PANGARATAION 13

1Ampot adong sada panurirang sanga sada halak na sai tagi patorangkon nipi manjanjihon tanda hahomangan 2na martujuan anso marsomba hamu sanga mangoloi tu angka debata na so nisombamunu humani hatiha na salpu, haru pe tutu-situtu tarjadi na nijanjihonnia i, 3ulang ma lehen hamu saotik pe rohamunu tusi. Na nipake ni Tuhan Debatamunu do halakna i laho manguji hamu laho marnida sanga na tutu situtu do sian sandok roha dihaholongi hamu Tuhan. 4-5Angkon mate do halak na songon i, uhumonmunu, angke na giot mangaliluhon hamu do halakna i sian dalan na niparentahon ni Tuhan tu hamu. Halak na jahat do i na marsuru hamu mangalo tu Tuhan na dung paluahon hamu sian Mesir, ingananmunu di parhatobanan. Jadi angkon bunuon do i anso mago hajahatan i. Tapi angkon ihutkononmunu do Tuhan jana pasangaponmunu; oloi hamu ma Ia jana patulus hamu sude na niparentahonNia. Sai hot ma hamu tongtong marpangoloion jana burju tuSia.

6Ompot kahanggimu, sanga anakmu sanga borumu, sanga dongan saripe haholonganmu, sanga ale-alemu di na sip-sip mangelek-elek ho anso marsomba tu angka debata na asing, i ma tu angka debata na so jungada hian dope disomba ho dohot ompumunu, 7angka debata ni bangso-bangso na donok dohot na dao, 8ulang tangihon i jana ulang padiar dirimu dielek-eleksa. Ulang ibo rohamu di halak sisongon i sanga diondihon ho, 9tapi angkon bunuonmu do i. Angkon ho do parjolo mandanggurkon batu tusi, jana suru muse ma dongan na asing mambaen songon i. 10Angkon nidangguran do parsala i dohot batu lopus mate! Na giot padaoonnia ma hamu antong sian Tuhan Debatamunu na paluahon bangso on sian parhatobanan na di Mesir. 11Jadi gabe habegean ma taringot tu na masa i di sude bangso Israel; mabiar ma halahi gabe nada adong sahalak pe na puluk be mambaen na songon i jahatna.

12Muda sanoli on diingani hamu angka kota na nilehen ni Tuhan Debatamunu i di hamu, ra do sar barita 13mandok adong piga-piga halak na jahat sian bangsomunu na mangaliluhon halak pangisi ni hutana i laho marsomba angka debata na so nisombamunu hian dope na saidanna i. 14Muda adong habegean hata-hata na songon i, angkon sihir do tangkasanmunu. Muda tutu do tarjadi hajahatan na songon i antong, 15angkon bunuon do sude halak kota i rap dohot sude pahan-pahanan ni halahi. Angkon nironcohon sude kotana i. 16Angkon palaguton sude sinadongan ni halak kota i, jana dipagukguk di tonga ni alamanna i, lalu disurbu ma sude kota i dohot sasude na di bagasanna songon haul tu Tuhan Debatamunu. Dung sidung i sudena angkon tinggalkonon do i songon lobu jana nada tola be ulahan mambangunsa. 17Nada tola simpanonmunu di hamu anggo barang na hona bura, tapi angkon roncohononmunu do i. Jadi gabe mombun ma rimas ni Tuhan jana patuduhononNia ma ibo ni rohaNia tu hamu. Basa ma rohaNia tu hamu jana baenonNia ma hamu gabe bangso na godang, songon na nijanjihonNia tu ompumunu, 18asalkon ma dioloi hamu sude parentaNia na hulehen tu hamu di ari sadari on, jana dipatulus hamu sandok hagiotNia.”

Currently Selected:

PANGARATAION 13: LAIAKB

Highlight

Copy

Compare