HARURUAR 9

Bala tu pahan-pahanan

1Didok Debata ma tu si Musa, “Kehe ma ho mangadop tu raja i dokkon ma disia hata ni Tuhan Debata ni halak Ibrani mandok, ‘Loas ma kehe bangsongKi anso tarbaen halahi marsomba tu Au. 2Muda laing digagai ho do laho pakehe halahi, 3uhumonKu ma ho markite na parohon bala tu sude pahan-pahananmu – kudo, halode, unto, lombu, biri-biri dohot hambengmu. 4Asing do baenonKu tu pahan-pahanan ni halak Israel sian pahan-pahanan ni halak Mesir. Sada pe nada adong na mate sian pahan-pahanan ni halak Israel. 5Au do Tuhan na manontuhon, ancogot ma i pamasaon.’ ”

6Ancogotna i dipatulus Tuhan ma songon na nidokNia i. Sandok pahan-pahanan ni halak Mesir i mate sude, hape pahan-pahanan ni halak Israel, sada pe nada adong na mate. 7Disapai raja i ma sanga aha na masa, gabe dibaritahon halak ma disia na so adong sada pe sian pahan-pahanan ni halak Israel na mate. Tapi laing jogal do roha ni raja i jana nada diloas ia bangso i kehe.

Baro-baroon

8Didok Tuhan ma tu si Musa dohot si Harun, “Buat ma sanga piga-pigangkaut sirabun sian tataring. Angkon sampakkonon ni si Musa adop ginjang abu i di jolo ni raja i. 9Jadi gabe sarsar ma sirabun i songon abuan na lamot tu sude tano Mesir, gabe baroon ma sandok jolma dohot pahan-pahanan di tano Mesir baenon ni i, dung mapuntar baro i gabe marnana ma i.” 10Dung i dibuat si Musa dohot si Harun ma abu saotik, dung i kehe ma halahi manopotkon raja i. Disampakkon si Musa ma sirabun i tu ginjang. Gabe baroon ma jolma bope pahan-pahanan, na gabe bugang na marnana i. 11Nada tarbaen angka parelmu sihir i ro mandapotkon si Musa, harana halahi pe gok baro do songon halak Mesir na asing i. 12Tapi dipajogal Tuhan do roha ni raja i, jana songon na nidok ni Tuhan hian, nada tangihonon ni raja i si Musa dohot si Harun.

Udan ambolas

13Didokkon Tuhan ma tu si Musa, “Sogot manyogot i sigop ma ho kehe ancogot manopot raja i, pabolkas ma tusia bahaso na dung didok Tuhan Debata ni halak Ibrani do, ‘Paloas ma bangsongKu kehe anso tarbaen halahi maribadat tu Au. 14Anggo on, nada hum menterimu dohot rayatmu na giot uhumonKu, tapi ho sandiri pe angkon hona, anso diboto hamu na so adong na dos dohot Au di portibi on. 15Sugari ra Au manguhumi ho dohot rayatmi markite nyae pasti gabe marmatean hamu sude. 16Tapi Hupadiar dope mangolu hamu laho patidahon kuasongKu tu hamu, anso tarbonggal goarKu tu sude portibi on. 17Hape laing ginjang dope rohamu jana nada dipaloas ho kehe bangsongKi. 18Ancogot manyogot, paroonKu ma udan ambolas marsitutu, songon na so unjung masa dope di sejarah ni Mesir on. 19Parentahon hian ma saonnari, anso sude pahan-pahananmu dohot sude artamu na adong di ruar anso dipamasuk tu inganan na aman. Tinggangon ni udan ambolas i ma jolma bope pahan-pahanan na di ruar na so marsilaung lopus marmatean sude.’ ” 20Adong do deba sian angka menteri i na mabiar umbege hata na nidok ni Tuhan i. Dioban halahi ma angka hatoban ni halahi bope pahan-pahanan ni halahi masuk tu bagasan bagas anso tarlaung. 21Tapi halak na asing nada parduli di sipaingot i, ditadingkon do hatobanna bope pahan-pahanan ni halahi di ruar i.

22Dung i didok Debata ma tu si Musa, “Baen ma tanganmi adop langit jana madabu ma ambolas di sude tano Mesir. Tinggangon ni ambolas i ma jolma, pahan-pahanan dohot sude suan-suanan na di ladang i.” 23Dung i diangkat si Musa ma tungkotnia tu langit, jana gabe diparo Tuhan ma ronggur dohot ambolas bope porkas manyoro tu tano. Diparo Tuhan, 24ambolas marsitutu mardongan hilap na sumiksak. On dope bade na gumogo di sejarah ni Mesir. 25Di sude luat i, disego-sego ambolas i do sandok na adong di inganan na talak, dohot jolma bope pahan-pahanan. Disego-sego halingsungsung do sude suan-suanan di ladang bope hayu mangkarumpak sude dibaensa. 26Anggo di tano Gosen, inganan ni halak Israel i, hum sasada i ma inganan na so hona ambolas.

27Dung i disuru raja i ma anso dipio si Musa dohot si Harun, ninna ma, “Madung mardosa au sanoli on. Tigor do Tuhan i tapi au do dohot rayatku na marsala. 28Tangiangkon hamu ma tu Tuhan, madung tuk parkancitannami dibaen ambolas on. Marjanji ma au laho paloaskon hamu kehe. Indangkon pola tinggal be hamu dison.”

29Didok si Musa ma tu raja i, “Disi haruar au sian kota on, angkatonku ma tanganku martangiang tu Tuhan. Mantak ma ronggur i, siang ma udan ambolas, anso diboto hamu, Debata do nampuna tano on. 30Tapi huboto do laing na so mabiar do raja i, dohot angka menteri ni raja i tu Tuhan Debata.”

31Anggo rami na nisuan dohot jawawut sude do sego, dibaen i madung masak jawawut i jana rami i hatiha martunas. 32Tapi anggo gandum dohot sekoi nada sego harana nada podo musimna.

33Ditinggalkon si Musa ma raja i jana kehe ma ia tu balian ni kota lalu diangkat ia tangannia laho martangiang tu Tuhan. Rap maradian ma ronggur, ambolas dohot udan. 34Dung diida raja i na masa i, diulahi ia ma mardosa. Tongtong do jogal roha ni raja i dohot angka menterinia i songon na somal. 35Songon na nidok ni Tuhan marhite si Musa, nada ra raja i mangaloas halak Israel i kehe.

Currently Selected:

HARURUAR 9: LAIAKB

Highlight

Copy