HARURUAR 11

Dipalumba si Musa hamamate ni anak siangkaan

1Didok Tuhan ma tu si Musa, “DabuonKu dope sada nari uhum tu raja Mesir dohot tu rayatnia. Dung i paloasonnia ma hamu kehe. Olo! Angkon paorotonnia ma sude hamu sian on. 2Hara ni i dokkon ma tu halak Israel; suru ma halahi mangido angka barang sere, dohot perak sian hombar bagas ni halahi.” 3Dibaen Tuhan ma halak Mesir i mabiar mida halak Israel. Si Musa pe gabe halak na sangap situtu ma diida angka menteri dohot sude rayat i.

4Jadi didok si Musa ma tu raja i, “Songon on pandok ni Tuhan, ‘Hira-hira tonga borngin, bolusonKu ma sude tano Mesir, 5jana mate ma sude anak halaklahi siangkaan ni raja i, lalu tu anak siangkaan ni hatoban dadaboru siduda eme. Anak ni pahan-pahanan na parjolo sorang pe marmatean ma. 6Di sude tano Mesir tarbege ma angguk-angguk na gogo na so unjung masa jana na so masa be. 7Tapi anggo di halak Israel, bope jolma bope pahan-pahanan nada adong na mahua. Jadi gabe botoonmu ma, Au do Tuhan na mambaen marasing halak Mesir sian halak Israel.’ ” 8Dung i didok si Musa ma muse, “Sude angka menterimu, angkon unduk di jolongku mangido, anso kehe au maroban sude bangsongki. Dung i pe anso kehe hami.” Mardongan muruk situtu, ditinggalkon si Musa ma raja i.

9Didok Tuhan ma tu si Musa, “Nada ditangihon raja i hatamu, anso umbahat dope baenonKu tanda hahomangan di Mesir on.” 10Dipatupa si Musa dohot si Harun do sude tanda hahomangan i di jolo ni raja i tapi dipatangkang Debata do roha ni raja i, nada dipaloas ia tinggalkonon ni halak Israel luatnia i.

Currently Selected:

HARURUAR 11: LAIAKB

Highlight

Copy