HARURUAR 13

Manyombahon anak siangkaan

1Didokkon Tuhan ma tu si Musa, 2“Haulkon ma tu Au sude anak halaklahi siangkaan. Ganop anak halaklahi siangkaan di halak Israel dohot sandok pahan-pahanan jantan na parjolo sorang, Au do nampunasa.”

Ari Pesta Roti Na So Marragi

3Didok si Musa ma tu halak Israel, “Ingot hamu ma ari on ari haruruarmunu sian Mesir inganan parhatobanonmunu. On ma arina Tuhan paluahon hamu marhite kuasoNia na godang i. Ulang pangan hamu roti na marragi. 4Sadari on, ari sada bulan Abib, ditinggalkon hamu tano Mesir. 5Mardongan sumpa dijanjihon Tuhan tu ompumunu laho pasahatkon tu luat ni halak Kanaan, Het, Amori, Hewi dohot Jebus. Dung dioban Tuhan hamu tu luat na mora bope na napu i, ganop taon di bulan parjolo angkon hagodangkononmunu do pesta on. 6Pitu ari lolotna angkon panganonmunu roti na so marragi, jana di ari papituhon angkon pamasaonmunu ma pesta laho pasangapkon Tuhan. 7Pitu ari lolotna nada tola panganonmunu roti na marragi jana di sude luatmunu nada tola adong ragi sanga roti na marragi.

8Di parmulaan ni pesta i, angkon baritahononmunu do tu angka dakdanakmunu, dibaen hamu pe sudena i, i ma hara ni sasude na dung dibaen Tuhan tu hamu di na laho maninggalkon tano Mesir hamu. 9Pesta on ma songon singot-singot di hamu tudos tu na nitambatkon di tangan sanga di bohimu. Marhite pesta on, gabe dipaingot hamu anso diapil jana diparsiajari hamu angka Uhum Ni Tuhan, harana madung diparuar Tuhan hamu sian Mesir marhite kuasoNa na godang i. 10Pestahon hamu ma pesta on ganup taon di hatiha na dung ditontuhon.”

Anak siangkaan

11Didok si Musa ma tu bangso Israel, “Obanon ni Tuhan ma hamu tu tano Kanaan na dung dijanjihonNa i mardongan sumpa tu hamu dohot tu ompumunu. Dung dipasahat tano i tu hamu, 12angkon pasahatonmunu do sude anak siangkaan tu Tuhan. Sandok pahan-pahanan jantan na parjolo sorang, Tuhan do nampunasa. 13Tapi sandok halode jantan na parjolo sorang angkon ditobus do sian Tuhan marhite na manghaulkon sada anak ni biri-biri songon gontina. Muda nada ra hamu manobus halode i, angkon ponggolkononkon do rungkungna i. Ganop anakmu halaklahi na parjolo sorang, angkon tobusonmunu. 14Muda disapai anakmu di pudian ni ari sanga aha astuan ni pesta on, angkon alusanmunu songon on, ‘Marhite hagodangan ni kuaso ni Tuhan do, na maroban hita ruar sian Mesir inganan parhatobananta i. 15Di na manangkang roha ni raja Mesir jana nada diloas ia hita kehe, dibunu Tuhan ma sude halaklahi anak siangkaan ni halak Mesir, bope anak siangkaan ni jolma dohot pahan-pahanan. I ma da dalanna tahaulkon tu Tuhan ganop pahan-pahanan jantan na parjolo sorang, tapi tatobus ma anggo anak siangkaan di hita.’ 16Pesta on ma na paingotkon hita gabe songon sada tanda na ditambatkon di tangan sanga di bohinta. Marhite pesta on, dipaingot hita, bahaso na dung diparuar Tuhan hita sian Mesir marhite kuasoNa na godang i.”

Tiang ombun dohot tiang api

17Di na nipaloas ni raja Mesir kehe bangso Israel, nada dioban Debata halahi manopi-nopi laut laho tu Luat Pilistin, haru pe nian dalan i do na dumonok. Didok roha ni Debata, “Nada por rohangKu muda manyolsoli halahi gabe mulak tu Mesir dung diida halahi na angkon marporang halahi.” 18Balikna do, dioban Debata halahi marhaliang mamolus parhorsihan torus tu Laut Rara.#13:18 LAUT RARA: Betak na dimaksudna dison: 1. Punguan ni dano dohot ambar na adong di antara ni Solok Suez dohot Laut Tonga. Bahat do tubu disi galoga, i ma sabangso ruput na mangolu di aek. Luat on do umumna dietong songon inganan ni angka na masa na digombarkon di Haruruar pasal 13. 2. Solok Suez 3. Solok Akaba 4. Laut Galoga Marsinjata be do halak Israel i songon na giot marporang.

19Dioban si Musa do holi-holi ni si Josep, angke dompak di ngolunia madung dibaen halak Israel marsumpa laho patuluskon songon i. Didok si Josep do, “Muda dung dipalua Tuhan hamu, angkon obanonmunu do bangkengku sian inganan on rap dohot hamu.”

20Ditinggalkon halak Israel ma Sukot, jana marbandar ma halahi di Etam, di topi ni parhorsihan. 21Muda hatiha arian, mardalan ma Tuhan di jolo ni halahi di bagasan tiang ombun, jana hatiha borngin dijoloi Ia ma halahi di bagasan tiang api laho patidahon dalan. Dung songon i, tarbaen halahi ma mardalan arian dohot borngin. 22Salolot arian tongtong do di jolo ni bangso i tiang ombun i, jana salolot borngin rap do tiang api i dohot halahi.

Currently Selected:

HARURUAR 13: LAIAKB

Highlight

Copy