PANGARATAION 17

1Lombu sanga biri-biri na martihas, ulang haulkon hamu tu Tuhan, angke magigi do Tuhan Debatamunu tusi.

2Muda dibege hamu isarana adong di sada sian hutamunu piga-piga halaklahi sanga dadaboru na mardosa tu Tuhan jana na mangalanggar janjinia 3hara ni na marsomba dohot mangoloi tu angka debata na asing, sanga pe tu mataniari, sanga tu bulan, sanga tu angka bintang, na maralo tu parenta ni Tuhan, 4muda tarbege tu hamu barita na songon i, angkon manat do sihiranmunu. Sugari sura tutu, bahaso na dung tarjadi hajahatan i di Israel, 5angkon toguon do parjahat i tu balian ni kota jana nidangguran dohot batu lopus mate. 6Tapi angkon adong do dua saksi sanga lobi anso tola ia bunuon; anggo hum sada halak sajo do saksina, nada tola dope ia bunuon. 7Angkon saksi-saksi i do parjolo mandanggurkon batu tu halakna i, siihutkonon ni halak na asing. Songon i ma baenonmunu laho mangantak hajahatan i.

8Betak sai adong parkaro na so tarputuskon angka hakim di sada inganan hara ni na mamaoltu, umpamana taringot tu hak parnampunaon, na marsibugangan pamatang, sanga parkaro na marsibunuan na sangajo sanga na so sangajo, di na songon i angkon kehe do hamu tu inganan paribadatan na nitontuhon ni Tuhan Debatamunu i. 9Paadop hamu ma angka parkaromunu i tu angka Malim Levi dohot tu hakim na markarejo di hatiha i, padiar hamu ma halahi mamutuskon parkaro i. 10Halahi ma na mangalehen haputusan, jana angkon tangkas patulusonmunu sanga aha na nidok ni halahi tu hamu. 11Jagit hamu ma haputusan ni halahi i jana padalan hamu ma angka aturan ni halahi, lopus tu pangalaho na samenek-menekna. 12Sanga ise na puluk mangalo panguhum, sanga malim na topet markarejo, angkon mate niuhuman, jadi songon i ma baenonmunu mansoadahon hajahatan i sian Israel. 13Ganop halak na umbege taringot tu na masa i tontu gabe mabiar, gabe nada adong be halak na asing na puluk mambaen na songon i.”

Angka aturan salaho tu raja

14“Muda dung hamu nampuna tano na giot silehenon ni Tuhan Debatamunu tu hamu, jana dung maringanan hamu disi, aropku por do rohamunu adong sada rajamunu, songon angka bangso na maringanan humaliang hamu. 15Tangkas ma parrohahon hamu anso halak na nipilimunu i gabe raja, laing na nitodo ni Tuhan muse. Angkon sian bangsomunu sandiri do i, anggo halak sileban ulang angkat hamu gabe rajamunu. 16Muda raja, nada tola bahat kudona baen di tentarana. Nada tola suruonnia halak tu Mesir laho manobusi kudo, dibaen madung didok Tuhan do na so tola be mulak bangsoNia i tu luat i. 17Nada tola bahat dadaboru ni raja, anso ulang dililuhon ia sian Tuhan. Nada tola muse ia pamorahon dirina marhite perak dohot sere. 18Muda adong sada halak na diangkat gabe raja, angkon lehenon do tusia sada buku na marisi angka aturan dohot pangajaran ni Debata na nisurat sian buku na asli na nisimpan ni angka Malim Levi. 19Angkon simpanonnia do buku i di lambungnia jana angkon siseonnia do i salolot mangolu ia, anso marsiajar ia manghabiari Tuhan jana mardongan haburjuon oloannia sude parenta na nisurat di bagasan buku i. 20Muda marsitutu ia manyise i, gabe nada momo be ia marpikir mandok na dumenggan ia sian halak Israel na asing i, jana nada be langgaronnia parenta ni Tuhan sanga na bia pe dalanna. Jadi mamarenta ma ia dohot pomparannia di bangso Israel marsundut-sundut.”

Currently Selected:

PANGARATAION 17: LAIAKB

Highlight

Copy

Compare