PANGARATAION 19

Angka kota haporusan

(Bil. 35:9-28; Jos. 20:1-9)

1“Dung diabisi Tuhan Debatamunu angka bangso i jana dilehen tu hamu tano i, gabe pambuatanmunu ma angka kotana i dohot angka bagas ni halahi lalu maringanan hamu disi, 2angkon bagi toluonmunu do luat i, 3ganup bagian adong be sada kota haporusan na momo topoton anso sanga ise na mamunu tola kehe tusi. 4Muda adong sada halak na so sangajo mamunu halak na asing na so musuna, tarbaensa ma paluahon dirina maporus tu sada sian kota i laho manjalahi parlindungan. 5Rupani, adong ma dua halak na rap kehe tu harangan martaba hayu. Di na martaba na sahalak, taldus ma mata ni patonia i sian suhulna i jana hona tu na sahalak nari gabe mate. Jadi tarbaen na mamunu sian na so sangajo i ma marlojong tu sada sian kota haporusan na tolu i anso malua ia. 6Sugari sura hum sada kota sajo, betak madaotu antarana i tusi, gabe sanga koum sisolkot na martanggung jawab laho mamalos parmatena i ro mangkojarsa jana di hatiha parpiar ni murukna dibunusa halak na so marsala i. Hape nian nada na sangajo ia mamunu halak na so musunia i hian. 7I ma dalanna umbaen na huparentahon hamu laho paindingkon tolu kota.

8Muda dipabidang Tuhan Debatamu luatmunu i songon na dung dijanjihonNia i tu ompumunu, jana dung dilehen tu hamu sude luat i, 9jadi angkon laing pilionmunu dope tolu nari kota haporusan. (Lehenon do tano i di hamu muda dipatulus hamu sandok na dung huparentahon tu hamu di ari sadari on, jana muda dihaholongi hamu Tuhan Debatamunu jana ngolumunu mangihutkon pangajaranNia.) 10Patulus hamu ma on anso ulang mardosa hamu hara ni na mandabu uhum hamatean tu halak na so marsala di tano na giot silehenon ni Tuhan tu hamu.

11Tapi adong ma umpamana sada halak na mangadang musuna jana sangajo dibunu ia, lalu dilojongi ia tu sada sian kota i laho manjalahi parlindungan. 12Di bagasan pangalaho sisongon i, angkon pioon ni pamimpin ni kota do halakna i laho pasahatkonsa tu koum sisolkotna na martanggung jawab laho mamaloskon pamunuon i, anso bolas ia mate niuhuman. 13Ulang dibaen ibo ni roha tusia. Palua hamu ma Israel sian sibunu jolma i, anso sonang hamu.”

Parbalohan na honok

14“Muda dung lalu hamu di tano na giot silehenon ni Tuhan Debatamunu i di hamu, ulang paimbar hamu angka tanda ni parbalohan tu hombarmunu na ditontuhon narobi.”

Aturan taringot tu saksi

15“Nada tuk sada halak sajo saksi laho patorangkon sada halak na hona tuhas marsala, na ummotikna dua saksi porlu di pangalaho i. 16Muda adong sada halak na giot mandabuhon halak marhite hata na dipatubu-tubu, jadi 17angkon kehe halahi na dua tu inganan paribadatan na dung ditontuhon Tuhan anso ditimbang angka malim dohot panguhum na topet markarejo di hatiha i. 18Angkon tangkasan ni panguhum torang parkaro i, jana muda tutu do antong halakna i patubu-tubu hata na so tutu tu donganna na rap Israel, 19angkon daion ni halakna i ma uhuman na patut sihonahonon tu na dipasala i. Songon i ma baenonmunu laho mangantak hajahatan i. 20Begeon ni ganop halak ma na masa i jana gabe mabiar be ma. Jadi gabe nada adong be halak na puluk mambaen hajahatan na songon i. 21Di angka parkaro sisongon i, ulang baen hamu ibo ni roha. Angka songon on ma uhumanna: Hosa gonti ni hosa, mata gonti ni mata, ipon gonti ni ipon, tangan gonti ni tangan, jana pat gonti ni pat.”

Currently Selected:

PANGARATAION 19: LAIAKB

Highlight

Copy

Compare