. 42Di borngin i torus do Tuhan marjago-jago laho manaruhon halahi haruar sian Mesir. Jana borngin i muse ma na gabe borngin sisombahonon tu Tuhan di ari-ari na ro, gabe borngin parningotan. Di borngin i angkon marjago-jago halak Israel.
Aturan ni Ari Pesta Paskah
43Didok Tuhan ma tu si Musa dohot tu si Harun, “On ma aturan di Pesta Paskah. Nada tola panganon ni halak sileban panganon Paskah i. 44Tapi anggo angka hatoban na nitobusanmunu tola do dohot mangankon muda dung disunat halakna i. 45Halak na ro sanga halak pangomo na nigaji nada tola dohot mangankon. 46Sude panganon i angkon panganon di inganan pangaradeanna i, nada tola obanon ruar sian i. Ulang niponggolkon sada pe sian holi-holi ni pahan-pahanan i. 47Sude bangso Israel angkon mamestahon pesta i. 48Halak na so disunat nada tola dohot mangankon panganon pesta i. Betak adong sian halak na leban na dung hot rap dohot hamu na malungun dohot mamestahon Paskah i laho pasangap Debata, angkon jolo sunatonmunu do angka halaklahi na adong di bagasnia i. Dung i angkon etongonmunu do halahi songon halak Israel asli jana tola ma ia dohot mamestahon Paskah i. 49Dos do aturan tu halak Israel asli dohot tu halak na leban na dung hot rap dohot hamu.” 50Sude halak Israel tunduk do patulus na niparentahon ni Tuhan tu si Musa dohot si Harun. 51Di ari i ma dioban Tuhan halak Israel i ruar sian tano Mesir songon sada parangan.
Currently Selected:
HARURUAR 12: LAIAKB
Highlight
Share
Copy
Want to have your highlights saved across all your devices? Sign up or sign in
Indonesian Bible Society
