PANGARATAION 18

Bagian ni angka malim

1“Anggo Marga Levi na gabe hasahatan ni karejo mangoloi songon malim nada tola manjagit tano parbagian di Israel. Angkon sian angka haul dohot angka haul na asing na dilehen tu Tuhan do halahi mangolu. 2Nada tola marnampuna halahi di tano, songon angka marga na asing; hasangapan ni na gabe malim ni Tuhan do bagian ni halahi songon na dung dijanjihon Tuhan humani.

3Muda adong sada halak manghaulkon lombu sanga biri-biri, jadi hae jolo, isang-isang dohot butuha ni pahan-pahanan i dipasahat ma i tu angka malim baen di halahi. 4Patumonaan ni suha ni gandum, anggur, miak zetun dohot imbulu ni biri-biri, laing di halahi ma i. 5Sian sasude marga ni Israel na dung dipili ni Tuhan do Marga Levi laho mangoloi gabe parhobas ni Tuhan salolot-lolotna.

6Muda adong sada halak Levi sanga na sian kota dia pe i di Israel, na ro tu inganan paribadatan na nitontuhon ni Tuhan, dung i gabe por rohania tinggal di inganan i, 7tola ma ia mangoloi Tuhan Debatania songon malim, songon halak Levi na asing na markarejo di inganan paribadatan i. 8Angkon dos do jagitonnia bahat ni panganon laing songon angka malim na asing, saasing ni bagianna sandiri sian ompunia, gabe nampunania do i.”

Angka pangalaho ni halak Kapir na so tola tiruon

9“Muda masuk hamu tu tano na nilehen ni Tuhan Debatamunu i tu hamu, ulang antong tiru hamu angka pangalaho hagigian na nibaen ni angka bangso na adong disi. 10Ulang pelehon hamu angka dakdanakmunu di bagasan api di ginjang ni langgatanmunu. Ulang patola hamu bangsomunu gabe tukang ramal, manjalahi angka tanda-tanda, mamake jampi-jampi sanga 11mangajii, jana ulang padiar hamu mambaen hubungan halahi tu angka tondi ni halak na mate. 12Dihagigihon Tuhan Debatamunu do halak na mambaen pangalaho na jahat i, jana hara ni i do umbaen na nipaorotNia angka bangso sian jolomunu. 13Antong sai oloi hamu ma Tuhan Debatamunu i, sian sandok rohamunu.”

Janji ni Debata laho marsuru panurirang

14Dung i didok si Musa ma, “Anggo di tano na giot siingananmunu i, mangihut tu sipaingot ni angka partondung do angka jolma, dohot manjalahi angka alatan-alatan. Tapi anggo Tuhan Debatamunu nada diloas Ia hamu mambaen na songon i. 15Tapi suruonNia ma tu hamu sian bangsomunu sandiri sada halak panurirang songon au on jana angkon oloanmunu do panurirang i.

16Di ari i, dompak na marlagut hamu di Dolok Sinai, dipangidohon hamu anso ulang be nian dibege hamu mangulahi Tuhan mangkuling, jana ulang diida hamu haroroNia di bagasan api na marjilam-jilam, hara ni biarmunu mate. 17Jadi gabe didok Tuhan tu au: Madung denggan dihatahon halahi aha na dung dihatahon halahi. 18SuruonKu ma tu halahi sian bangso ni halahi sandiri sada halak panurirang, songon ho, Musa. DokkononKu ma tusia sanga aha dokkononnia, jana palaluonnia ma tu bangso i sandok na Huparentahon. 19Marhite goarKu do ia mandok hata, jana uhumanKu do sanga ise na so mangoloi ia. 20Tapi muda adong sada panurirang na puluk palaluhon tona mamake goarKu, hape nada na Husuru ia mambaen songon i, angkon mate do ia hara ni pangalahona i, laing songon i muse do angka panurirang na manghatahon hata ni debata na asing.

21Muda didok rohamunu: Bia ma pambotonami di tona ni sada panurirang na marasal sian Tuhan sanga nada? 22Muda manghobari sada panurirang mamake goar ni Tuhan, hape nada tulus masa na nidoknia i, nada sian Tuhan ro tona i. Sian goarna sandiri do manghobari panurirang i, jana ulang pola mabiar hamu tusi.”

Currently Selected:

PANGARATAION 18: LAIAKB

Highlight

Copy

Compare