HARURUAR 10

Pangganggu ni siapor

1Didok Debata ma tu si Musa, “Kehe ma ho mangadop tu raja i. Madung Hubaen jogal rohania dohot roha ni angka menterinia i, anso tarbaen Au patidahon angka tanda hahomangan di tonga-tonga ni halahi, 2anso tarcaritohon ho i tu anakmu dohot tu pahompumu sanga songon dia Hubaen marmayam-mayamkon bangso Mesir marhite hahomangan na dung Hubaen di tonga-tonga ni halak i. Sude ma hamu mambotosa, bahaso Au do Tuhan.”

3Jadi kehe ma si Musa dohot si Harun mangadop tu raja i, jana didok halahi ma, “Tuhan, Debata ni bangso Ibrani mandok, ‘Sadia honok nari ma he gagaanmu tunduk tu Au? Loas ma bangsongKi kehe anso tarbaen halahi maribadat tu Au. 4Muda laing gagaanmu, ancogot paroonKu ma siapor tu luatmon. 5Bahat situtu ma siapor, lopus ditutup halahi sude tano i. Papanganan ni siapor i ma sude na so sego dibaen ambolas i, salang angka batang ni hayu na tinggal i papanganan ni halahi. 6Gohan ni siapor i ma bagas godangmu, bope bagas ni angka menterimu dohot rayatmu. Jumorbut dope bala on sian angka na dung masa tu ompumunu.’ ” Dung i dihudukkon ia ma raja i jana kehe ma ia.

7Dung i didokkon angka menteri i ma tu raja i, “Sadia honok nari sai arsahan ni halahon hita? Paloas ma halak Israel i kehe, anso maribadat halahi tu Tuhan Debata ni halahi. Nada he diida raja i sude tano Mesir madung sego?”

8Jadi dipio ma mangulahi si Musa dohot si Harun mangadop tu raja i. Didokkon raja i ma tu halahi, “Tola ma hamu kehe maribadat tu Tuhan, Debatamunu. Tapi ise dehe satutuna na giot kehe?”

9Dialusi si Musa, “Sude do hami giot kehe, dakdanak dohot halak na matobang. Obanonnami do sude dakdanaknami, sude biri-biri dohot hambeng bope lombunami, angke na giot baenonnami ma pesta laho pasangap Tuhan.”

10Ninna raja i ma, “Husumpahon ma mangasahon Tuhan paboa na so huloas angka dadaboru dohot dakdanakmunu! Madung tangkas, na mambaen kompolotan do hamu laho mangalo. 11Nada! Hum halaklahi do na tola kehe maribadat tu Tuhan, muda i ma na nihagiotanmunu.” Songon i ma hatana paorotkon si Musa dohot si Harun sian bagas godang i.

12Dung i didok Tuhan ma tu si Musa, “Surduhon ma tanganmu tu ginjang ni tano Mesir. Gabe ro ma siapor jana panganonna sude suan-suanan na tinggal dope dung udan ambolas i.” 13Jadi diangkat si Musa ma tungkotnia jana diparo Tuhan ma haba-haba sian Habincaran mangombus tu luat i arian dohot borngin. Marayak manyogot dope marroan ma angka siapor i. 14Marrongom do siapor i ro marbahat-bahat pola gok sude tano Mesir ditutupi halahi. Nada unjung dope diida halak siapor na pola songon i bahatna, jana nada idaon be na songon i. 15Ditutupi angka siapor i do sude tano, lopus lomlom idaon. Dipangan halahi do sanga aha sajo na tinggal dope dung salpu ambolas i dohot angka batu ni hayu. Nada adong be na rata na tading di hayu sanga di suan-suanan di sandok tano Mesir.

16Diompot raja i ma marpio si Musa dohot si Harun, ning ia ma, “Madung mardosa au tu Tuhan Debatamunu bope tu hamu. 17Sesa ma dosangki sanoli on, martangiang ma hamu tu Tuhan Debatamunu, anso ditarik Ia mulak uhum hamatean on sian au.” 18Ditinggalkon si Musa ma Raja Parao laho martangiang tu Tuhan. 19Dipahusor Tuhan ma pangombus ni haba-haba, gabe ro sian Hasundutan gogo sajo. Dung i dihabangkon haba-haba i ma siapor i lalu tu Laut Rara.#10:19 LAUT RARA: Di hata Ibrani Laut Galoga. Umpe sada siapor i na tading di sude tano Mesir. 20Tapi dipajogal Tuhan do roha ni raja i, jana nada diloas Ia kehe halak Israel i.

Golap bulita sandok Mesir

21Didokkon Tuhan ma tu si Musa, “Angkat ma tanganmu tu langit, gabe golap bulita ma tano Mesir.” 22Diangkat si Musa ma tangannia tu langit, gabe golap bulita ma sude tano Mesir honokna tolu ari. 23Nada marsipaidaan be halak Mesir dohot donganna, jana sahalak pe nada adong na maninggalkon bagasna na tolu ari i. Hape anggo di inganan ni halak Israel i tongtong do adong na torang.

24Dipio raja i ma si Musa, ning ia ma, “Tola do hamu kehe maribadat tu Tuhanmunu. Dadaboru dohot dakdanak pe tola ma dohot. Tapi anggo biri-biri, hambeng dohot lombumunu tinggal ma dison.”

25Dialusi si Musa ma, “Anggo songon i do, angkon dilehen raja i ma pahan-pahanan di hami baen sihaulkonon dohot haul situtungon tu Tuhan, Debatanami. 26Jana boanonnami do sude pahan-pahanannami, sada pe nada adong tinggalkononnami. Angkon pilionnami sandiri do pahan-pahanan sihaulkononnami tu Tuhan Debatanami. Painte so lalu tusi, nada hami boto dope sanga dia sian pahan-pahanan i sihaulkononkon tu Tuhan.”

27Dipajogal Tuhan do roha ni raja i; gabe nada diloas raja i bangso Israel kehe. 28Ninna raja i ma tu si Musa, “Morot ho sian jolongku, ulang jabat huida be ho. Muda marsuo dope hita, mate ma ho!”

29“Songon na nidok ni raja i,” ninna si Musa, “nada idaon ni raja i be au.”

Currently Selected:

HARURUAR 10: LAIAKB

Highlight

Copy